New Airlines : ఇండిగో గుత్తాధిపత్యానికి చెక్.. ఆకాశంలో ఇక మనోళ్లదే హవా!

New Airlines : భారత విమానయాన రంగంలో ఒక సరికొత్త అధ్యాయం మొదలుకాబోతోంది. ప్రస్తుతం ఆకాశంలో ఇండిగో, ఎయిర్ ఇండియా వంటి దిగ్గజాల హవా నడుస్తుండగా, వారికి గట్టి పోటీ ఇచ్చేందుకు మరో మూడు కొత్త సంస్థలు సిద్ధమవుతున్నాయి. ప్రయాణికులకు మరిన్ని ఆప్షన్లు ఇచ్చేందుకు, విమాన టికెట్ల ధరలను అదుపులో ఉంచేందుకు కేంద్ర ప్రభుత్వం తాజాగా కీలక నిర్ణయం తీసుకుంది. AI హిందీ ఎయిర్, ఫ్లై ఎక్స్‌ప్రెస్ అనే రెండు కొత్త ఎయిర్‌లైన్స్‌కు పౌర విమానయాన మంత్రిత్వ శాఖ గ్రీన్ సిగ్నల్ ఇచ్చింది. వీటికి సంబంధించి నో అబ్జెక్షన్ సర్టిఫికేట్ జారీ చేయడంతో, అతి త్వరలోనే ఈ విమానాలు గాల్లోకి ఎగరనున్నాయి.

ఇండిగో కోటను బద్దలు కొడతాయా?

ప్రస్తుతం భారత దేశీయ విమానయాన మార్కెట్లో ఇండిగో ఒక్కటే దాదాపు 65 శాతం వాటాను కలిగి ఉంది. ఇక ఎయిర్ ఇండియా గ్రూప్ కలిపితే దాదాపు 90 శాతం మార్కెట్ ఈ రెండు సంస్థల చేతిలోనే ఉంది. దీనివల్ల ప్రయాణికులకు ఎంపిక చేసుకునే అవకాశం తక్కువగా ఉండటమే కాకుండా, పండుగలు లేదా రద్దీ సమయాల్లో టికెట్ ధరలు చుక్కలు చూపిస్తున్నాయి. ఇటీవల ఫ్లై బిగ్ వంటి కొన్ని చిన్న సంస్థలు మూతపడటంతో పోటీ మరింత తగ్గింది. ఈ నేపథ్యంలో ప్రభుత్వం కొత్త కంపెనీలకు అనుమతులు ఇవ్వడం వల్ల మార్కెట్లో ఆరోగ్యకరమైన పోటీ పెరుగుతుందని, సామాన్యుడికి తక్కువ ధరకే విమాన ప్రయాణం సాధ్యమవుతుందని నిపుణులు భావిస్తున్నారు.

ఎంట్రీ ఇస్తున్న కొత్త విమానాలివే

కేంద్ర ప్రభుత్వం అనుమతి ఇచ్చిన రెండు కొత్త సంస్థలతో పాటు, ఉత్తరప్రదేశ్‌కు చెందిన శంఖ్ ఎయిర్ కూడా రేసులో ఉంది. శంఖ్ ఎయిర్‌కు ఇప్పటికే ఎన్‌ఓసీ లభించింది. ఈ సంస్థ 2026 నాటికి తన వాణిజ్య కార్యకలాపాలను ప్రారంభించే అవకాశం ఉంది. కొత్తగా అనుమతులు పొందిన AI హిందీ ఎయిర్, ఫ్లై ఎక్స్‌ప్రెస్ సంస్థలు కూడా వేగంగా ఏర్పాట్లు చేసుకుంటున్నాయి. ఈ కొత్త కంపెనీల రాకతో విమాన సర్వీసుల సంఖ్య పెరగడమే కాకుండా, సర్వీస్ క్వాలిటీ కూడా మెరుగుపడుతుందని ఆశిస్తున్నారు.

ప్రయాణికులకు లాభమేంటి?

కొత్త ఎయిర్‌లైన్స్ రావడం వల్ల ప్రధానంగా మూడు ప్రయోజనాలు ఉంటాయి. మొదటిది.. పోటీ పెరగడం వల్ల విమాన టికెట్ల ధరలు తగ్గే అవకాశం ఉంది. రెండోది.. టైర్-2, టైర్-3 నగరాలకు విమాన కనెక్టివిటీ పెరుగుతుంది. మూడోది.. ప్రయాణికులకు మెరుగైన ఆహారం, సీటింగ్, ఇతర సదుపాయాలను అందించడానికి ఈ సంస్థలు ప్రయత్నిస్తాయి. ఎయిర్ హోస్టెస్‌లు, పైలట్లు, గ్రౌండ్ స్టాఫ్ కోసం కొత్తగా వేల సంఖ్యలో ఉద్యోగ అవకాశాలు కూడా లభిస్తాయి. మొత్తం మీద 2026 సంవత్సరం భారత ఆకాశంలో కొత్త రంగులను నింపబోతోంది.