Trump Tariffs : ట్రంప్ టారిఫ్ దెబ్బ.. భారత స్టాక్ మార్కెట్‌లో భారీ పతనం ఖాయమా?
భారత స్టాక్ మార్కెట్‌లో భారీ పతనం ఖాయమా?
Trump Tariffs : అమెరికా అధ్యక్షుడు డొనాల్డ్ ట్రంప్ భారత్‌పై కఠిన వైఖరి అవలంబిస్తున్నారు. బుధవారం రోజున భారత్ నుంచి దిగుమతయ్యే వస్తువులపై అదనంగా 25% టారిఫ్ విధించారు. దీంతో మొత్తం టారిఫ్ 50%కి పెరిగింది. ఈ నిర్ణయం వల్ల భారత స్టాక్ మార్కెట్‌లో కలవరపాటు మొదలైంది. మార్కెట్ ఎలా స్పందించనుంది? ఏ షేర్లు ఎక్కువగా పడిపోవచ్చు? దీనిపై నిపుణులు ఏమంటున్నారంటే..
కొత్త టారిఫ్ ప్రభావం
ట్రంప్ విధించిన కొత్త టారిఫ్ ఆగస్టు 27 నుంచి అమల్లోకి వస్తుంది. ఈ టారిఫ్‌లు ప్రధానంగా భారతదేశం, రష్యా మధ్య జరుగుతున్న వాణిజ్యంపై ట్రంప్ ఆగ్రహానికి ప్రతిస్పందనగా వచ్చాయి. దీని ప్రభావం బుధవారం రాత్రి నుంచే గ్లోబల్ మార్కెట్‌లపై కనిపించింది. గిఫ్ట్ నిఫ్టీ 96.50 పాయింట్లు తగ్గి 24,784.50 వద్ద ముగిసింది. ఇది భారతీయ పెట్టుబడిదారులలో ఆందోళన పెంచుతోంది.
మార్కెట్ పతనం అంచనా
హెచ్‌డిఎఫ్‌సి సెక్యూరిటీస్ ఎండి ధీరజ్ రేలీ ప్రకారం.. గురువారం భారతీయ స్టాక్ మార్కెట్ ఆందోళనతో మొదలవుతుంది. సెన్సెక్స్, నిఫ్టీ 1-2% పడిపోవచ్చని ఆయన అంచనా వేశారు. ఈ పతనంలో ఐటీ కంపెనీల షేర్లపై ఎక్కువ ప్రభావం పడుతుందని ఆయన తెలిపారు. అయితే, ఈ పతనం ఎక్కువ కాలం ఉండదని, పెట్టుబడిదారులు భారీగా అమ్మకాలు చేయరని ఆయన నమ్ముతున్నారు. భారత్-అమెరికా వివాదం త్వరలోనే పరిష్కారం అవుతుందని వారు భావిస్తున్నారని చెప్పారు.
టారిఫ్ ప్రభావం దీర్ఘకాలం ఉంటే?
ఒకవేళ ఈ టారిఫ్‌లు ఎక్కువ కాలం కొనసాగితే, భారత జిడిపి పై ప్రభావం పడుతుందని రేలీ హెచ్చరించారు. జిడిపి 30-40 బేసిస్ పాయింట్ల వరకు తగ్గవచ్చని ఆయన అంచనా వేశారు.
భారత్ కఠిన స్పందన
ట్రంప్ నిర్ణయంపై భారత ప్రభుత్వం కూడా కఠినంగా స్పందించింది. విదేశాంగ మంత్రిత్వ శాఖ ఈ నిర్ణయాన్ని చాలా దురదృష్టకరం అని పేర్కొంది. భారతదేశం తమ జాతీయ ప్రయోజనాలను రక్షించుకోవడానికి అవసరమైన అన్ని చర్యలు తీసుకుంటుందని స్పష్టం చేసింది. రష్యా నుంచి చమురు కొనడం తమ ప్రజల అవసరాల కోసమేనని, ఇది అమెరికాకు అన్యాయం అని పేర్కొంది.
