Indian Rupee : రూపాయికి చుక్కలు.. డాలర్‌తో పోలిస్తే చారిత్రక కనిష్టానికి పడిపోయిన భారత కరెన్సీ

Indian Rupee : అంతర్జాతీయ మార్కెట్లో నెలకొన్న యుద్ధ మేఘాలు భారత కరెన్సీని కోలుకోలేని దెబ్బ కొడుతున్నాయి. మధ్యప్రాచ్యంలో పెరుగుతున్న ఉద్రిక్తతలు, ఆకాశాన్ని తాకుతున్న ముడి చమురు ధరల ప్రభావంతో రూపాయి విలువ పాతాళానికి పడిపోయింది. బుధవారం నాటి ట్రేడింగ్‌లో అమెరికన్ డాలర్‌తో పోలిస్తే రూపాయి విలువ ఎన్నడూ లేనంతగా 92.58 స్థాయికి పడిపోయి సరికొత్త రికార్డును నమోదు చేసింది. ప్రపంచవ్యాప్తంగా డాలర్ బలపడటం, విదేశీ ఇన్వెస్టర్లు భారత మార్కెట్ల నుంచి తమ పెట్టుబడులను వెనక్కి తీసుకోవడం రూపాయి పతనానికి ప్రధాన కారణాలుగా మారుతున్నాయి.

మధ్యప్రాచ్యంలో ఇరాన్, ఇజ్రాయెల్ మధ్య యుద్ధం తీవ్రమవ్వడం భారత ఆర్థిక వ్యవస్థపై నేరుగా ప్రభావం చూపుతోంది. ముడి చమురు ధరలు పెరగడం వల్ల మన దేశంపై దిగుమతుల భారం పెరుగుతోంది. దీనివల్ల విదేశీ మారక ద్రవ్యం ఎక్కువగా ఖర్చవుతుండటంతో రూపాయి విలువ క్షీణిస్తోంది. బుధవారం ఫారెక్స్ మార్కెట్ ప్రారంభంలోనే రూపాయి 92.42 వద్ద బలహీనంగా మొదలై, చివరకు 18 పైసల నష్టంతో 92.58 వద్ద ముగిసింది. రిజర్వ్ బ్యాంక్ ఆఫ్ ఇండియా జోక్యం చేసుకున్నప్పటికీ, 92.50 అనే కీలక స్థాయిని రూపాయి నిలబెట్టుకోలేకపోయింది.

గోల్డ్‌మన్ సాక్స్ షాకింగ్ అంచనాలు

ప్రముఖ ఆర్థిక విశ్లేషణ సంస్థ గోల్డ్‌మన్ సాక్స్ భారత రూపాయి భవిష్యత్తుపై ఆందోళన వ్యక్తం చేసింది. ప్రస్తుతం ఉన్న ఉద్రిక్తతలు ఇలాగే కొనసాగితే, ఈ ఏడాదిలోనే రూపాయి విలువ 95 స్థాయికి చేరుకునే ప్రమాదం ఉందని హెచ్చరించింది. చమురు సంక్షోభం కారణంగా భారతదేశ వృద్ధి రేటును గతంలో అంచనా వేసిన 7 శాతం నుంచి 6.5 శాతానికి తగ్గించింది. అంతేకాకుండా, ద్రవ్యోల్బణం కూడా 30 బేసిస్ పాయింట్ల మేర పెరిగే అవకాశం ఉందని పేర్కొంది. చమురు ధరల పెరుగుదల వల్ల కరెంట్ ఖాతా లోటుకూడా పెరిగే సూచనలు కనిపిస్తున్నాయి.

ఎకానమీపై పడనున్న భారం

ముడి చమురు ధరల మంట నుండి ఆర్థిక వ్యవస్థను కాపాడేందుకు కేంద్ర ప్రభుత్వం ఇప్పటికే చర్యలు చేపట్టింది. అయితే, చమురు దిగుమతుల బిల్లు పెరగడం వల్ల రూపాయి మరింత బలహీనపడటమే కాకుండా దేశీయంగా నిత్యావసర వస్తువుల ధరలు పెరిగే అవకాశం ఉంది. గోల్డ్‌మన్ సాక్స్ చీఫ్ ఎకనమిస్ట్ శాంతను సేన్‌గుప్తా మాట్లాడుతూ.. ప్రస్తుతం ఆర్‌బీఐ వెంటనే కఠిన చర్యలు తీసుకోవాల్సిన అవసరం లేకపోయినా, మార్కెట్లోకి నగదు లభ్యతను పెంచే అవకాశం ఉందని తెలిపారు. వచ్చే ఆర్థిక సంవత్సరం నుంచి బాండ్ల సరఫరా పెరగడం వల్ల మార్కెట్ ఒడిదుడుకులు మరింత పెరిగే ప్రమాదం ఉంది.

ఇన్వెస్టర్ల ఆందోళన.. విదేశీ నిధుల వెనక్కి

గ్లోబల్ మార్కెట్‌లో అస్థిరత నెలకొన్నప్పుడు విదేశీ సంస్థాగత ఇన్వెస్టర్లు సాధారణంగా తమ పెట్టుబడులను భారత్ వంటి వర్ధమాన దేశాల నుంచి వెనక్కి తీసుకుంటారు. ఇప్పుడు అదే జరుగుతోంది. నిరంతరంగా విదేశీ పెట్టుబడులు బయటకు వెళ్లిపోతుండటం వల్ల డాలర్‌కు డిమాండ్ పెరిగి రూపాయి బలహీనపడుతోంది. ఫారెక్స్ ట్రేడర్ల ప్రకారం.. పశ్చిమ ఆసియాలో యుద్ధం ఎంత కాలం కొనసాగుతుంది. చమురు ధరలు ఏ స్థాయికి చేరుతాయి అనే దానిపైనే రూపాయి భవిష్యత్తు ఆధారపడి ఉంటుంది. సామాన్యుడికి ఈ రూపాయి పతనం అంటే విదేశీ ప్రయాణాలు, చదువు, దిగుమతి చేసుకున్న ఎలక్ట్రానిక్ వస్తువుల ధరలు ప్రియమవడమే.