Visa : అమెరికాలో ఉద్యోగం చేయాలని లేదా చదువుకోవాలని కలలు కనే భారతీయులకు ఇది ఒక చేదు వార్త. అమెరికాలో పనిచేస్తున్న భారతీయులకు లభించే హెచ్-1బి వీసాలతో పాటు, వారి కుటుంబ సభ్యులకు, విద్యార్థులకు, అలాగే కంపెనీల్లో బదిలీ అయిన ఉద్యోగులకు ఇచ్చే ముఖ్యమైన వీసాల సంఖ్యలో భారీ తగ్గుదల కనిపించింది. గత మూడేళ్లలో భారత్‌కు ఈ వీసాల జారీలో చాలా నష్టం జరిగిందని ఒక నివేదిక వెల్లడించింది. అయితే, ఇదే సమయంలో చైనా, నేపాల్, వియత్నాం వంటి దేశాలకు మాత్రం ఈ వీసాల జారీ పెరగడం ఆందోళన కలిగిస్తోంది.
ఆందోళన కలిగించే గణాంకాలు
అమెరికా వెళ్లాలనుకునే భారతీయులకు వీసాల జారీలో కనిపిస్తున్న ఈ తగ్గుదల చాలా ఆందోళనకరంగా ఉంది. ముఖ్యంగా, హెచ్-1బి వీసా ఉన్నవారి కుటుంబ సభ్యులకు ఇచ్చే హెచ్4 వీసాలు ఈ ఏడాది మే వరకు కేవలం 46,982 మాత్రమే జారీ అయ్యాయి. ఇది గత ఏడాది (2023) ఇదే సమయానికి జారీ అయిన 71,130 వీసాలతో పోలిస్తే దాదాపు 34% తగ్గుదల. కానీ అదే సమయంలో, మెక్సికోకు ఈ వీసాల సంఖ్య రెట్టింపు కావడం, చైనాకు 10.7% పెరగడం గమనించాల్సిన విషయం.
విద్యార్థులపై ప్రభావం
విద్యార్థులకు ఇచ్చే ఎఫ్‌1 వీసాల పరిస్థితి మరింత దయనీయంగా ఉంది. 2023లో భారత్‌కు దాదాపు 17,800 ఎఫ్‌1 వీసాలు లభించగా, ఇప్పుడు ఆ సంఖ్య 11,484కి పడిపోయింది. అంటే 35% తగ్గుదల. దీనికి భిన్నంగా, చైనాకు 10% పెరుగుదల, వియత్నాంకు 40%కి పైగా, నేపాల్‌కు ఏకంగా 260% కంటే ఎక్కువ పెరుగుదల కనిపించింది. ఆఫ్రికా దేశాలైన జింబాబ్వే, కెన్యా కూడా మూడు అంకెల పెరుగుదలను నమోదు చేశాయి.
కంపెనీ బదిలీ వీసాలు కూడా..
కేవలం విద్యార్థులు, కుటుంబ సభ్యుల వీసాలే కాకుండా, కంపెనీలో బదిలీ అయ్యే ఉద్యోగులకు ఇచ్చే ఎల్‌1 వీసాల్లో కూడా భారత్ 28% తగ్గుదల చూసింది. అలాగే, ఈ వీసాదారుల కుటుంబ సభ్యులకు ఇచ్చే ఎల్‌2 వీసాల్లో కూడా 38% తగ్గుదల కనిపించింది. దీనికి విరుద్ధంగా, చైనాకు ఎల్‌1 వీసాల్లో 64%, ఎల్‌2 వీసాల్లో 43% పెరుగుదల ఉంది. ఇజ్రాయెల్, వియత్నాం, మలేషియా, బ్రెజిల్ వంటి దేశాలకు కూడా ఈ వీసాల్లో మంచి లాభం లభించింది.
దక్షిణ ఆసియాలో భారత్ ఎందుకు వెనకబడిపోయింది?
దక్షిణ ఆసియా దేశాలతో పోల్చి చూసినా కూడా భారత్‌కు ఎక్కువ నష్టం జరిగింది. ఉదాహరణకు, నేపాల్‌కు ఎఫ్‌1 వీసాల్లో 262%, ఎల్‌2 వీసాల్లో 113% భారీ పెరుగుదల కనిపించింది. బంగ్లాదేశ్ హెచ్4 వీసాల్లో 28%, ఎఫ్‌1 వీసాల్లో 5% పెరుగుదలను చూసింది. ఇక పాకిస్తాన్ విషయానికి వస్తే, వారికి ఎఫ్‌1 వీసాలు దాదాపు రెట్టింపు అయ్యాయి. శ్రీలంక పరిస్థితి మిశ్రమంగా ఉంది.
ఈ నివేదిక ప్రకారం, గత రెండేళ్లలో హెచ్1-బి వీసాల సంఖ్య 37% కంటే ఎక్కువగా పడిపోయింది. దీనివల్ల కేవలం ఉద్యోగులపైనే కాకుండా, వారి కుటుంబాలు మరియు విద్యార్థుల భవిష్యత్తుపై కూడా ప్రభావం పడింది. దీనికి తోడు, హెచ్1-బి వీసా కోసం ఏటా 100,000డాలర్ల రుసుము వసూలు చేయాలనే అమెరికా ప్రభుత్వ కొత్త ప్రతిపాదన భారతీయుల ఆశలపై మరింత భారం మోపింది.
