Flex Fuel : పెట్రోల్ టెన్షన్కు చెక్.. భారత్లో ఫ్లెక్స్-ఫ్యూయల్ విప్లవం.. ఇక 85% ఇథనాల్తోనే కార్ల పరుగు
ఇక 85% ఇథనాల్తోనే కార్ల పరుగు
Flex Fuel : ప్రపంచవ్యాప్తంగా సాగుతున్న యుద్ధ భయాలు, అంతర్జాతీయ మార్కెట్లో ఎగిసిపడుతున్న ముడి చమురు ధరలు సామాన్యుడి జేబుకు చిల్లు పెడుతున్నాయి. పెట్రోల్ బంకుకు వెళ్లిన ప్రతిసారీ మీటర్ వైపు చూసి భయపడే రోజులకు చెక్ పెట్టేందుకు కేంద్ర ప్రభుత్వం ఒక విప్లవాత్మక అడుగు వేస్తోంది. విదేశీ చమురుపై మన దేశ ఆధారితాన్ని తగ్గించి, స్వదేశీ ఇంధనాన్ని ప్రోత్సహించే దిశగా ఫ్లెక్స్-ఫ్యూయల్ వాహనాలను భారీ ఎత్తున పట్టాలెక్కించేందుకు రంగం సిద్ధమైంది. ఈ కొత్త వాహనాలు ఏకంగా E85 ఇంధనంతో నడుస్తాయి. అంటే ఇందులో 85 శాతం ఇథనాల్, కేవలం 15 శాతం మాత్రమే పెట్రోల్ ఉంటుంది.
గ్లోబల్ టెన్షన్.. లోకల్ సొల్యూషన్
ప్రస్తుతం పశ్చిమ ఆసియాలో నెలకొన్న యుద్ధ వాతావరణం వల్ల ముడి చమురు ధరలు బ్యారెల్కు 100 డాలర్ల పైనే పలుకుతున్నాయి. హార్ముజ్ జలసంధి వద్ద జరుగుతున్న దాడుల వల్ల చమురు సరఫరాకు తీవ్ర ఆటంకాలు ఏర్పడుతున్నాయి. మన దేశంలో అత్యధిక పెట్రోల్ వినియోగం రవాణా రంగంలోనే ఉంటుంది కాబట్టి, అంతర్జాతీయంగా ఏ చిన్న గొడవ జరిగినా అది మన వంటింటి బడ్జెట్పై ప్రభావం చూపుతోంది. ఈ అనిశ్చితిని శాశ్వతంగా తొలగించేందుకే ప్రభుత్వం E85 ఫార్ములాను ముందుకు తెస్తోంది.
ఏమిటీ E85 ఫార్ములా?
గతంలో ప్రభుత్వం E20 (20% ఇథనాల్) నిబంధనను తెచ్చినప్పుడు కొన్ని పాత వాహనాల ఇంజన్ పనితీరు, మైలేజీపై ఫిర్యాదులు వచ్చాయి. వాటన్నింటినీ దృష్టిలో ఉంచుకుని ఇప్పుడు నేరుగా ఫ్లెక్స్-ఫ్యూయల్ వాహనాల (FFVs) పై దృష్టి సారించారు. ఈ వాహనాల ఇంజన్లు ప్రత్యేకంగా డిజైన్ చేయబడతాయి. ఇవి 85 శాతం వరకు ఇథనాల్ను వాడుకున్నా సరే.. ఇంజన్కు ఎలాంటి హాని కలగకుండా, అద్భుతమైన పర్ఫార్మెన్స్ ఇచ్చేలా వీటిని తయారు చేస్తారు. దీనివల్ల పెట్రోల్ ఖర్చు భారీగా తగ్గడమే కాకుండా పర్యావరణానికి కూడా మేలు జరుగుతుంది.
రోడ్లపైకి ఎప్పుడు వస్తాయి?
ఈ బృహత్తర ప్రాజెక్టును వేగవంతం చేసేందుకు పెట్రోలియం మంత్రిత్వ శాఖ తాజాగా ఒక ఉన్నత స్థాయి సమావేశాన్ని నిర్వహించింది. చమురు కంపెనీలు (OMCs), ఆటోమొబైల్ తయారీదారులు (SIAM), ప్రభుత్వ ప్రతినిధులతో కూడిన వర్కింగ్ గ్రూప్ ఈరోజే పూర్తిస్థాయి రోడ్మ్యాప్ను సిద్ధం చేసింది. ఈ సిఫార్సులు ఆమోదం పొందితే, త్వరలోనే భారతీయ రోడ్లపై ఫ్లెక్స్-ఫ్యూయల్ కార్లు, బైకులు సందడి చేయనున్నాయి. ఇది కేవలం పెట్రోల్ ప్రత్యామ్నాయం మాత్రమే కాదు, భారత ఆర్థిక వ్యవస్థను గ్లోబల్ ఆయిల్ షాకుల నుంచి రక్షించే ఒక పటిష్టమైన కవచం.
