India Forex Reserves: భారత విదేశీ మారక నిల్వల్లో భారీ జంప్.. 719 బిలియన్ డాలర్లకు చేరిన ఫారెక్స్ రిజర్వ్

India Forex Reserves: భారతదేశ ఆర్థిక వ్యవస్థకు వెన్నెముకగా నిలిచే విదేశీ మారక నిల్వలు అనగా ఫారెక్స్ రిజర్వ్‌లో మళ్లీ వృద్ధి కనబడింది. రిజర్వ్ బ్యాంక్ ఆఫ్ ఇండియా విడుదల చేసిన తాజా గణాంకాల ప్రకారం.. నవంబర్ 6తో ముగిసిన వారంలో దేశ ఫారెక్స్ రిజర్వ్ ఏకంగా 2.49 బిలియన్ డాలర్లు ఎగబాకింది. దీంతో మొత్తం నిల్వలు 719.547 బిలియన్ డాలర్ల స్థాయికి చేరుకున్నాయి. అంతకుముందు వారంలో దాదాపు 2.69 బిలియన్ డాలర్ల మేర క్షీణత కనిపించగా, తాజా పరిణామాలు ఆందోళనలను కొంతవరకు తగ్గించాయి.

బంగారపు నిల్వలలో దూకుడు

ఈసారి ఫారెక్స్ రిజర్వ్ పుంజుకోవడానికి ప్రధాన కారణం గోల్డ్ రిజర్వ్‌లో వచ్చిన భారీ జంప్ అని చెప్పవచ్చు. ఆర్బీఐ వెల్లడించిన సమాచారం ప్రకారం, కేవలం ఒక్క వారంలోనే భారత బంగారం నిల్వలు 2.205 బిలియన్ డాలర్లు పెరిగి 104.796 బిలియన్ డాలర్లకు తాకాయి. దీనితో పాటు ఫారెక్స్ రిజర్వ్‌లో సింహభాగం ఉండే ఫారెన్ కరెన్సీ అసెట్స్ సైతం 232 మిలియన్ డాలర్లు పుంజుకుని 591.350 బిలియన్ డాలర్ల వద్ద నిలిచాయి. వివిధ విదేశీ కరెన్సీల మారకం విలువల్లో జరిగే హెచ్చుతగ్గులు ఈ నిల్వలపై ప్రభావం చూపుతుంటాయి.

ఐఎంఎఫ్ నిల్వల్లోనూ సానుకూలత

అంతర్జాతీయ ద్రవ్య నిధి(IMF) ద్వారా దేశానికి లభించే స్పెషల్ డ్రాయింగ్ రైట్స్ అనగా ఎస్డీఆర్ విలువ 52 మిలియన్ డాలర్లు పెరిగి 18.610 బిలియన్ డాలర్లకు చేరింది. అంతేకాకుండా అంతర్జాతీయ సంస్థలో భారతదేశ రిజర్వ్ పొజిషన్ కూడా 1 మిలియన్ డాలర్లు పెరిగి 4.791 బిలియన్ డాలర్ల మార్కును తాకింది. ఈ అంశాలన్నీ కలిసి దేశ ఆర్థిక బలాన్ని మరింత పటిష్టం చేశాయి.

గత గరిష్ట స్థాయిలు - ప్రస్తుత పరిస్థితి

గతంలో సెప్టెంబర్ 4న ముగిసిన వారంలో భారత ఫారెక్స్ రిజర్వ్ అత్యధికంగా 785.706 బిలియన్ డాలర్ల ఆల్ టైమ్ గరిష్ట స్థాయిని తాకింది. విదేశీ ప్రవాస భారతీయుల డిపాజిట్ల నిమిత్తం బ్యాంకులు ప్రత్యేక స్వైప్ సౌకర్యం కింద భారీగా నిధులు సమకూర్చడం వల్ల ఆ సమయంలో పెద్ద ఎత్తున వృద్ధి నమోదయింది. ఆ తర్వాత వరుసగా తగ్గుముఖం పట్టిన నిల్వలు, తాజా వారంలో నమోదైన వృద్ధితో మళ్లీ కోలుకునే సంకేతాలు ఇస్తున్నాయి.