GST Collection : జీఎస్టీ చరిత్రలో సరికొత్త అధ్యాయం.. ఏప్రిల్ నెలలో రూ.2.43 లక్షల కోట్ల వసూళ్లు.. చరిత్రలోనే గరిష్టం

GST Collection : ప్రపంచవ్యాప్తంగా యుద్ధ మేఘాలు కమ్ముకుని, ఆర్థిక అనిశ్చితి కొనసాగుతున్నా.. భారత ఆర్థిక వ్యవస్థ మాత్రం పరుగు అందుకుంది. కొత్త ఆర్థిక సంవత్సరం ప్రారంభంలోనే కేంద్ర ప్రభుత్వ ఖజానాకు కాసుల పంట పండింది. ఏప్రిల్ 2026 నెలలో జిఎస్‌టి వసూళ్లు ఆల్‌టైమ్ రికార్డును సృష్టించాయి. గతంలో ఎన్నడూ లేని విధంగా అత్యధిక వసూళ్లు నమోదు కావడంతో భారత ఆర్థిక బలం మరోసారి ప్రపంచానికి చాటిచెప్పినట్లయింది.

చరిత్ర సృష్టించిన ఏప్రిల్ వసూళ్లు

మే 1, 2026న విడుదలైన ప్రభుత్వ గణాంకాల ప్రకారం.. ఏప్రిల్ నెలలో మొత్తం జిఎస్‌టి వసూళ్లు రూ.2.43 లక్షల కోట్లకు చేరుకున్నాయి. గత ఏడాది ఏప్రిల్ 2025లో ఈ వసూళ్లు రూ.2.23 లక్షల కోట్లుగా ఉండేవి. అంటే ఏడాది కాలంలోనే దాదాపు 8.7 శాతం వృద్ధి నమోదైంది. పశ్చిమ ఆసియాలో ఇరాన్-ఇజ్రాయెల్ మధ్య ఉద్రిక్తతలు ఉన్నప్పటికీ, ముడి చమురు ధరలు బ్యారెల్కు 126 డాలర్లకు పెరిగినప్పటికీ, భారతీయ వ్యాపారాలు మాత్రం అద్భుతమైన పనితీరును కనబరిచాయి.

దేశీయ, దిగుమతి ఆదాయం

వసూళ్ల వివరాలను లోతుగా పరిశీలిస్తే, దేశీయ లావాదేవీల ద్వారా వచ్చిన ఆదాయం 4.3 శాతం పెరిగి రూ.1.85 లక్షల కోట్లుగా నమోదైంది. అయితే, విదేశాల నుంచి వస్తువుల దిగుమతులపై వచ్చే జిఎస్‌టి ఆదాయం ఏకంగా 25.8 శాతం పెరిగి రూ.57,580 కోట్లకు చేరుకోవడం విశేషం. దీనిని బట్టి దేశీయంగా కంటే అంతర్జాతీయ వాణిజ్యం ద్వారానే ఆదాయం పెరిగిందని అర్థమవుతోంది. నెట్ జిఎస్‌టి రెవెన్యూ (రీఫండ్స్ పోను) కూడా రూ.2.11 లక్షల కోట్లుగా ఉంది, ఇది గత ఏడాదితో పోలిస్తే 7.3 శాతం ఎక్కువ.

రీఫండ్స్, ఎగుమతుల పరిస్థితి

ఈ ఏప్రిల్ నెలలో ప్రభుత్వం రీఫండ్ల రూపంలో కూడా భారీగానే చెల్లించింది. మొత్తం రీఫండ్స్ 19.3 శాతం పెరిగి రూ.31,793 కోట్లకు చేరుకున్నాయి. ఇందులో దేశీయ రీఫండ్లు 54.6 శాతం పెరగడం గమనార్హం. అయితే, ఎగుమతులకు సంబంధించిన రీఫండ్లు మాత్రం 14 శాతం తగ్గాయి. ఇది ఎగుమతుల రంగంలో కొంత నెమ్మదిని సూచిస్తున్నప్పటికీ, మొత్తం వసూళ్లపై దాని ప్రభావం తక్కువగానే ఉంది. ఈ రికార్డు వసూళ్లు దేశ ఆర్థిక పరిస్థితికి గట్టి భరోసాను ఇస్తున్నాయి.

ఏప్రిల్ నెల వసూళ్లు సాధారణంగా మార్చి నెలలో జరిగిన వ్యాపార కార్యకలాపాలకు ప్రతిబింబం. మార్చి నెలాఖరు కావడంతో వ్యాపారులు తమ పన్ను బాధ్యతలను పూర్తి స్థాయిలో చెల్లించడం వల్ల ఏప్రిల్‌లో ఎప్పుడూ వసూళ్లు ఎక్కువగా ఉంటాయి. కానీ ఈసారి రూ.2.43 లక్షల కోట్లకు చేరడం అనేది భారత ఆర్థిక వ్యవస్థ ఎదుగుతున్న వేగాన్ని సూచిస్తోంది. అంతర్జాతీయంగా ఎకానమీ మందగమనంలో ఉన్నా, భారతీయ వినియోగం, వ్యాపార గమనంలో ఏమాత్రం తగ్గుదల లేదని ఈ గణాంకాలు స్పష్టం చేస్తున్నాయి.