Airfare Hike: విమాన ప్రయాణికులకు చేదు వార్త.. త్వరలోనే పెరగనున్న ఇండిగో ఫ్లైట్ టికెట్ ధరలు

Airfare Hike: విమాన ప్రయాణికులకు త్వరలోనే చేదు వార్త అందే అవకాశం ఉంది. విమాన ఇంధన ధరలు విపరీతంగా పెరిగిపోతుండటంతో దేశంలోనే అతిపెద్ద విమానయాన సంస్థ ఇండిగో టికెట్ ధరలను పెంచేందుకు సిద్ధమవుతోంది. పెరుగుతున్న వ్యయాలను తట్టుకోవడానికి విమాన ఛార్జీలు పెంచడం తప్ప తమకు మరో మార్గం లేదని సంస్థ యాజమాన్యం సంకేతాలు ఇచ్చింది. నిలకడగా రెవెన్యూ పెరుగుతున్నప్పటికీ, ఇంధన భారం కారణంగా వరుసగా మూడో త్రైమాసికంలో కూడా ఇండిగో నష్టాలను మూటగట్టుకోవాల్సి వచ్చింది.

పెరుగుతున్న నష్టాలు.. ఫ్యూయల్ భారం

ఇండిగో మాతృ సంస్థ ఇంటర్‌గ్లోబ్ ఏవియేషన్ జూలై-సెప్టెంబర్ త్రైమాసికంలో ఏకంగా రూ.1,879 కోట్ల కన్సాలిడేటెడ్ నికర నష్టాన్ని నమోదు చేసింది. గత ఏడాది ఇదే సమయంలో ఉన్న రూ.2,582 కోట్ల నష్టంతో పోలిస్తే ఇది కొంత మెరుగ్గా ఉన్నప్పటికీ, కంపెనీకి మోయలేని భారంగా మారింది. ఈ త్రైమాసికంలో కంపెనీ మొత్తం ఖర్చులు 19 శాతం పెరిగి రూ.26,188 కోట్లకు చేరాయి. ఇందులో ఒక్క ఫ్యూయల్ ఖర్చే ఏకంగా 67 శాతం పెరిగి దాదాపు 1 బిలియన్ డాలర్లకు (రూ.8,300 కోట్లకు పైగా) చేరుకోవడం విమానయాన రంగాన్ని తీవ్ర ఆందోళనకు గురిచేస్తోంది.

పెరిగిన ఆదాయం.. తగ్గని నష్టాల భయం

కంపెనీ ఆపరేషన్ల ద్వారా వచ్చిన రెవెన్యూ ఏడాది ప్రాతిపదికన 25.9 శాతం పెరిగి రూ.23,364 కోట్లకు చేరుకుంది. అలానే పన్నులు, వడ్డీలకు ముందు వచ్చే సంపాదన (EBITDA) 229 శాతం పెరిగి రూ.1,907 కోట్లుగా నమోదైంది. అయితే ఈ రికార్డు స్థాయి ఆదాయం పెరుగుతున్న ఇంధన ఖర్చులను భర్తీ చేయడానికి సరిపోలేదు. విమాన ఇంధన రీఫైనింగ్ చార్జీలు చారిత్రాత్మక సగటు 22 శాతం కంటే ఎక్కువగా ఉండి, ప్రస్తుతం 65 శాతానికి చేరడమే ఈ అధిక ధరలకు ప్రధాన కారణమని ఇండిగో సీఈఓ విల్లీ వాల్ష్ వెల్లడించారు.

తగ్గిన ప్రయాణికుల సంఖ్య.. పెరిగిన టికెట్ రాబడి

ఈ త్రైమాసికంలో ఇండిగో విమానాల్లో దాదాపు 2.75 కోట్ల మంది ప్రయాణించారు. గత ఏడాదితో పోలిస్తే ప్రయాణికుల సంఖ్య 4.7 శాతం తగ్గింది. ప్రయాణికుల రద్దీ తగ్గినా, ప్యాసింజర్ ఈల్డ్ (ఒక్కో ప్రయాణికుడి నుంచి వచ్చే సగటు రాబడి) 34.3 శాతం పెరిగి రూ.6.30కి చేరడం వల్ల కంపెనీ ఆదాయానికి కొంత ఊరట లభించింది. విదేశీ మారకద్రవ్యం ద్వారా వచ్చే నష్టాలు రూ.2,892 కోట్ల నుంచి రూ.1,333 కోట్లకు తగ్గడం వల్ల బ్లూమ్‌బెర్గ్ అంచనాల కంటే కాస్త తక్కువ నష్టాలు నమోదయ్యాయి.

పండుగ సీజన్‌పై ఆశలు

సెప్టెంబర్ నెలలో డిమాండ్ చాలా తక్కువగా ఉన్నప్పటికీ, రాబోయే దీపావళి, క్రిస్మస్ పండుగల సీజన్‌లో విమాన ప్రయాణాలకు మంచి ఆదరణ ఉంటుందని ఇండిగో ఆశిస్తోంది. సెప్టెంబర్ ఆఖరు నాటికి కంపెనీపై రూ.87,303 కోట్ల అప్పులు ఉన్నప్పటికీ, రూ.52,685 కోట్ల నగదు నిల్వలు ఉన్నాయి. ఈ తాత్కాలిక నష్టాలు ఉన్నప్పటికీ, తమ అంతర్జాతీయ విస్తరణ ప్రణాళికలను ఆపేదే లేదని కంపెనీ స్పష్టం చేసింది. 2028 నాటికి ఎయిర్‌బస్ A350 వైడ్-బాడీ విమానాలను తమ నౌకాదళంలో చేర్చుకునే పనులను వేగవంతం చేస్తోంది.