Mutual Funds : పెట్టుబడిలో డైవర్సిఫికేషన్ అంటే ఏంటి? మ్యూచువల్ ఫండ్లలో ఇలా చేస్తేనే లాభం
మ్యూచువల్ ఫండ్లలో ఇలా చేస్తేనే లాభం
Mutual Funds : డబ్బు పెట్టుబడి పెట్టడంలో కొన్ని ప్రాథమిక విషయాలు ఉంటాయి. ఎక్కువ కాలం పెట్టుబడి పెట్టాలి, ఇంకా ఎక్కువ డబ్బు పెట్టాలి. కానీ, ఈ రెండు విషయాలు మాత్రమే తెలిసి పెట్టుబడికి వెళితే, పెద్ద మార్కెట్‌లో దారి తప్పిపోవచ్చు. మీరు చాలా సంవత్సరాలు పెట్టుబడి పెట్టినా, లేదా వరుసగా పెట్టుబడులు పెడుతున్నా, మీకు మంచి రాబడి వస్తుందన్న గ్యారెంటీ లేదు. ఎల్ఐసీ హౌసింగ్ ఫైనాన్స్ సంస్థ మాజీ సీవోవో అశ్వని ఘాయ్ ఈ విషయంపై సోషల్ మీడియాలో స్పందించారు. ఒక ఉదాహరణతో పెట్టుబడిలో ఉన్న సమస్యను వివరించారు.
ఆయనకు తెలిసిన ఒక ఇన్వెస్టర్ ఏకంగా 16 మ్యూచువల్ ఫండ్లలో పెట్టుబడి పెట్టారట. వేర్వేరు ఫండ్లలో పెట్టడం వల్ల పెట్టుబడి విస్తృతంగా పెరుగుతుందని ఆయన భావించారు. కానీ, ఆ ఎక్కువ మ్యూచువల్ ఫండ్‌లు లార్జ్ క్యాప్ సెగ్మెంట్‌లో ఉన్నవే. అంటే, అక్కడ పెట్టుబడి విస్తృతంగా పెరగలేదనే లేదనే చెప్పాలి. ఎలాంటి పరిశీలన చేయకుండానే ఆయన ఈ 16 మ్యూచువల్ ఫండ్లలో పెట్టుబడి పెట్టారని అశ్వని ఘాయ్ అన్నారు.
మీ పెట్టుబడి షేర్లు, బంగారం, డెట్, FD, రియల్ ఎస్టేట్ వంటి వాటిలో విస్తరించి ఉండాలి. ఇక్కడ షేర్ల విషయానికి వస్తే, అక్కడ కూడా పెట్టుబడిని విస్తరించాలి. అంటే, లార్జ్ క్యాప్, స్మాల్ క్యాప్, మిడ్ క్యాప్ షేర్లలో పెట్టుబడి పెట్టాలి. ఇందుకోసం, ఆయా ఇండెక్స్ ఫండ్లను ఎంచుకోవచ్చు. హైబ్రిడ్ ఫండ్లను కూడా ఎంచుకోవచ్చు. ఇండెక్స్‌లలో పెట్టుబడి పెట్టడానికి మ్యూచువల్ ఫండ్లకు బదులుగా ETF (Exchange Traded Funds) లను కూడా ఎంచుకోవచ్చు. బంగారం, వెండి వంటి వస్తువులలో ETF ల ద్వారా పెట్టుబడి పెట్టవచ్చు. డిజిటల్ ప్లాట్‌ఫామ్‌లలో బంగారంపై పెట్టుబడి పెట్టవచ్చు.
కార్పొరేట్ బాండ్లు, గవర్నమెంట్ బాండ్లలో డబ్బు ఇన్వెస్ట్ చేసే డెట్ ఫండ్లలో పెట్టుబడి పెట్టవచ్చు. రియల్ ఎస్టేట్‌కు సంబంధించిన REIT(Real Estate Investment Trusts)లలో పెట్టుబడి పెట్టవచ్చు. పెట్టుబడి ఎక్కువ కాలం కొనసాగాలంటే, మీ ఇతర జీవిత అవసరాలను తీర్చడానికి బ్యాకప్ మనీ ఉండాలి. ఇందుకోసం ఎమర్జెన్సీ ఫండ్‌ను ఏర్పాటు చేసుకోవాలి. మీ అవసరాలకు తగినంత డబ్బును అందులో ఉంచవచ్చు. మీరు ఫిక్స్ డ్ డిపాజిట్ రూపంలో, ఆర్డీ రూపంలో ఎమర్జెన్సీ ఫండ్‌ను ఏర్పాటు చేసుకోవచ్చు. లేదా సేవింగ్స్ అకౌంట్‌లో కొంత డబ్బును అలాగే ఉంచినా సమస్య లేదు. ముఖ్యంగా, మీరు దీర్ఘకాలికంగా చేసిన పెట్టుబడిని ఒకటి లేదా రెండు సంవత్సరాలలో అమ్మే పరిస్థితి రాకుండా జాగ్రత్తపడాలి.
