Hormuz Strait: భారత్‌కు ఇరాన్ బిగ్ రిలీఫ్.. స్ట్రెయిట్ ఆఫ్ హోర్ముజ్ నుంచి భారత నౌకలకు వెసులు బాటు
భారత నౌకలకు వెసులు బాటు
Hormuz Strait: పశ్చిమాసియాలో తీవ్ర ఉద్రిక్తతలు కొనసాగుతున్న తరుణంలో ఇరాన్ ప్రభుత్వం భారత్‌కు భారీ ఉపశమనం కలిగించే కీలక ప్రకటన చేసింది. వ్యూహాత్మకంగా ఎంతో ప్రాధాన్యత ఉన్న హోర్ముజ్ జలసంధి ద్వారా భారత వాణిజ్య నౌకల రాకపోకలపై ఉన్న ఆంక్షలను ఎత్తివేస్తున్నట్లు ప్రకటించింది. ఇటీవల ఈ జలసంధి మార్గంలో నౌకలపై జరిగిన దాడుల్లో భారతీయ నావికులు ప్రాణాలు కోల్పోతున్న నేపథ్యంలో ఇరాన్ ఈ నిర్ణయం తీసుకుంది. భారత్‌తో పాటు చైనా, ఇరాక్, ఖతార్ దేశాల నౌకలకు కూడా ఈ మార్గం గుండా వెళ్లేందుకు ప్రత్యేక మినహాయింపు ఇచ్చారు.
నాలుగు దేశాలకు ప్రత్యేక సడలింపుల వెనుక రహస్యం
ఇరాన్ పార్లమెంటరీ జాతీయ భద్రత, విదేశాంగ విధాన కమిటీ వైస్ ఛైర్మన్ అమీర్ హయాత్ మొగాదం ఓ ప్రముఖ మీడియా ఇంటర్వ్యూలో ఈ వివరాలను అధికారికంగా వెల్లడించారు. భారత్, చైనా, ఇరాక్, ఖతార్ దేశాల వాణిజ్య నౌకలు హోర్ముజ్ జలసంధి గుండా ఎలాంటి ఆటంకాలు లేకుండా ప్రయాణించవచ్చని స్పష్టం చేశారు. పరస్పర ప్రయోజనాలు, దౌత్య సంబంధాలను దృష్టిలో ఉంచుకునే ఈ నిర్ణయం తీసుకున్నట్లు చెప్పారు. ముఖ్యంగా భారత్ నుంచి అవసరమైన మందుల దిగుమతిని సులభతరం చేయడానికి, చైనా నుంచి రాజకీయ మద్దతు పొందడానికి ఈ మినహాయింపులు ఇస్తున్నట్లు ఇరాన్ వెల్లడించింది.
ప్రపంచ ఇంధన రవాణాలో హోర్ముజ్ ప్రాముఖ్యత
పర్షియన్ గల్ఫ్ ప్రాంతాన్ని ఒమన్ గల్ఫ్‌తో అనుసంధానించే హోర్ముజ్ జలసంధి ప్రపంచ వ్యాప్తంగా అత్యంత కీలకమైన సముద్ర మార్గంగా ఉంది. సాధారణ రోజుల్లో ప్రపంచ వినియోగానికి కావలసిన మొత్తం ఇంధన రవాణాలో దాదాపు 20 శాతం కేవలం ఈ ఇరుకైన జలసంధి గుండానే జరుగుతుంది. అయితే ఈ ఏడాది ఫిబ్రవరి ఆఖరులో అమెరికా, ఇజ్రాయెల్ దళాలు ఇరాన్‌పై దాడులు చేయడంతో, ఇరాన్ కూడా తీవ్రస్థాయిలో తిప్పికొట్టింది. ఆ తదుపరి ఇరాన్ ఈ మార్గాన్ని మూసివేసేందుకు ప్రయత్నించగా, అమెరికా కూడా ఇరాన్ రేవులపై దిగ్బంధం విధించడంతో ఈ మార్గంలో యుద్ధ వాతావరణం నెలకొంది.
భారతీయ నావికుల భద్రతపై విపరీతమైన ఆందోళన
ఫిబ్రవరి నెలలో రగిలిన ఈ సైనిక పోరాటం కారణంగా సముద్ర మార్గంలో రాకపోకలు సాగిస్తున్న వాణిజ్య నౌకలపై వరుస దాడులు జరిగాయి. ఈ ఘర్షణల వల్ల ఇప్పటివరకు దాదాపు 15 మంది భారతీయ నావికులు తమ ప్రాణాలను కోల్పోవడం కలకలం రేపింది. ఇటీవల ఒమన్ సమీపంలో ‘ఎంఎస్వి అల్ జుసూఫీ’ అనే వాణిజ్య నౌకపై జరిగిన దాడిలో కూడా ఒక భారతీయ నావికుడు మరణించాడు. ఈ వరుస అవాంఛనీయ సంఘటనలు భారత విదేశాంగ శాఖను తీవ్ర ఆందోళనకు గురిచేసాయి.
శాంతియుత పరిష్కారం కోరుతున్న భారత ప్రభుత్వం
సముద్ర మార్గాల్లో నిరపరాధులైన పౌరులు, వాణిజ్య నౌకలపై జరుగుతున్న వరుస దాడులపై భారత ప్రభుత్వం తీవ్ర ఆందోళన వ్యక్తం చేసింది. అంతర్జాతీయ జలమార్గాలలో నౌకల స్వేచ్ఛా ప్రయాణానికి ఎలాంటి అడ్డంకులు ఉండకూడదని భారత్ బలంగా కోరుతోంది. దౌత్యపరమైన సంప్రదింపులు, చర్చల ద్వారా మాత్రమే పశ్చిమాసియా సంక్షోభానికి శాశ్వత పరిష్కారం లభిస్తుందని నొక్కి చెప్పింది. తాజాగా ఇరాన్ సడలింపులు ఇవ్వడం వల్ల భారతీయ నౌకల ప్రయాణం సురక్షితంగా మారడమే కాకుండా, సరుకుల రవాణా వేగవంతం కానుంది.
