Tensions vs Trade : భారత్-అమెరికా మధ్య మొదలైన ట్రేడ్ టాక్..టారిఫ్ సెగలు తగ్గేనా?

Tensions vs Trade : భారత విదేశాంగ మంత్రి ఎస్. జైశంకర్, అమెరికా విదేశాంగ మంత్రి మార్కో రూబియో మధ్య జనవరి 13న జరిగిన ఫోన్ సంభాషణ ప్రాధాన్యత సంతరించుకుంది. అమెరికాలో కొత్త రాయబారిగా సెర్గియో గోర్ బాధ్యతలు చేపట్టిన వెంటనే ఈ చర్చలు జరగడం విశేషం. టారిఫ్‌లు, ఇరాన్‌తో వాణిజ్యం వంటి క్లిష్టమైన అంశాలపై బేధాభిప్రాయాలు ఉన్నప్పటికీ, చర్చల ద్వారానైనా సమస్యలను పరిష్కరించుకోవాలని ఇరు దేశాలు నిర్ణయించాయి. 2030 నాటికి ద్వైపాక్షిక వాణిజ్యాన్ని 500 బిలియన్ డాలర్లకు చేర్చాలన్న లక్ష్యంతో భారత్ అడుగులు వేస్తోంది.

అమెరికా నేతృత్వంలోని ప్యాక్స్ సిలికా అనే ప్రతిష్టాత్మక చొరవలో చేరాల్సిందిగా భారత్‌కు ఆహ్వానం అందనుంది. ఆర్టిఫిషియల్ ఇంటెలిజెన్స్, సెమీకండక్టర్లు, ఆధునిక నిర్మాణ సాంకేతికత రంగాల్లో సరఫరా వ్యవస్థను పటిష్టం చేయడమే ఈ ప్రాజెక్ట్ ప్రధాన ఉద్దేశ్యం. చైనాపై ఆధారపడటం తగ్గించి, నమ్మకమైన దేశాలతో కలిసి సాంకేతిక రక్షణ కవచాన్ని నిర్మించాలని అమెరికా భావిస్తోంది. దీనివల్ల భారత్‌కు హైటెక్ రంగంలో భారీగా పెట్టుబడులు వచ్చే అవకాశం ఉంది.

అమెరికా అధ్యక్షుడు డొనాల్డ్ ట్రంప్ తీసుకున్న నిర్ణయాలు భారత్‌కు కొంత ఇబ్బందికరంగా మారాయి. ఇరాన్‌తో వాణిజ్యం కొనసాగించే దేశాలపై 25 శాతం అదనపు పన్ను విధిస్తామని ట్రంప్ ప్రకటించారు. ఇది భారత పెట్రోలియం అవసరాలపై ప్రభావం చూపే అవకాశం ఉంది. అలాగే రష్యా నుంచి చమురు కొనుగోలు చేయడంపై కూడా అమెరికా అసహనం వ్యక్తం చేస్తోంది. భారతీయ వస్తువులపై సుమారు 50 శాతం వరకు టారిఫ్‌లు విధించడంతో వాణిజ్యపరంగా కొంత ఉద్రిక్తత నెలకొంది. అయితే అమెరికా నుంచి రక్షణ, ఇంధన పరికరాలను అధికంగా కొనుగోలు చేయడం ద్వారా వాణిజ్య లోటును తగ్గించాలని భారత్ యోచిస్తోంది.

వాణిజ్య ఒప్పందానికి అతిపెద్ద అడ్డంకి వ్యవసాయ, డైరీ రంగాలు. తమ దేశ పాల ఉత్పత్తులు, వ్యవసాయ వస్తువులకు భారత మార్కెట్లను పూర్తిగా తెరవాలని అమెరికా డిమాండ్ చేస్తోంది. అయితే కోట్లాది మంది భారతీయ రైతుల ప్రయోజనాలను దృష్టిలో ఉంచుకుని భారత్ ఈ విషయంలో ఆచితూచి వ్యవహరిస్తోంది. ఎన్ని విభేదాలు ఉన్నా, ఇండో-పసిఫిక్ ప్రాంతంలో శాంతి, భద్రతల విషయంలో ఇరు దేశాలూ ఒకే మాటపై ఉన్నాయి. మరి రాబోయే రోజుల్లో నేరుగా చర్చలు జరిగినప్పుడు ఈ టారిఫ్ సెగలు తగ్గుతాయో లేదో చూడాలి.