JioStar : ఇక నుంచి సరికొత్త లీగ్ హంగామా.. 68 మ్యాచ్ల ప్రసార హక్కులు దక్కించుకున్న జియోస్టార్
దక్కించుకున్న జియోస్టార్
JioStar : క్రికెట్ అభిమానులకు సరికొత్త శుభవార్త అందింది. ఇంగ్లాండ్ వేదికగా జరిగే అత్యంత ఆకర్షణీయమైన క్రికెట్ టోర్నీ ది హండ్రెడ్ 2026 ప్రసార హక్కులను ప్రముఖ మీడియా దిగ్గజం జియోస్టార్ దక్కించుకుంది. భారత మార్కెట్లో టీవీ, డిజిటల్ ప్రసారాల ఎక్స్క్లూజివ్ హక్కులను సొంతం చేసుకున్నట్లు మంగళవారం అధికారికంగా ప్రకటించింది. గతంలో ఈ హక్కులు సోనీ పిక్చర్స్ నెట్వర్క్ వద్ద ఉండగా, ఈ సీజన్ నుంచి పురుషుల, మహిళల రెండింటి హక్కులను జియోస్టార్ దక్కించుకోవడం విశేషం.
జియోహాట్స్టార్, స్టార్ స్పోర్ట్స్లో లైవ్ స్ట్రీమింగ్
జియోస్టార్ ఒప్పందంతో భారత్లోని క్రికెట్ ప్రియులు ఈ టోర్నీని చాలా సులభంగా వీక్షించవచ్చు. డిజిటల్ ప్లాట్ఫామ్పై మొబైల్, స్మార్ట్ టీవీ, ఇతర డివైజ్లలో జియోహాట్స్టార్ యాప్ ద్వారా అన్ని మ్యాచ్లు లైవ్ స్ట్రీమింగ్ కానున్నాయి. ఇక టీవీ వీక్షకుల కోసం స్టార్ స్పోర్ట్స్ నెట్వర్క్ ఛానళ్లలో ప్రత్యక్ష ప్రసారాలు చేయనున్నారు.
జియోస్టార్ స్పోర్ట్స్ పోర్ట్ఫోలియోకు భారీ బలం
జియోస్టార్ ఇప్పటికే ఐపీఎల్, ఐసీసీ టోర్నమెంట్లు, ఫార్ములా వన్, యూరోపియన్ ఫుట్బాల్ లీగ్స్ ప్రసార హక్కులను కలిగి ఉంది. ఇప్పుడు ది హండ్రెడ్ కూడా వచ్చి చేరడంతో కంపెనీ స్పోర్ట్స్ పోర్ట్ఫోలియో మరింత బలోపేతమైంది. ఈ లీగ్లో ప్రపంచ స్థాయి దిగ్గజాలతో పాటు ప్రముఖ మహిళా క్రికెటర్లు భాగస్వామ్యం కావడం వల్ల భారతీయ వీక్షకుల ఆదరణ లభిస్తుందని జియోస్టార్ ప్రతినిధి ప్రశాంత్ ఖన్నా ధీమా వ్యక్తం చేశారు.
జూలై 21 నుంచి షెడ్యూల్.. 68 మ్యాచ్ల థ్రిల్
ఇంగ్లాండ్ అండ్ వేల్స్ క్రికెట్ బోర్డ్ నిర్వహిస్తున్న ఈ టోర్నీ 6వ సీజన్ జూలై 21 నుంచి అధికారికంగా ప్రారంభమవుతోంది. ది ఓవల్ మైదానంలో డబుల్ హెడర్ మ్యాచ్లతో ఈ సీజన్కు తెరలేవగా, ఆగస్టు 16న చారిత్రక లార్డ్స్ మైదానంలో ఫైనల్ పోరు జరగనుంది. ఈ సీజన్ పురుషుల, మహిళల విభాగాలు కలిపి మొత్తం 68 మ్యాచ్లతో అభిమానులకు పూర్తిస్థాయి క్రికెట్ వినోదాన్ని అందించనుంది.
అసలు ఏమిటీ ది హండ్రెడ్ టోర్నీ?
క్రికెట్లో సరికొత్త ఫార్మాట్ను పరిచయం చేస్తూ ఈసీబీ 2021లో ది హండ్రెడ్ టోర్నీని ప్రారంభించింది. ఇందులో సంప్రదాయ ఓవర్ల విధానం ఉండదు. ప్రతి జట్టు కేవలం 100 బంతులు మాత్రమే ఆడుతుంది. వేగవంతమైన ఆట తీరుతో యువతను, కొత్త వీక్షకులను ఆకట్టుకోవడమే దీని ప్రధాన లక్ష్యం. లండన్, మాంచెస్టర్ వంటి 8 ప్రధాన నగరాలకు చెందిన ఫ్రాంచైజీ జట్లు ఈ టోర్నీలో హోరాహోరీగా తలపడతాయి.
