Layoff : టీసీఎస్​లో ఉద్యోగాల కోత – 12 వేలా? 30 వేలా? ఐటీ ఉద్యోగుల్లో కలకలం.. అసలు నిజం ఇదే

Layoff : భారతదేశంలో అతిపెద్ద ఐటీ సర్వీసెస్ కంపెనీ అయిన టాటా కన్సల్టెన్సీ సర్వీసెస్‎లో భారీ సంఖ్యలో ఉద్యోగాల తొలగింపు ఉంటుందనే వార్త ఐటీ రంగంలో తీవ్ర చర్చకు దారితీసింది. సోషల్ మీడియాలో 30,000 మందిని తొలగిస్తున్నారని ప్రచారం జరుగుతుండగా, టీసీఎస్ దీనిపై స్పందించింది. టీసీఎస్ ఇచ్చిన వివరణ ప్రకారం, తమ వర్క్‌ఫోర్స్ రీస్ట్రక్చరింగ్ కార్యక్రమంలో భాగంగా సుమారు 2% మందికి ఉద్యోగాలు పోయే అవకాశం ఉంది. అంటే, టీసీఎస్‌లో దాదాపు 6 లక్షల మందికి పైగా ఉద్యోగులు ఉండగా, ఈ 2% అంటే సుమారు 12,000 మంది ఉద్యోగులు తమ ఉద్యోగాలను కోల్పోవచ్చు. ఒకే కంపెనీలో 12,000 మందికి ఉద్యోగాలు కోల్పోవడం అనేది చిన్న విషయం కాదు. భారతదేశంలో అత్యధిక ఉద్యోగాలు కల్పించిన సంస్థల్లో టీసీఎస్ ఒకటి. ఈ లేఆఫ్‌లు వివిధ విభాగాల నుంచి ఉంటాయని అంచనా. ఈ తొలగింపు ప్రక్రియ గత కొన్ని నెలలుగా కొనసాగుతోందని కూడా వార్తలు వస్తున్నాయి.

గత కొన్ని నెలలుగా కంపెనీ యాజమాన్యం పలువురు ఉద్యోగులపై రాజీనామా చేయమని బలవంతం చేస్తోంది. ఒత్తిడికి లొంగని వారిని ఉద్యోగాల నుంచి తొలగిస్తున్నారని కూడా ఆ నివేదిక పేర్కొంది. టీసీఎస్‌లో ఉద్యోగాలు కోల్పోయే వారి సంఖ్య 12,000 కాదని, అంతకు మించి ఎక్కువగా ఉండొచ్చని ఐటీ ఉద్యోగుల సంఘాలు, ఉద్యోగులు అనుమానిస్తున్నారు. తమకు వివిధ వర్గాల నుంచి అందిన సమాచారం ప్రకారం, తొలగించే వారి సంఖ్య 30,000 దాటవచ్చని ఐటీ సంఘాలు చెబుతున్నాయి.

ఐటీ సంఘాలు చెబుతున్న 30,000 మంది తొలగింపు అనేది నిజం కాదని, అంత పెద్ద సంఖ్యలో ఉద్యోగులను తొలగిస్తే టీసీఎస్ పనితీరుకు ఆటంకం కలుగుతుందని అభిప్రాయపడింది. ఐటీ సంఘాలు ఉద్దేశపూర్వకంగానే ఈ సంఖ్యను ప్రచారం చేస్తున్నాయని పేర్కొంది. ప్రపంచంలోనే అతిపెద్ద ఐటీ సేవల సంస్థల్లో ఒకటైన యాక్సెంచర్ ఇటీవలే 11,000 మంది ఉద్యోగులను తొలగించిన వార్త వచ్చిన విషయం తెలిసిందే. ఇప్పుడు టీసీఎస్ వంతు. AI (ఆర్టిఫిషియల్ ఇంటెలిజెన్స్) టెక్నాలజీ రాకతో ఐటీ రంగంలో పెద్ద సంక్షోభం ఏర్పడిందని, ఇది ఉద్యోగాలపై గణనీయమైన ప్రభావం చూపుతుందని నిపుణులు అభిప్రాయపడుతున్నారు. AI కారణంగా ఆటోమేషన్ పెరిగి, మానవ వనరుల అవసరం తగ్గుతుందనే ఆందోళన ఐటీ ఉద్యోగుల్లో నెలకొంది.