Navya Nair : మల్లెపూలు పెట్టుకున్నందుకు రూ.లక్ష ఫైన్.. ఆస్ట్రేలియా ఎయిర్ పోర్టులో రూల్స్ అంత స్ట్రిక్టా?

Navya Nair: కన్నడతో పాటు దక్షిణాది భాషా చిత్రాల్లో నటించిన మలయాళీ నటి నవ్య నాయర్‌కు మెల్‌బోర్న్ ఎయిర్‌పోర్ట్‌లో ఊహించని షాక్ తగిలింది. చేతిలో ఉన్న ఒక చిన్న మల్లెపూల మాల వల్ల ఆమెకు లక్ష రూపాయల కన్నా ఎక్కువ ఫైన్ పడింది. అసలు మల్లెపూలు తీసుకెళ్లడం తప్పా? ఆస్ట్రేలియాలో ఉన్న కఠినమైన నియమాలు ఏమిటో ఇప్పుడు తెలుసుకుందాం.

నటి నవ్య నాయర్ ఇటీవల ఆస్ట్రేలియాలోని మెల్‌బోర్న్ ఎయిర్‌పోర్ట్‌లో దిగినప్పుడు, ఆమె హ్యాండ్‌బ్యాగ్‌లో కేవలం 15 సెంటీమీటర్ల పొడవున్న ఒక చిన్న మల్లెపూల మాల కనిపించింది. దీనికి ఆస్ట్రేలియన్ అధికారులు ఆమెకు 1,980 ఆస్ట్రేలియన్ డాలర్ల (దాదాపు రూ. 1.14 లక్షలు) ఫైన్ వేశారు. ఈ విషయాన్ని నవ్య తన సోషల్ మీడియాలో పోస్ట్ చేశారు. ఓనం వేడుకల కోసం ఆస్ట్రేలియాలోని విక్టోరియా మలయాళీ సంఘం ఆమెను ఆహ్వానించింది. ఆమె అక్కడికి వెళ్లే ముందు సింగపూర్‌కు వెళ్లారు. ఆమె తండ్రి మల్లెపూల మాలను రెండుగా చేసి, ఒకటి తలలో పెట్టుకోమని, మరొకటి ఆస్ట్రేలియాకు వెళ్లేటప్పుడు పెట్టుకోమని ఇచ్చారు. నవ్య ఆ రెండో భాగాన్ని తన హ్యాండ్‌బ్యాగ్‌లో పెట్టుకున్నారు. మెల్‌బోర్న్ ఎయిర్‌పోర్ట్‌లో తనిఖీ చేసినప్పుడు ఆ మాల బయటపడింది. దాంతో ఆమెకు భారీ ఫైన్ పడింది.

మల్లెపూల మాల తీసుకెళ్లడం తప్పా? ఆస్ట్రేలియా చట్టం ఏం చెబుతోంది?

ఆస్ట్రేలియాకు కఠినమైన బయో సెక్యూరిటీ నిబంధనలు ఉన్నాయి. తమ దేశంలోని సున్నితమైన జీవ పర్యావరణ వ్యవస్థను కాపాడటానికి ఈ కఠినమైన చట్టాలను రూపొందించారు. విదేశాల నుంచి వచ్చే హానికరమైన కీటకాలు, వ్యాధులు తమ దేశ పర్యావరణాన్ని నాశనం చేయవచ్చని వారు భయపడతారు. అందుకే విదేశాల నుంచి ఎలాంటి మొక్కలు, పువ్వులు, విత్తనాలు, పండ్లు, కూరగాయలు, మట్టి లేదా పశువులకు సంబంధించిన ఉత్పత్తులను అనుమతించరు. పూర్తిగా తనిఖీ చేసి, క్లియరెన్స్ ఇచ్చిన తర్వాత మాత్రమే వాటిని దేశంలోకి అనుమతిస్తారు. ఆస్ట్రేలియాకు వెళ్లే ప్రయాణికులు తమ దగ్గర ఇలాంటి వస్తువులు ఉంటే, ముందుగానే అధికారులకు చెప్పాలి. లేకపోతే చట్ట ప్రకారం భారీ జరిమానాలు విధిస్తారు.

సెహ్వాగ్, భజ్జీకి కూడా గతంలో ఫైన్

2002లో భారత క్రికెటర్లు వీరేంద్ర సెహ్వాగ్, హర్భజన్ సింగ్‌లకు కూడా న్యూజిలాండ్ కస్టమ్స్ అధికారులు ఫైన్ వేశారు. వారు తమ లగేజ్‌లో మురికి షూలను ఉంచుకున్నారు.. వాటి గురించి అధికారులకు చెప్పలేదు. అందుకే వారికి 200 న్యూజిలాండ్ డాలర్ల ఫైన్ పడింది. ఈ రెండు సంఘటనలు విదేశాలకు వెళ్లే ముందు అక్కడి నియమ నిబంధనలు తెలుసుకోవడం ఎంత ముఖ్యమో తెలియజేస్తున్నాయి.