Stock Market: స్టాక్ మార్కెట్ ఇన్వెస్టర్లకు షాక్.. 12 ఫైనాన్షియల్ కంపెనీలకు రూ.1.12 లక్షల కోట్ల భారీ నష్టం

Stock Market: భారతీయ షేర్ మార్కెట్‌లో సెప్టెంబర్ 24న ఊహించని విధంగా భారీ పతనం నమోదైంది. ముఖ్యంగా బ్యాంకింగ్, ఫైనాన్స్, ఇన్సూరెన్స్ రంగాలకు చెందిన షేర్లలో తీవ్రమైన అమ్మకాల ఒత్తిడి కనిపించింది. అమెరికాలో పెరుగుతున్న బాండ్ ఈల్డ్స్, ముడి చమురు ధరలు మార్కెట్‌పై తీవ్ర ప్రభావం చూపాయి. దీనికి తోడు ఇన్సూరెన్స్ రంగంలో నిబంధనలు మారుతాయనే వార్తలు ఇన్వెస్టర్లలో ఆందోళనను రేకెత్తించాయి. ఇంట్రాడే ట్రేడింగ్ సమయంలో ప్రముఖ ఫైనాన్షియల్ కంపెనీల మార్కెట్ క్యాపిటలైజేషన్ ఏకంగా రూ.1.12 లక్షల కోట్లకు పైగా పడిపోవడం మార్కెట్ వర్గాలను కలవరపెట్టింది.

భారీగా నష్టపోయిన బజాజ్ ఫైనాన్స్, హెచ్‌డీఎఫ్‌సీ, ఇతర దిగ్గజాలు

ఈ ఒక్క రోజు మార్కెట్ పతనంలో అనేక ప్రముఖ కంపెనీలు భారీగా సంపదను కోల్పోయాయి. ముఖ్యంగా బజాజ్ ఫైనాన్స్ కంపెనీకి అత్యధికంగా దాదాపు రూ.29,000 కోట్ల మార్కెట్ క్యాప్ నష్టం వాటిల్లింది. ఆ తర్వాత పీబీ ఫిన్‌టెక్ సుమారు రూ.20,000 కోట్లు, హెచ్‌డీఎఫ్‌సీ బ్యాంక్ దాదాపు రూ.15,000 కోట్లు, యాక్సిస్ బ్యాంక్ సుమారు రూ.14,000 కోట్ల మేರೆకి నష్టపోయాయి. ఇండస్‌ఇండ్ బ్యాంక్, ఐడీఎఫ్‌సీ ఫస్ట్ బ్యాంక్, ఏయూ స్మాల్ ఫైనాన్స్ బ్యాంక్ షేర్లు కూడా గణనీయమైన నష్టాలను చవిచూశాయి.

ఇన్సూరెన్స్ రంగంపై నిబంధనల ప్రభావం

ఫైనాన్షియల్ రంగంతో పాటు ఇన్సూరెన్స్ స్టాక్స్‌పై కూడా తీవ్రమైన అమ్మకాల ఒత్తిడి పడింది. హెచ్‌డీఎఫ్‌సీ లైఫ్ మార్కెట్ క్యాప్ రూ.7,600 కోట్లు, మాక్స్ ఫైనాన్షియల్ రూ.6,800 కోట్లు, ఐసీఐసీఐ ప్రుడెన్షియల్ లైఫ్ రూ.3,000 కోట్లు కోల్పోయాయి. టర్టిల్‌మింట్ సంస్థ కూడా దాదాపు రూ.802 కోట్ల నష్టాన్ని చవిచూసింది. కేవలం ఈ నాలుగు ఇన్సూరెన్స్ కంపెనీలకే సుమారు రూ.38,100 కోట్ల సంపద ఆవిరైంది. కొత్త నిబంధనల ప్రకారం ఏజెంట్లు లేదా డిస్ట్రిబ్యూటర్లకు ఇచ్చే కమిషన్ పరిమితులు తగ్గితే, అది వ్యాపార వృద్ధిపై ప్రభావం చూపుతుందనే భయాలు మార్కెట్‌లో నెలకొన్నాయి.

బ్రోకరేజ్ సంస్థల అంచనాలు

ప్రతిపాదిత కమిషన్ కోత వల్ల పీబీ ఫిన్‌టెక్, టర్టిల్‌మింట్ వంటి కంపెనీల ఆదాయం 10 నుంచి 12 శాతం వరకు తగ్గే అవకాశం ఉందని ప్రముఖ బ్రోకరేజ్ సంస్థ జెఫ్రీస్ అంచనా వేసింది. బెర్న్‌స్టెయిన్ సంస్థ కూడా హెల్త్, టర్మ్ ఇన్సూరెన్స్ వృద్ధిపై కొంత ఒత్తిడి ఉండవచ్చని పేర్కొంది. అయితే మరోవైపు డిస్ట్రిబ్యూషన్ ఖర్చులు తగ్గడం వల్ల భవిష్యత్తులో ఆ ప్రయోజనం కొంతవరకు వినియోగదారులకు చేరి పాలసీల అమ్మకాలు పెరిగే అవకాశం కూడా ఉంటుందని నిపుణులు అభిప్రాయపడుతున్నారు.