Market Cap : స్టాక్ మార్కెట్ మార్కెట్ క్యాప్ సమరం.. హెచ్డీఎఫ్సీకి భారీ నష్టం, రిలయన్స్కు లాభాల పంట
హెచ్డీఎఫ్సీకి భారీ నష్టం, రిలయన్స్కు లాభాల పంట
Market Cap : స్టాక్ మార్కెట్లో గత వారం పెట్టుబడిదారులకు మిశ్రమ ఫలితాలను అందించింది. సెన్సెక్స్, నిఫ్టీలు పెద్దగా పతనం కాకపోయినప్పటికీ, దేశంలోని అగ్రశ్రేణి కంపెనీల మార్కెట్ విలువలో మాత్రం భారీ మార్పులు చోటుచేసుకున్నాయి. ముఖ్యంగా టాప్-10 కంపెనీలలో ఐదు కంపెనీలు భారీగా నష్టపోగా, మిగిలిన ఐదు కంపెనీలు లాభాలను గడించాయి. ఈ వారంలో హెచ్డీఎఫ్సీ బ్యాంక్ ఇన్వెస్టర్లకు చుక్కలు చూపించగా, ముఖేష్ అంబానీ నేతృత్వంలోని రిలయన్స్ ఇండస్ట్రీస్ మాత్రం తన సత్తా చాటింది.
హెచ్డీఎఫ్సీ బ్యాంక్ కుదేల్
గత వారంలో దేశంలోని టాప్-10 కంపెనీల్లో ఐదు కంపెనీలు ఏకంగా రూ.1,02,771.87 కోట్ల మార్కెట్ విలువను కోల్పోయాయి. ఇందులో అత్యధికంగా నష్టపోయింది దేశంలోనే అతిపెద్ద ప్రైవేట్ రంగ బ్యాంక్ అయిన హెచ్డీఎఫ్సీ బ్యాంక్. ఈ ఒక్క బ్యాంక్ మార్కెట్ క్యాప్ ఏకంగా రూ.56,124.48 కోట్లు తగ్గి, రూ.12,01,267.28 కోట్లకు పరిమితమైంది. వీరితో పాటు హిందుస్థాన్ యూనీలివర్ (రూ.18,009 కోట్లు), బజాజ్ ఫైనాన్స్ (రూ.15,338 కోట్లు), టీసీఎస్ (రూ.7,127 కోట్లు), ఐసీఐసీఐ బ్యాంక్ (రూ.6,171 కోట్లు) తమ విలువను కోల్పోయాయి.
అంబానీ ఖాతాలో రూ.46 వేల కోట్లు
మార్కెట్ ఒడిదుడుకుల్లో ఉన్నప్పటికీ, మరో ఐదు దిగ్గజ కంపెనీలు మాత్రం తమ మార్కెట్ క్యాప్ను రూ.86,210.97 కోట్ల మేర పెంచుకున్నాయి. ఇందులో సింహభాగం రిలయన్స్ ఇండస్ట్రీస్ దక్కించుకుంది. రిలయన్స్ మార్కెట్ విలువ రూ.45,942.75 కోట్లు పెరిగి, మొత్తం రూ.19,14,235.92 కోట్లకు చేరింది. అంటే పెరిగిన మొత్తం విలువలో 50 శాతం కంటే ఎక్కువ అంబానీ కంపెనీదే కావడం విశేషం. టెలికాం దిగ్గజం భారతీ ఎయిర్టెల్ కూడా రూ.24,462 కోట్ల లాభంతో తన సత్తా చాటింది.
ఎస్బీఐ, ఎల్ఐసీలకు కలిసొచ్చిన వారం
ప్రభుత్వ రంగ సంస్థలైన స్టేట్ బ్యాంక్ ఆఫ్ ఇండియా (SBI), ఎల్ఐసీ (LIC) కూడా ఈ వారం లాభాల్లోనే ముగిశాయి. ఎస్బీఐ మార్కెట్ క్యాప్ రూ.10,707.52 కోట్లు పెరగ్గా, ఎల్ఐసీ విలువ రూ.2,624.88 కోట్లు పెరిగింది. ఐటీ దిగ్గజం ఇన్ఫోసిస్ కూడా రూ.2,473 కోట్లు తన విలువకు జోడించుకుంది. మార్కెట్ ఒడిదుడుకులను తట్టుకుని ఈ కంపెనీలు నిలబడటం ఇన్వెస్టర్లకు కాస్త ఊరటనిచ్చే అంశం.
మార్కెట్ ట్రెండ్ ఎటువైపు?
గత వారంలో బీఎస్ఈ సెన్సెక్స్ 30.96 పాయింట్లు (0.04%), నిఫ్టీ 36.6 పాయింట్లు (0.15%) స్వల్పంగా పడిపోయాయి. మార్కెట్ విశ్లేషకుల అభిప్రాయం ప్రకారం, వారంలో మొదటి మూడు రోజులు జోరుగా సాగినా, గురువారం వచ్చిన భారీ పతనం మొత్తం లాభాలను తుడిచిపెట్టేసింది. ప్రస్తుతం రిలయన్స్ ఇండస్ట్రీస్ దేశంలోనే అత్యంత విలువైన కంపెనీగా అగ్రస్థానంలో కొనసాగుతోంది. దీని తర్వాత హెచ్డీఎఫ్సీ బ్యాంక్, భారతీ ఎయిర్టెల్, ఎస్బీఐ వరుస స్థానాల్లో ఉన్నాయి. ఇన్వెస్టర్లు ప్రస్తుతం కాస్త జాగ్రత్తగా వ్యవహరిస్తున్నారని నిపుణులు చెబుతున్నారు.
