NRI Deposits : ఇరాన్-అమెరికా యుద్ధ సెగ.. ఇండియన్ అకౌంట్లు ఖాళీ చేస్తున్న ప్రవాస భారతీయులు

NRI Deposits : పశ్చిమ ఆసియాలో రోజురోజుకూ ముదురుతున్న ఇరాన్-అమెరికా ఉద్రిక్తతలు భారతదేశ ఆర్థిక రంగానికి కొత్త సవాళ్లను తెచ్చిపెడుతున్నాయి. ఇప్పటివరకు కేవలం పెట్రోల్, డీజిల్ రేట్లు పెరగడం, ఎల్‌పీజీ గ్యాస్ కొరత రావడం వంటి సమస్యలకే పరిమితమైన ఈ యుద్ధ సెగ.. ఇప్పుడు నేరుగా భారత బ్యాంకింగ్ వ్యవస్థపై పడింది. విదేశాల్లో నివసిస్తున్న భారతీయులు మన దేశంలోని తమ బ్యాంక్ ఖాతాల నుంచి భారీగా డబ్బులను విత్‌డ్రా చేసుకుంటున్నారు. భారత రిజర్వ్ బ్యాంక్ విడుదల చేసిన తాజా గణాంకాల ప్రకారం.. కేవలం మార్చి నెలలోనే ఎన్‌ఆర్‌ఐలు ఏకంగా 2 బిలియన్ డాలర్ల (దాదాపు రూ.16,500 కోట్లు) నిధులను వెనక్కి తీసుకున్నారు.

ఈ భారీ విత్‌డ్రాల కారణంగా భారతీయ బ్యాంకుల్లో ఉన్న మొత్తం ఎన్‌ఆర్‌ఐ డిపాజిట్లు భారీగా క్షీణించాయి. అంతకుముందు నెలలో 167.58 బిలియన్ డాలర్లుగా ఉన్న మొత్తం ప్రవాస భారతీయుల నిధులు.. మార్చి ముగిసే సమయానికి 165.65 బిలియన్ డాలర్లకు పడిపోయాయి. పశ్చిమ ఆసియాలో నెలకొన్న అనిశ్చితి, భవిష్యత్తుపై ఉన్న భయాల కారణంగానే చాలా మంది తమ పొదుపు మొత్తాలను సురక్షిత ప్రాంతాలకు తరలిస్తున్నట్లు ఆర్థిక నిపుణులు విశ్లేషిస్తున్నారు. ఈ అంతర్జాతీయ వివాదానికి త్వరలోనే శాంతియుత పరిష్కారం లభించకపోతే, రాబోయే రోజుల్లో ఈ నిధుల ఉపసంహరణ మరింత పెరిగే ప్రమాదం ఉందని హెచ్చరిస్తున్నారు.

ఎన్‌ఆర్‌ఐ డిపాజిట్లపై పడిన ఎఫెక్ట్ ఎంత?

ఎన్‌ఆర్‌ఐలు పెద్ద ఎత్తున డబ్బులు వెనక్కి తీసుకోవడంతో ప్రస్తుత ఆర్థిక సంవత్సరంలో బ్యాంకుల నిధుల రాక గణనీయంగా తగ్గింది. ముగిసిన 2025-26 ఆర్థిక సంవత్సరంలో మొత్తం ఎన్‌ఆర్‌ఐ డిపాజిట్లు 14.41 బిలియన్ డాలర్లుగా నమోదయ్యాయి. కాగా, దీనికి ముందు ఆర్థిక సంవత్సరంలో ఈ నిధుల రాక 16.16 బిలియన్ డాలర్లుగా ఉండటం గమనార్హం. అంటే ఏడాది కాలంలోనే విదేశాల నుంచి వచ్చే పెట్టుబడులు, పొదుపు మొత్తాలు చాలా వరకు తగ్గిపోయాయి. మిడిల్ ఈస్ట్‌లో ఉపాధి పొందుతున్న లక్షలాది మంది భారతీయులు ప్రస్తుత పరిస్థితుల్లో నగదును చేతిలో ఉంచుకోవడానికే ప్రాధాన్యత ఇస్తున్నట్లు బ్యాంకర్లు చెబుతున్నారు.

ఏయే ఖాతాలపై దీని ప్రభావం ఎక్కువగా ఉంది?

మార్చి నెలలో ఎన్‌ఆర్‌ఐలు కొత్తగా డిపాజిట్ చేసిన డబ్బు కంటే బ్యాంకుల నుంచి డ్రా చేసిన మొత్తమే ఎక్కువగా ఉంది. ముఖ్యంగా గల్ఫ్, పశ్చిమ ఆసియా దేశాల్లో ఉద్యోగాలు చేసే భారతీయులు ఎక్కువగా ఉపయోగించే రెండు రకాల ఖాతాలపై ఈ ప్రభావం స్పష్టంగా కనిపించింది.

NRE అకౌంట్స్: ఈ ఖాతాల్లో ఉండే నిల్వలు గత ఏడాది 99.77 బిలియన్ డాలర్లుగా ఉండగా, ప్రస్తుత నివేదిక ప్రకారం అవి 98.56 బిలియన్ డాలర్లకు పడిపోయాయి.

NRO ఆర్డినరీ అకౌంట్స్: భారత్‌లో వచ్చే ఆదాయాన్ని దాచుకునే ఈ ఖాతాల్లో కూడా నిధులు 34.09 బిలియన్ డాలర్ల నుంచి 33.33 బిలియన్ డాలర్లకు తగ్గాయి.

అయితే, విదేశీ కరెన్సీ నాన్-రెసిడెంట్ బ్యాంక్ అంటే FCNR(B) ఖాతాల్లో మాత్రం స్వల్ప ఊరట లభించింది. ఈ డిపాజిట్లు స్వల్పంగా పెరిగి 33.76 బిలియన్ డాలర్లకు చేరాయి.

భారత బ్యాంకింగ్ రంగానికి ముంచుకొస్తున్న కొత్త గండం

గల్ఫ్ దేశాల్లో ఉద్రిక్తతలు ఇలాగే కొనసాగితే భారత విదేశీ మారక నిల్వలు, దేశీయ బ్యాంకింగ్ వ్యవస్థపై తీవ్ర ఒత్తిడి పడక తప్పదని నిపుణులు హెచ్చరిస్తున్నారు. ఎన్‌ఆర్‌ఐ డిపాజిట్లు అనేవి దేశానికి అదనపు ఆర్థిక బలాన్ని ఇస్తాయి. అలాంటిది వారు నిధులను ఉపసంహరించుకుంటే బ్యాంకుల వద్ద లోన్ ఇవ్వడానికి ఉండే నగదు లభ్యత తగ్గుతుంది. అంతేకాకుండా, అంతర్జాతీయ మార్కెట్లో రూపాయి విలువ మరింత పతనం కాకుండా కాపాడటానికి కూడా ఈ విదేశీ నిధులు ఎంతో కీలకం. రాబోయే త్రైమాసికంలో పరిస్థితులు ఎలా మారతాయోనని ఇటు ఆర్‌బీఐ, అటు బ్యాంకింగ్ రంగాలు ఉత్కంఠగా గమనిస్తున్నాయి.