EPFO : లెక్కలు చూస్తే మైండ్ బ్లాంక్.. జులైలో 21 లక్షల మంది కొత్తగా ఈపీఎఫ్ఓలో చేరిక

EPFO : భారతదేశంలో ఉద్యోగ కల్పన ప్రక్రియ మెరుగ్గా సాగుతోంది. దీనికి ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) విడుదల చేసిన తాజా డేటానే నిదర్శనం. జులై 2025 నెలలో ఈపీఎఫ్‌ఓలో నికరంగా 21.04 లక్షల మంది కొత్త సభ్యులు చేరారు. గత సంవత్సరం ఇదే నెలతో పోలిస్తే, ఈ నికర సభ్యుల చేరిక ఏకంగా 5.6 శాతం పెరిగింది. ఈ గణాంకాలు దేశంలో నిరంతరంగా కొత్త ఉద్యోగాలు పెరుగుతున్నాయనే సానుకూల వాతావరణాన్ని తెలియజేస్తున్నాయి.

ఈ ఆర్థిక సంవత్సరం (2025-26) ప్రారంభం నుంచి ఈపీఎఫ్‌ఓలో కొత్త సభ్యుల చేరిక స్థిరంగా పెరుగుతూ ఉండటం విశేషం. ఏప్రిల్‌లో 14.3 లక్షలు, మేలో 14.6 లక్షలు, జూన్‌లో 19 లక్షలు ఉండగా, జులై నాటికి అది 21 లక్షలకు పెరిగింది. జూన్, జులై నెలల్లో నియామకాలు పెరగడానికి ఒక ముఖ్య కారణం ఉంది. ఏప్రిల్, మే నెలల్లో విద్యార్థులు గ్రాడ్యుయేషన్ పూర్తి చేసుకుని బయటికి వస్తారు, కాబట్టి ఆ తర్వాత వచ్చే నెలల్లో కంపెనీల్లో నియామకాలు సహజంగానే పెరుగుతాయి.

కొత్తగా ఈపీఎఫ్‌ఓలో చేరిన సభ్యుల్లో 18-25 సంవత్సరాల వయస్సు గల యువతే అత్యధికంగా ఉన్నారు. దీనిని బట్టి, కొత్త గ్రాడ్యుయేట్లకు ఉపాధి అవకాశాలు పుష్కలంగా లభిస్తున్నాయని అర్థమవుతోంది. కొత్త సభ్యులు ఎక్కువగా చేరిన రాష్ట్రాలలో మహారాష్ట్ర, కర్ణాటక, తమిళనాడు, గుజరాత్, హర్యానా, ఢిల్లీ ఉన్నాయి. ఈ డేటా ప్రకారం ముఖ్యంగా దక్షిణ భారత రాష్ట్రాలు కొత్త ఉద్యోగ సృష్టికి ముఖ్య కేంద్రాలుగా నిలిచాయి. ఇక్కడ పారిశ్రామిక, టెక్నాలజీ రంగాల్లో నియామకాలు ఎక్కువగా జరుగుతున్నాయని తెలుస్తోంది.

కొత్త ఈపీఎఫ్ ఖాతాలు ఎక్కువగా ఐటీ, బీపీఓ వంటి సర్వీసెస్ రంగం, ఇంజనీరింగ్, నిర్మాణ రంగం, ట్రేడింగ్ రంగాలలో సృష్టించబడ్డాయి. వీటితో పాటు, టెక్స్‌టైల్, గార్మెంట్స్, క్లీనింగ్ సర్వీసెస్ వంటి రంగాలలో కూడా గణనీయమైన సంఖ్యలో ఉద్యోగాలు కల్పించబడ్డాయి. మొత్తంగా, ఈపీఎఫ్‌ఓ విడుదల చేసిన తాజా డేటా భారతదేశ ఆర్థిక వ్యవస్థలో ఉపాధి పరంగా ఆశాజనకమైన వృద్ధి కనిపిస్తోందని స్పష్టం చేస్తోంది.