NPS: కేవలం ప్రభుత్వ ఉద్యోగులకే కాదు.. ఇక ప్రైవేట్ ఉద్యోగులకు కూడా నేషనల్ పెన్షన్ స్కీం సేవలు

NPS: పెన్షన్ ఫండ్ రెగ్యులేటరీ అండ్ డెవలప్‌మెంట్ అథారిటీ (PFRDA) నేషనల్ పెన్షన్ సిస్టమ్ (NPS) విస్తరణకు సంబంధించి ఒక భారీ ప్రణాళికను సిద్ధం చేసింది. ప్రస్తుతం ప్రభుత్వేతర వర్గానికి చెందిన ఎన్పీఎస్ చందాదారుల సంఖ్య దాదాపు 90 లక్షలుగా ఉండగా, రాబోయే ఐదేళ్లలో ఈ సంఖ్యను 35 నుండి 40 కోట్లకు పెంచాలని రెగ్యులేటర్ భావిస్తోంది. ఇప్పటివరకు కేవలం ప్రభుత్వ ఉద్యోగులు లేదా కార్పొరేట్ వేతన జీవులకే పరిమితమైన ఎన్పీఎస్‌ను ప్రైవేట్ రంగానికి చెందిన ఉద్యోగులు, స్వయం ఉపాధి పొందుతున్నవారు, ఇతరులకు కూడా అందుబాటులోకి తేవడమే ఈ ప్రణాళిక ముఖ్య ఉద్దేశం.

డిజిటల్ ఆన్‌బోర్డింగ్, మ్యూచువల్ ఫండ్ డిస్ట్రిబ్యూటర్లు

పిఎఫ్‌ఆర్‌డిఏ చైర్మన్ శివసుబ్రమణియన్ రామన్ కోల్‌కతాలో జరిగిన ఒక కార్యక్రమంలో ఈ లక్ష్యాలను వెల్లడించారు. సాంకేతికత ఆధారంగా డిజిటల్ విధానంలో ఏటా 2 నుంచి 3 కోట్ల మంది కొత్త చందాదారులను చేర్పించవచ్చని ఆయన అంచనా వేశారు. అటల్ పెన్షన్ యోజన మాదిరిగానే బ్యాంకులు, ప్రాంతీయ గ్రామీణ బ్యాంకుల నెట్‌వర్క్‌ను వినియోగించుకోవడంతో పాటు, మ్యూచువల్ ఫండ్ డిస్ట్రిబ్యూటర్లను పెన్షన్ ఏజెంట్లుగా మార్చాలని నిర్ణయించారు. బిఎస్‌ఈ టెక్నాలజీస్ రూపొందించిన స్టార్ ఎన్పీఎస్ ప్లాట్‌ఫామ్ ద్వారా ఏజెంట్లు ఎన్పీఎస్ సేవలను మరింత వేగంగా, సులభంగా ప్రజల్లోకి తీసుకెళ్లేలా చర్యలు తీసుకుంటున్నారు.

కొత్తగా నాలుగు పెన్షన్ ఫండ్స్ మంజూరు

చందాదారులకు మరిన్ని ఎంపికలను కల్పించడంలో భాగంగా పిఎఫ్‌ఆర్‌డిఏ కొత్తగా నాలుగు పెన్షన్ ఫండ్లకు ఆమోదం తెలిపింది. దీనితో ఎన్పీఎస్ పరిధిలోని మొత్తం పెన్షన్ ఫండ్ల సంఖ్య 14కు పెరిగింది. దీనివల్ల చందాదారులు తమ రిటైర్మెంట్ పొదుపు నిధులను నిర్వహించడానికి మరింత మెరుగైన ఆప్షన్లను ఎంచుకునే వెసులుబాటు లభిస్తుంది.

వడ్డీ రాబడులు, సురక్షిత పొదుపు

ఎన్పీఎస్‌లోని సాంప్రదాయ (కన్జర్వేటివ్) పథకాలు గత 15 సంవత్సరాలుగా వార్షికంగా సగటున 9.2% నుంచి 9.3% వరకు అత్యుత్తమ రాబడిని అందించాయని పిఎఫ్‌ఆర్‌డిఏ చైర్మన్ పేర్కొన్నారు. కాబట్టి ప్రైవేట్ ఉద్యోగులు, వ్యాపారులు కూడా తమ రిటైర్మెంట్ జీవితం సురక్షితంగా ఉండటానికి ఎన్పీఎస్‌ను ఒక బలమైన ఆర్థిక సాధనంగా ఎంచుకోవచ్చని ఆయన స్పష్టం చేశారు.