E20 Petrol: ఈ20 పెట్రోల్‌తో ఇంజిన్‌ తుప్పు పడుతోందా?: ఆయిల్ కంపెనీలకు బిఐఎస్ బిగ్ షాక్

E20 Petrol: ఈ20 పెట్రోల్ వినియోగం పెరుగుతున్న వేళ వాహనదారుల ఇంజిన్ భద్రతపై కేంద్ర ప్రభుత్వం కీలక నిర్ణయం తీసుకుంది. పెట్రోల్‌లో క్లోరైడ్ శాతాన్ని అదుపులో ఉంచే నిబంధనలను ఆయిల్ మార్కెటింగ్ కంపెనీలు తప్పనిసరిగా పాటించేలా అమల్లోకి తెస్తోంది. వాహన తయారీ సంస్థల ఆందోళనల నేపథ్యంలో బిఐఎస్ ఈ చట్టబద్ధమైన కఠిన చర్యలకు శ్రీకారం చుట్టింది. దేశ వ్యాప్తంగా పెట్రోల్‌లో 20 శాతం ఈథనాల్ కలిపి విక్రయించే ఈ20 ఇంధనం లభ్యత పెరుగుతోంది. అయితే ఈ ఇంధనాన్ని వాడటం వల్ల వాహనాల ఇంజిన్ భాగాలు దెబ్బతింటున్నాయని, తుప్పు పట్టే ప్రమాదం ఉందని ఆటోమొబైల్ కంపెనీలు కేంద్ర ప్రభుత్వానికి ఫిర్యాదు చేశాయి. ఫ్యూయల్ ట్యాంకుల నుంచి సేకరించిన నమూనాల్లో కొన్నిచోట్ల క్లోరైడ్ మోతాదు, తేమ శాతం ఎక్కువగా ఉన్నట్లు తేలడంతో వాహన తయారీదారులు తీవ్ర ఆందోళన వ్యక్తం చేశారు. వాహనదారులకు నాణ్యమైన ఇంధనాన్ని అందించడంతో పాటు ఇంజిన్ల ఆయుష్షు పెంచేందుకు కేంద్రం తక్షణమే రంగంలోకి దిగింది.

ఇప్పటివరకు ఈథనాల్ ఆధారిత పెట్రోల్‌లో క్లోరైడ్ పరిమాణాన్ని ప్రతి మిలియన్ భాగాలకు 3 ppm కన్నా తక్కువగా ఉండేది తప్పనిసరి కాకుండా ఉండేది. కానీ ఇప్పుడు భారతీయ ప్రమాణాల బ్యూరో ఈ పరిమితిని చట్టబద్ధంగా తప్పనిసరి చేయడానికి కసరత్తు చేస్తోంది. దేశంలో పెట్రోల్ సప్లై చేసే ఆయిల్ మార్కెటింగ్ కంపెనీలన్నీ ఇకపై ఈ నాణ్యతా ప్రమాణాలను కచ్చితంగా పాటించాల్సి ఉంటుంది. కలుషిత ఇంధనం వల్ల మార్కెట్లో వాహన విడిభాగాలు పాడయ్యే ఘటనలు పెరగకుండా అడ్డుకట్ట వేయడమే ఈ నిర్ణయం ముఖ్య ఉద్దేశం.

భారతదేశం నిర్ణయించుకున్న సమయం కంటే ఐదేళ్ల ముందే పెట్రోల్‌లో 20 శాతం ఈథనాల్ కలిపే లక్ష్యాన్ని విజయవంతంగా సాధించింది. ఇంధన దిగుమతి భారాన్ని తగ్గించుకోవడానికి ఇది ఎంతో దోహదపడినప్పటికీ, భవిష్యత్తులో ఈథనాల్ శాతాన్ని మరింత పెంచే యోచనలో ప్రభుత్వం ఉంది. అందువల్ల నాణ్యతా ప్రమాణాలు దెబ్బతింటే వాహనదారుల్లో అపోహలు పెరుగుతాయని విధాన నిర్ణేతలు భావిస్తున్నారు. క్లోరైడ్ మోతాదును అదుపు చేయడం ద్వారా అత్యుత్తమ ఆటోమోటివ్ ఫ్యూయల్ ప్రమాణాలను అందుబాటులోకి తెచ్చినట్లవుతుంది.

పెట్రోల్ నాణ్యతపై బిఐఎస్ తీసుకుంటున్న ఈ కఠిన నిర్ణయంతో దేశవ్యాప్తంగా వాహనదారులకు పెద్ద ఊరట లభించనుంది. ఫ్యూయల్ పంపులు, ఇంజెక్టర్లు, ట్యాంకులు తుప్పు పట్టకుండా రక్షణ లభిస్తుంది. కల్తీ లేని శుద్ధమైన ఈ20 పెట్రోల్ లభించడం వల్ల బండి మైలేజ్, పికప్ పెరగడంతో పాటు ఇంజిన్ ఎక్కువ కాలం మన్నికగా పనిచేస్తుంది. ఆయిల్ కంపెనీలు కూడా ఇకపై ల్యాబ్ టెస్టింగ్‌లు నిర్వహించిన తర్వాతే ఇంధనాన్ని బంకులకు తరలించాల్సి ఉంటుంది.