EPFO : నేరుగా యూపీఐ ద్వారా పీఎఫ్ డబ్బులు.. వెంటనే అకౌంట్లో ఈ 5 పనులు పూర్తి చేయండి
వెంటనే అకౌంట్లో ఈ 5 పనులు పూర్తి చేయండి
EPFO : దేశంలోని కోట్ల మంది ఉద్యోగులకు ఉద్యోగుల భవిష్య నిధి సంస్థ ఒక భారీ ఊరటనిచ్చే వార్తను మోసుకొచ్చింది. పీఎఫ్ డబ్బులను విత్డ్రా చేసుకోవడానికి ఇకపై వారాల తరబడి వేచి చూడాల్సిన అవసరం లేదు. మోసపూరితమైన లేదా సంక్లిష్టమైన ప్రాసెస్లకు కాలం చెల్లనుంది. ఈపీఎఫ్ఓ 3.0 సంస్కరణల కింద.. త్వరలోనే ఉద్యోగులు తమ యూపీఐ ఐడీకి లింక్ అయిన బ్యాంక్ ఖాతాలోకి నేరుగా, అత్యంత వేగంగా పీఎఫ్ సొమ్మును బదిలీ చేసుకునే సరికొత్త సదుపాయాన్ని కేంద్ర ప్రభుత్వం తీసుకురాబోతోంది. కేంద్ర కార్మిక శాఖ మంత్రి మన్సుఖ్ మాండవీయ ఈ విషయాన్ని అధికారికంగా వెల్లడించారు. ఈ కొత్త సాంకేతికతకు సంబంధించిన ట్రయల్స్ కూడా విజయవంతంగా పూర్తయ్యాయి.
ఈపీఎఫ్ఓ ఇప్పటికే రూ.5 లక్షల వరకు ఉన్న క్లెయిమ్ల కోసం ఆటో-సెటిల్మెంట్ విధానాన్ని అమలు చేస్తూ డబ్బుల ఉపసంహరణ ప్రక్రియను వేగవంతం చేసింది. అయితే ఈ సరికొత్త యూపీఐ డిజిటల్ విత్డ్రా సదుపాయాన్ని అందుకోవాలంటే మీ పీఎఫ్ ఖాతా రికార్డులు పక్కాగా ఉండటం చాలా ముఖ్యం. మీ ఖాతాలో ఏవైనా తప్పులు లేదా లోపాలు ఉంటే, కొత్త టెక్నాలజీ వచ్చినప్పటికీ మీ డబ్బులు మధ్యలోనే నిలిచిపోయే ప్రమాదం ఉంది. కాబట్టి ఈ సరికొత్త యూపీఐ పేమెంట్ సిస్టమ్ అందుబాటులోకి వచ్చేలోపు ఉద్యోగులు వెంటనే పూర్తి చేయాల్సిన 5 ముఖ్యమైన పనుల వివరాలు ఇవే.
1. యూఏన్ యాక్టివేషన్ అత్యంత ముఖ్యం
మీ పీఎఫ్ ఖాతాకు సంబంధించిన ఏ డిజిటల్ సేవనైనా ఉపయోగించుకోవడానికి మొదటి మెట్టు మీ యూనివర్సల్ అకౌంట్ నంబర్ యాక్టివేట్ అయి ఉండటం. మీ యూఏన్ నంబర్ గనుక ఇంకా యాక్టివేట్ కాకపోతే, మీరు యూపీఐ ద్వారా డబ్బులు విత్డ్రా చేసుకోవడం పక్కన పెడితే సాధారణ కేవైసీ ప్రక్రియను కూడా పూర్తి చేయలేరు. ఒకవేళ మీరు పాత పాస్వర్డ్ మరిచిపోయినా లేదా మీ మొబైల్ నంబర్ మారినా, వెంటనే ఈపీఎఫ్ఓ పోర్టల్లోకి వెళ్లి వివరాలను అప్డేట్ చేసుకోండి.
2. కేవైసీ వివరాలలో ఎలాంటి తప్పులు ఉండకూడదు
పీఎఫ్ క్లెయిమ్లు రిజెక్ట్ కావడానికి లేదా ఆగిపోవడానికి ప్రధాన కారణం ఉద్యోగి పేరు, పుట్టిన తేదీ లేదా జెండర్ వంటి వివరాలలో తప్పులు ఉండటమే. మీ ఈపీఎఫ్ఓ రికార్డులలోని సమాచారం మీ అధికారిక గుర్తింపు కార్డు (ఐడీ ప్రూఫ్) వివరాలతో వంద శాతం సరిపోలాలి. దీనితో పాటు, మీ పాన్ కార్డ్ కూడా యూఏన్తో లింక్ అయి, వెరిఫై కావడం చాలా ముఖ్యం. పాన్ కార్డు గనుక సరిగ్గా అప్డేట్ అవ్వకపోతే, పన్ను పరిధిలోకి వచ్చే విత్డ్రాలపై భారీగా టీడీఎస్ కట్ అయ్యే అవకాశం ఉంది.
3. బ్యాంక్ అకౌంట్, ఐఎఫ్ఎస్సి కోడ్ అప్డేట్
డబ్బులు నేరుగా యూపీఐ ద్వారా మీ బ్యాంక్ ఖాతాలోకి క్రెడిట్ అవుతాయి కాబట్టి, మీ బ్యాంకింగ్ సమాచారం ఖచ్చితంగా ఉండాలి. ఈపీఎఫ్ఓ పోర్టల్లో నమోదైన మీ బ్యాంక్ అకౌంట్ నంబర్, ఐఎఫ్ఎస్సి కోడ్, మీ పేరు స్పెల్లింగ్ కరెక్ట్గా ఉన్నాయో లేదో ఒకసారి సరిచూసుకోండి. ఒకవేళ మీరు పాత ఉద్యోగ కాలంలో వాడి, ప్రస్తుతం క్లోజ్ చేసిన బ్యాంక్ ఖాతా గనుక పోర్టల్లో ఉంటే దాని స్థానంలో రన్నింగ్లో ఉన్న కొత్త అకౌంట్ను లింక్ చేయండి.
4. అన్ని చోట్లా ఒకే మొబైల్ నంబర్ ఉండాలి
యూపీఐ లావాదేవీలన్నీ ఓటీపీ ఆధారిత వెరిఫికేషన్ ద్వారానే జరుగుతాయి. అందువల్ల మీ ఐడీ ప్రూఫ్, యూఏన్ పోర్టల్, మీ బ్యాంక్ ఖాతాకు లింక్ అయిన యూపీఐ ఐడీ.. ఈ మూడింటికీ ఒకే ఒక యాక్టివ్ మొబైల్ నంబర్ లింక్ అయి ఉండటం తప్పనిసరి. ఇలా ఒకే నంబర్ ఉండటం వల్ల డిజిటల్ వెరిఫికేషన్ ప్రక్రియ క్షణాల్లో పూర్తయి, మీ డబ్బులు వేగంగా అకౌంట్లోకి వస్తాయి.
5. ఉద్యోగ రికార్డులు, ఈ-నామినేషన్
మీ పీఎఫ్ ఖాతాలో మీ మునుపటి ఉద్యోగాల రికార్డులను కూడా పూర్తిగా తనిఖీ చేసుకోండి. చాలా సందర్భాలలో పాత కంపెనీని వదిలిపెట్టిన తేదీ పోర్టల్లో అప్డేట్ అవ్వదు. దీనివల్ల పాత పీఎఫ్ బ్యాలెన్స్ కొత్త ఖాతాలోకి బదిలీ కాకుండా క్లెయిమ్ ఆలస్యమవుతుంది. వీటితో పాటు, మీ కుటుంబ సభ్యుల వివరాలతో ఈ-నామినేషన్ ప్రక్రియను కూడా పూర్తి చేసి ఉంచండి. వివాహం తర్వాత నామినీని మార్చాల్సి వస్తే ఆలస్యం చేయకుండా ఇప్పుడే ఆ పని ముగించండి.
