PM Kisan : రైతులకు బిగ్ అలర్ట్.. పీఎం కిసాన్ 20వ విడత రావాలంటే ఈ 6 మార్పులు త్వరగా చూడండి

PM Kisan : దేశంలోని కోట్ల మంది అన్నదాతలకు గుడ్ న్యూస్. కేంద్ర ప్రభుత్వం అందిస్తున్న పీఎం కిసాన్ సమ్మాన్ నిధి యోజన 20వ విడత డబ్బులు ఎప్పుడు వస్తాయో అనే ఉత్కంఠకు తెరపడింది. కొన్ని మీడియా నివేదికల ప్రకారం.. ఈ పథకం 20వ విడత డబ్బులు జూన్ 20న రైతుల ఖాతాల్లో జమ కావచ్చని తెలుస్తోంది. అయితే, డబ్బులు పొందాలంటే రైతులు కొన్ని ముఖ్యమైన పనులు పూర్తి చేయాలి. ఈలోపే కోట్లాది మంది రైతులకు ఉపయోగపడేలా పీఎం కిసాన్ పోర్టల్‌లో 6 కొత్త మార్పులు చేశారు. అవేంటో డబ్బులు రావాలంటే ఏం చేయాలో ఇప్పుడు వివరంగా తెలుసుకుందాం.

పీఎం కిసాన్ పోర్టల్‌లో కొత్తగా వచ్చిన 6 మార్పులు

మొబైల్ నంబర్ అప్‌డేట్ చేసుకోండి: ఇప్పుడు మీరు పీఎం కిసాన్ పోర్టల్ ద్వారా మీ మొబైల్ నంబర్‌ను సులభంగా అప్‌డేట్ చేసుకోవచ్చు. దీని కోసం పోర్టల్‌లో 'Update Mobile Number' అనే ఆప్షన్‌పై క్లిక్ చేయాలి. మీ రిజిస్ట్రేషన్ నంబర్ లేదా ఆధార్ నంబర్ ద్వారా, ఆధార్‌తో లింక్ అయిన కొత్త నంబర్‌ను అప్‌డేట్ చేసుకోవచ్చు.

ఆన్‌లైన్‌లో డబ్బులు తిరిగి ఇవ్వండి (Online Refund): ఒకవేళ మీరు ఈ పథకానికి అర్హులు కాకపోయినా, ఇప్పటివరకు డబ్బులు పొందినట్లయితే ఆ మొత్తాన్ని ఇప్పుడు తిరిగి ఇచ్చేయొచ్చు. 'Online Refund' ఆప్షన్‌పై క్లిక్ చేసి, మీ ఆధార్ నంబర్ ద్వారా పీఎం కిసాన్ డబ్బులను వెనక్కి ఇచ్చేయవచ్చు.

స్వచ్ఛందంగా పథకం నుంచి తప్పుకోండి (Voluntary Surrender of PM-KISAN Benefits): మీకు ఈ పథకం డబ్బులు వద్దు అనుకుంటే, మీరు స్వచ్ఛందంగా తప్పుకోవచ్చు. దీని కోసం 'Voluntary Surrender of PM-KISAN benefits' ఆప్షన్‌పై క్లిక్ చేయాలి. మీ రిజిస్ట్రేషన్ నంబర్ ఎంటర్ చేసి 'కన్సెంట్' (Consent) టిక్ చేసి, క్యాప్చా కోడ్ (Captcha Code) ఎంటర్ చేసి ఓటీపీ (OTP) పొందండి. ఆ ఓటీపీని ఎంటర్ చేస్తే సరిపోతుంది.

తప్పుకుని ఉంటే మళ్లీ చేరండి (Voluntary Surrender Revocation): ఒకవేళ పొరపాటున మీరు స్వచ్ఛందంగా పథకం నుండి తప్పుకుంటే, మళ్లీ తిరిగి చేరవచ్చు. 'Voluntary Surrender Revocation' ఆప్షన్‌పై క్లిక్ చేయండి. ఆధార్ నంబర్ లేదా రిజిస్ట్రేషన్ నంబర్ ద్వారా మీరు మళ్లీ పథకంలో చేరవచ్చు.

రాష్ట్ర బదిలీ అభ్యర్థన (State Transfer Request): ఈ కొత్త ఆప్షన్ ద్వారా తప్పు చిరునామా కారణంగా పథకానికి అర్హులు కారని రిజెక్ట్ చేస్తే.. లబ్ధిదారులు తమ చిరునామాను సరి చేసుకోవచ్చు. ఇది వారి వ్యవసాయ భూమి స్థలం అడ్రస్. ఒకవేళ వారికి ప్రస్తుత విడత డబ్బులు వచ్చే ప్రక్రియ నడుస్తుంటే, చిరునామా మార్పు లేట్ అవుతుంది. ఆ డబ్బులు అందిన తర్వాతే అడ్రస్ మార్పు జరుగుతుంది. లబ్ధిదారులు తమ పేరు మీద ఉన్న వ్యవసాయ భూమికి సంబంధించిన పత్రాల రుజువును తప్పనిసరిగా అప్‌లోడ్ చేయాలి.

హెల్ప్‌డెస్క్ ప్రశ్న ఫారం (Helpdesk Query Form): మీకు పీఎం కిసాన్ డబ్బులు రాకపోతే, లేదా ఆగిపోతే, లేదా ఈ పథకానికి సంబంధించి ఏమైనా సమస్యలు ఉంటే, మీరు ఆన్‌లైన్‌లో 'క్వెరీ ఫారం' (Query Form) నింపి పోర్టల్ ద్వారా సమాచారం పొందవచ్చు.

పీఎం కిసాన్ పథకం అంటే ఏమిటి?

పీఎం కిసాన్ సమ్మాన్ నిధి యోజన అనేది రైతు కుటుంబాల కోసం ఉద్దేశించిన పథకం. 'కుటుంబం' అంటే భార్య, భర్త, ఇద్దరు మైనర్ పిల్లలు. పథకం నియమాల ప్రకారం పీఎం కిసాన్ డబ్బులు రైతు కుటుంబానికి వస్తాయి. అంటే, కుటుంబంలోని ఏదో ఒక సభ్యుడి ఖాతాలో ఏడాదికి రూ. 6,000(రూ. 2,000 చొప్పున మూడు విడతలలో) నేరుగా బ్యాంకు ఖాతాలో జమ అవుతాయి. ఈ కొత్త మార్పులు రైతులకు మరింత సౌలభ్యం, పారదర్శకతను అందిస్తాయని ఆశిస్తున్నారు.