PM Kisan : రైతులకు గుడ్ న్యూస్..నేడే పీఎం కిసాన్ 20వ విడుత డబ్బులు

PM Kisan : దేశంలోని రైతులకు కేంద్ర ప్రభుత్వం అందిస్తున్న ఆర్థిక సహాయం ప్రధానమంత్రి కిసాన్ సమ్మాన్ నిధి పథకం. ఈ పథకం కింద 20వ విడత నిధులను కేంద్రం నేడు అంటే శనివారం (ఆగస్టు 2) విడుదల చేయనుంది. ఈ డబ్బులు నేరుగా అర్హులైన రైతుల బ్యాంకు ఖాతాల్లో జమ అవుతాయి. మొత్తం 9.7 కోట్లకు పైగా రైతుల ఖాతాల్లోకి రూ.20,500 కోట్లు విడుదల కానున్నాయి. ఒక్కో రైతుకు రూ.2,000 చొప్పున ఈ సహాయం అందుతుంది. ప్రధాని నరేంద్ర మోదీ ఈ రోజు ఉదయం 11 గంటలకు ఉత్తరప్రదేశ్‌లోని వారణాసిలో జరిగే ఒక కార్యక్రమంలో ఈ నిధులను విడుదల చేస్తారు. ఈ సందర్భంగా ఆయన రైతులను ఉద్దేశించి ప్రసంగిస్తారు. దేశవ్యాప్తంగా వివిధ ప్రాంతాల నుంచి రైతులు ఈ కార్యక్రమాన్ని వీక్షించేందుకు ఏర్పాట్లు చేశారు.

2019లో ప్రారంభమైన ఈ పథకం ద్వారా చిన్న, సన్నకారు రైతులకు ఏడాదికి రూ.6,000 ఆర్థిక సహాయం అందిస్తారు. ఈ డబ్బును మూడు విడతల్లో, అంటే ఒక్కో విడతకు రూ.2,000 చొప్పున రైతుల ఖాతాల్లో నేరుగా జమ చేస్తారు. ఇప్పటివరకు 19 విడతలుగా మొత్తం రూ.3.69 లక్షల కోట్ల నిధులను ప్రభుత్వం విడుదల చేసింది. ఈ పథకం వల్ల దేశంలోని కోట్లాది మంది రైతులకు ఎంతో మేలు జరుగుతోంది.

మీ పేరు బెనిఫిషరీ లిస్ట్‌లో ఉందో లేదో ఇలా తెలుసుకోండి

పీఎం కిసాన్ పథకంలో లబ్ధిదారుల జాబితాలో మీ పేరు ఉందో లేదో తెలుసుకోవడం చాలా సులభం. ఈ క్రింది పద్ధతిని అనుసరించి మీ పేరును చెక్ చేసుకోండి.

* ముందుగా, పీఎం కిసాన్ అధికారిక వెబ్‌సైట్ pmkisan.gov.in ను ఓపెన్ చేయండి.

* హోమ్ పేజీలో కొంచెం కిందకు స్క్రోల్ చేస్తే 'Farmers Corner' అనే విభాగం కనిపిస్తుంది.

* అందులో 'Beneficiary List' అనే ఆప్షన్‌పై క్లిక్ చేయండి.

* తర్వాత మీ రాష్ట్రం, జిల్లా, తాలూకా, గ్రామాన్ని ఎంచుకుని 'Get Report' లేదా 'Fetch Data' బటన్‌ను నొక్కండి.

* ఇప్పుడు మీరు ఎంచుకున్న గ్రామంలో అర్హులైన రైతుల జాబితా కనిపిస్తుంది. ఆ జాబితాలో మీ పేరు ఉందో లేదో చూసుకోండి.

ఒకవేళ మీ పేరు జాబితాలో ఉండి, మీకు డబ్బులు రాకపోతే కొన్ని కారణాలు ఉండవచ్చు. ముఖ్యంగా, ఇ-కేవైసీ పూర్తి చేయకపోవడం, లేదా మీ బ్యాంక్ ఖాతాకు ఆధార్ లింక్ కాకపోవడం వంటివి ప్రధాన కారణాలు. ఇలాంటి సమస్యలు ఉంటే, వెంటనే మీ సమీపంలోని రైతు సహాయ కేంద్రం లేదా అగ్రికల్చర్ ఆఫీసర్‌ను సంప్రదించి పరిష్కరించుకోండి.