Budget 2026 : సామాన్యుడి జేబు నిండిన వేళ..ఏడేళ్లలో మారిన టాక్స్ రూపురేఖలు

Budget 2026 : ఫిబ్రవరి 1, 2026.. యావత్ భారత్ ఎదురుచూస్తున్న రోజు. కేంద్ర ఆర్థిక మంత్రి నిర్మలా సీతారామన్ తన తొమ్మిదవ బడ్జెట్‌ను ప్రవేశపెట్టబోతున్నారు. 2019 జూలై 5న ఆమె తన తొలి బడ్జెట్‌ను సమర్పించినప్పటి నుండి నేటి వరకు భారత పన్నుల వ్యవస్థలో విప్లవాత్మక మార్పులు వచ్చాయి. సామాన్యుడిని ఊరడించడం నుంచి పన్ను చెల్లింపు ప్రక్రియను సులభతరం చేయడం వరకు ఆమె వేసిన అడుగులు మధ్యతరగతి ప్రజల జేబులను ఎలా నింపాయో, పన్నుల ప్రపంచం ఎలా మారిపోయిందో ఈ కథనంలో వివరంగా తెలుసుకుందాం.

నిర్మలా సీతారామన్ తన తొలి బడ్జెట్‌లోనే మధ్యతరగతి ప్రజల నాడిని పట్టుకున్నారు. 2019లో ప్రవేశపెట్టిన అఫోర్డబుల్ హౌసింగ్ పథకం ద్వారా ఇల్లు కొనేవారికి అదనంగా రూ.1.5 లక్షల వడ్డీ మినహాయింపును ప్రకటించారు. దీనివల్ల హోమ్ లోన్ వడ్డీపై పొందే మొత్తం రాయితీ రూ.3.5 లక్షలకు చేరింది. తెలుగు రాష్ట్రాల్లోని హైదరాబాద్, విశాఖపట్నం వంటి నగరాల్లో రియల్ ఎస్టేట్ రంగం పుంజుకోవడానికి, మధ్యతరగతి ప్రజలు ధైర్యంగా అప్పు చేసి ఇల్లు కొనడానికి ఈ నిర్ణయం పెద్ద ఊతమిచ్చింది.

2020లో కరోనా మహమ్మారి అలుముకుంటున్న సమయంలో ఆమె ఒక సాహసోపేతమైన నిర్ణయం తీసుకున్నారు. అదే న్యూ టాక్స్ రీజీమ్. పాత పద్ధతిలో పెట్టుబడులు చూపిస్తూ మినహాయింపులు కోరాల్సిన అవసరం లేకుండా, నేరుగా తక్కువ పన్ను రేట్లతో ఈ విధానాన్ని తెచ్చారు. మొదట్లో దీనిపై ప్రజల్లో సందేహాలున్నా, 2023లో దీనిని 'డీఫాల్ట్' విధానంగా మార్చడం ద్వారా ప్రభుత్వం తన ఉద్దేశాన్ని స్పష్టం చేసింది. పెట్టుబడుల గొడవ లేకుండా ప్రశాంతంగా పన్ను చెల్లించాలనుకునే యువతకు ఇది వరంగా మారింది.

పన్ను చెల్లింపుదారులకు అధికారులు వేధింపులు లేకుండా చేసేందుకు 2021లో ఫేస్‌లెస్ అసెస్‌మెంట్ ను ప్రవేశపెట్టారు. దీనివల్ల పన్ను చెల్లింపుదారుడు నేరుగా అధికారిని కలవాల్సిన అవసరం లేకుండా ఆన్‌లైన్ ద్వారానే అప్పీళ్లను పరిష్కరించుకునే వీలు కలిగింది. అలాగే డిజిటల్ అసెట్స్ (క్రిప్టోకరెన్సీ) పై 30 శాతం పన్ను విధించడం ద్వారా, వర్చువల్ లావాదేవీలను చట్టబద్ధం చేసి ప్రభుత్వం తన నియంత్రణలోకి తెచ్చింది. ఇది ఇన్వెస్టర్లకు ఒక స్పష్టతను ఇచ్చింది.

నిర్మలా సీతారామన్ ప్రవేశపెట్టిన బడ్జెట్లలో 2025 బడ్జెట్ మైలురాయిగా నిలిచిపోతుంది. ఏటా రూ.12 లక్షల వరకు సంపాదన ఉన్న ఉద్యోగులకు పన్ను కట్టాల్సిన అవసరం లేకుండా ఆమె వెసులుబాటు కల్పించారు. స్టాండర్డ్ డిడక్షన్ పెంచడం, టాక్స్ స్లాబులను సవరించడం ద్వారా దాదాపు రూ.12.75 లక్షల ఆదాయం వరకు ఒక రూపాయి కూడా పన్ను చెల్లించాల్సిన పని లేకుండా పోయింది. దీనివల్ల తెలుగు రాష్ట్రాల్లోని సాఫ్ట్‌వేర్ ఉద్యోగులు, చిన్న వ్యాపారస్తులకు పెద్ద ఎత్తున నగదు ఆదా అయ్యింది. మరి రాబోయే 2026 బడ్జెట్‌లో ఆమె ఎలాంటి వరాలు కురిపిస్తారోనని దేశమంతా ఆసక్తిగా ఎదురుచూస్తోంది.