RBI : ముత్తూట్ ఫైనాన్స్కు ఆర్బీఐ బిగ్ షాక్.. నిబంధనలు పాటించనందుకు 6 కంపెనీలపై భారీ జరిమానా
6 కంపెనీలపై భారీ జరిమానా
RBI : భారతీయ బ్యాంకింగ్ రంగ నియంత్రణ సంస్థ అయిన రిజర్వ్ బ్యాంక్ ఆఫ్ ఇండియా నిబంధనలను బేఖాతరు చేసే ఆర్థిక సంస్థలపై తన పంథాను మరింత కఠినతరం చేసింది. నిర్దేశిత నియమ నిబంధనలను సరిగ్గా పాటించని కారణంగా ప్రముఖ నాన్-బ్యాంకింగ్ ఫైనాన్షియల్ కంపెనీ (NBFC) అయిన ముత్తూట్ ఫైనాన్స్తో సహా మొత్తం ఆరు ఆర్థిక సంస్థలపై ఆర్బీఐ లక్షల రూపాయల జరిమానా విధించింది. వేర్వేరు నియామక నిబంధనలను ఉల్లంఘించినందుకే ఈ చర్యలు తీసుకున్నట్లు కేంద్ర బ్యాంక్ వెల్లడించింది. అయితే, ఈ జరిమానాలు కేవలం ఆయా కంపెనీల అంతర్గత నిబంధనల లోపాల వల్లే విధించామని, దీనివల్ల కస్టమర్ల అకౌంట్లు లేదా లావాదేవీలపై ఎలాంటి ప్రత్యక్ష ప్రభావం ఉండదని ఆర్బీఐ స్పష్టం చేసింది.
ఏ కంపెనీపై ఎంత పెనాల్టీ?
ఆర్బీఐ విడుదల చేసిన అధికారిక నోటిఫికేషన్ ప్రకారం.. ఈ ఆరు కంపెనీల్లో అవైల్ ఫైనాన్షియల్ సర్వీసెస్ పై అత్యధికంగా రూ.6.20 లక్షల జరిమానా పడింది. ఆ తర్వాత స్థానంలో ఉన్న ముత్తూట్ ఫైనాన్స్పై రూ.5.80 లక్షల పెనాల్టీ విధించారు. వీటితో పాటు సత్యా మైక్రోక్యాపిటల్ సంస్థకు రూ.3.10 లక్షలు, పాన్ ఇమామి కాస్మెడ్కు రూ.3.10 లక్షల జరిమానా పడింది. అలాగే ధని లోన్స్ అండ్ సర్వీసెస్, ముత్తూట్ వెహికల్ అండ్ అసెట్ ఫైనాన్స్ కంపెనీలపై చెరో రూ.2.70 లక్షల చొప్పున రిజర్వ్ బ్యాంక్ జరిమానా విధించింది.
ముత్తూట్ ఫైనాన్స్ చేసిన తప్పేంటి?
భారీ నెట్వర్క్ ఉన్న ముత్తూట్ ఫైనాన్స్ కంపెనీపై జరిమానా విధించడానికి గల కారణాలను ఆర్బీఐ సుదీర్ఘంగా వివరించింది. ఈ కంపెనీ తన కస్టమర్ల ఖాతాల్లోని రిస్క్ అంశాలను ఎప్పటికప్పుడు సమీక్షించేందుకు సరైన అంతర్గత వ్యవస్థను ఏర్పాటు చేయలేదు. అంతేకాకుండా అనుమానాస్పద ఆర్థిక లావాదేవీలను సకాలంలో గుర్తించి, వాటిని రిపోర్ట్ చేసేందుకు అవసరమైన బలమైన సాఫ్ట్వేర్ సిస్టమ్ను కూడా ముత్తూట్ ఫైనాన్స్ కలిగి లేదు. ఈ సాంకేతిక మరియు పర్యవేక్షణా లోపాల కారణంగానే ముత్తూట్ ఫైనాన్స్కు కేంద్ర బ్యాంక్ పెనాల్టీ వేసింది.
ఆర్బీఐ నిబంధనలు బ్రేక్
మరోవైపు, అత్యధిక జరిమానా ఎదుర్కొంటున్న అవైల్ ఫైనాన్షియల్ సర్వీసెస్ మేనేజింగ్ డైరెక్టర్ నిబంధనలకు విరుద్ధంగా మరో రెండు ఎన్బీఎఫ్సీ కంపెనీల్లో కూడా డైరెక్టర్గా కొనసాగుతున్నట్లు ఆర్బీఐ గుర్తించింది. అంతేకాకుండా ఈ కంపెనీ ఒకే కస్టమర్కు లేదా ఒకే గ్రూప్నకు ఆర్బీఐ నిర్దేశించిన పరిమితి కంటే ఎక్కువ మొత్తంలో రుణాలు ఇచ్చింది. ఇదే తప్పును పాన్ ఇమామి కాస్మెడ్ కంపెనీ కూడా చేసింది. తమ గ్రూప్ కంపెనీలకే లిమిట్ దాటి అప్పులు ఇవ్వడంతో దానికి పెనాల్టీ పడింది. అలాగే, సత్యా మైక్రోక్యాపిటల్ సంస్థ రీస్ట్రక్చర్ చేసిన కొన్ని లోన్ అకౌంట్లను సకాలంలో ఎన్పీఏ (NPA)గా ప్రకటించకపోవడం ఆర్బీఐ నిబంధనల ఉల్లంఘన కిందికే వచ్చింది.
కస్టమర్లు కంగారు పడాల్సిన అవసరం ఉందా?
ఈ ఆర్బీఐ చర్యల వల్ల సదరు ఫైనాన్స్ కంపెనీల్లో ఖాతాలు లేదా రుణాలు ఉన్న సాధారణ కస్టమర్లు ఎలాంటి ఆందోళన చెందాల్సిన అవసరం లేదని ఆర్థిక రంగ నిపుణులు చెబుతున్నారు. రిజర్వ్ బ్యాంక్ ఆఫ్ ఇండియా తన నిరంతర పర్యవేక్షణలో భాగంగా బ్యాంకులు, ఎన్బీఎఫ్సీల పనితీరును, ఆడిట్లను క్రమం తప్పకుండా తనిఖీ చేస్తుంది. ఎక్కడైనా నిబంధనల అమలులో లోపాలు కనిపిస్తే ఇలాంటి జరిమానాలు విధించడం సాధారణమే. ఈ చర్యల ముఖ్య ఉద్దేశం దేశ ఆర్థిక వ్యవస్థను మరింత పారదర్శకంగా, సురక్షితంగా మరియు నమ్మకమైనదిగా మార్చడమే. దీనివల్ల కంపెనీలు భవిష్యత్తులో నియమాలను మరింత పక్కాగా పాటిస్తాయి. కస్టమర్ల హక్కులు కూడా భద్రంగా ఉంటాయి.
