RD Vs SIP : నెలకు రూ.10 వేల పొదుపు.. ఆర్డీ మంచిదా? ఎస్ఐపి లాభదాయకమా?

RD Vs SIP : నెలనెలా పొదుపు చేయాలనుకునే వారికి మార్కెట్లో ప్రధానంగా కనిపించే రెండు ఆప్షన్లు RD (రికరింగ్ డిపాజిట్), SIP (సిస్టమాటిక్ ఇన్వెస్ట్‌మెంట్ ప్లాన్). నెలకు రూ.10,000 పొదుపు చేయగలిగితే.. 10, 15 లేదా 20 ఏళ్ల తర్వాత ఏ పథకం మిమ్మల్ని కోటీశ్వరుడిని చేస్తుంది? ఎక్కడ రిస్క్ తక్కువ, ఎక్కడ రిటర్న్స్ ఎక్కువ? దీనిపై పూర్తి వివరాలు తెలుసుకుందాం.

ఆర్డీ (RD) - భద్రతకు కేరాఫ్ అడ్రస్

బ్యాంకుల్లో చేసే రికరింగ్ డిపాజిట్ (RD) అనేది అత్యంత సురక్షితమైన మార్గం. ఇందులో మీరు నెలకు రూ.10,000 పెట్టుబడి పెడితే, సగటున 6.05% నుంచి 7% వరకు వడ్డీ లభిస్తుంది.

* 10 ఏళ్లకు: మీ పెట్టుబడి రూ. 12 లక్షలు కాగా, మెచ్యూరిటీ సమయానికి సుమారు రూ. 16.50 లక్షలు అందుతాయి.

* 15 ఏళ్లకు: మీ చేతికి సుమారు రూ. 29.27 లక్షలు వస్తాయి.

* 20 ఏళ్లకు: మీ నిధి దాదాపు రూ. 46.50 లక్షలకు చేరుతుంది.

ఇందులో ప్రధాన ప్రయోజనం ఏమిటంటే, మార్కెట్ ఎలా ఉన్నా మీ డబ్బుకు డోకా ఉండదు. ఫిక్స్‌డ్ రిటర్న్స్ వస్తాయి. రిస్క్ తీసుకోవడం ఇష్టం లేని వారికి ఇది బెస్ట్ ఛాయిస్.

ఎస్ఐపి (SIP) - సంపద సృష్టించే మంత్రం

మ్యూచువల్ ఫండ్స్‌లో చేసే ఎస్ఐపి (SIP) మార్కెట్ ఒడిదుడుకులకు లోబడి ఉంటుంది. ఇందులో రిస్క్ ఉన్నప్పటికీ, దీర్ఘకాలంలో భారీ రిటర్న్స్ వచ్చే అవకాశం ఉంది.

* డెట్ ఫండ్స్: 6-7% రిటర్న్స్ వస్తాయి, ఇవి దాదాపు ఆర్డీ లాగే ఉంటాయి.

* హైబ్రిడ్ ఫండ్స్: 8-10% రిటర్న్స్ వచ్చే అవకాశం ఉంది. దీనివల్ల 20 ఏళ్లలో మీ పెట్టుబడి రూ. 57 లక్షల వరకు చేరవచ్చు.

* ఈక్విటీ ఫండ్స్: ఇక్కడే అసలైన మ్యాజిక్ ఉంటుంది. 12% నుంచి 15% వరకు రిటర్న్స్ వస్తే.. మీరు 20 ఏళ్లలో రూ. 10,000 చొప్పున పెట్టుబడి పెడితే, మీ నిధి రూ. 1 కోటి నుంచి రూ. 1.5 కోట్లకు కూడా చేరవచ్చు.

రిస్క్, ఫ్లెక్సిబిలిటీ

ఆర్డీలో వడ్డీ రేటు ముందే ఖరారు అవుతుంది, కాబట్టి టెన్షన్ ఉండదు. కానీ ఎస్ఐపిలో మార్కెట్ పడిపోయినప్పుడు మీ ఫండ్ విలువ తగ్గే అవకాశం ఉంటుంది. అయితే, 10 ఏళ్లకు పైగా ఇన్వెస్ట్ చేసే వారికి ఎస్ఐపి ఎప్పుడూ మెరుగైన ఫలితాలనే ఇచ్చింది. ఫ్లెక్సిబిలిటీ విషయంలో కూడా ఎస్ఐపి టాప్. మీరు ఎప్పుడైనా పెట్టుబడిని పెంచుకోవచ్చు, తగ్గించుకోవచ్చు లేదా అవసరమైతే మధ్యలోనే ఆపేయవచ్చు.

ఏది ఎంచుకోవాలి?

* మీరు నిర్ణయం తీసుకునే ముందు మీ లక్ష్యం ఏమిటో ఆలోచించండి.

* పిల్లల పెళ్లిళ్లు లేదా రిటైర్మెంట్: 15-20 ఏళ్ల సుదీర్ఘ లక్ష్యం ఉంటే ఎస్ఐపి (ఈక్విటీ) ఉత్తమం.

* అత్యవసర నిధి లేదా స్వల్పకాలిక లక్ష్యం: 3-5 ఏళ్ల కోసం అయితే ఆర్డీ లేదా డెట్ ఫండ్స్ సురక్షితం.

* మిశ్రమ వ్యూహం: రిస్క్ తగ్గించుకోవడానికి కొంత డబ్బును ఆర్డీలో, మరికొంత ఎస్ఐపిలో విభజించి పెట్టుబడి పెట్టడం తెలివైన పని.