IPO Year 2025 : భారత ఐపీఓ చరిత్రలో రికార్డ్..డొనాల్డ్ ట్రంప్ టారిఫ్‌లు ఉన్నా ఆగని ఐపీఓల ప్రవాహం

IPO Year 2025 : ఈ ఏడాది భారతీయ స్టాక్ మార్కెట్ అనేక అనిశ్చితులను ఎదుర్కొన్నప్పటికీ ఒక విషయంలో మాత్రం స్థిరంగా దూసుకుపోయింది. అదే ఐపీఓ మార్కెట్. మార్కెట్ ఒడిదొడుకులను లెక్కచేయకుండా కంపెనీలు తమ షేర్లను విక్రయించడానికి ముందుకు వచ్చాయి. ఈ ఏడాది 2025లో ఇప్పటివరకు ఐపీఓల ద్వారా కంపెనీలు ఏకంగా రూ.1.6 లక్షల కోట్లకు పైగా నిధులను సేకరించాయి. ఇది సరికొత్త రికార్డ్. ఈ మొత్తం గత ఏడాది రికార్డును కూడా దాటిపోయింది. ఇంకా సంవత్సరం ముగియడానికి ఒక నెల సమయం ఉండగా మీషో, ఎక్విటస్, విద్యా వైర్స్ వంటి కంపెనీలు కూడా తమ ఐపీఓలను ప్రకటించడంతో ఈ మొత్తం రూ.2 లక్షల కోట్ల మార్కును చేరుకునే అవకాశం ఉంది.

ఐపీఓల ద్వారా భారీ నిధుల సమీకరణ

డొనాల్డ్ ట్రంప్ విధించిన టారిఫ్‌ల వంటి అంతర్జాతీయ ఒత్తిడిని తట్టుకుని, భారత స్టాక్ మార్కెట్ నిలకడగా వృద్ధి చెందుతోంది. ఈ అనిశ్చితి ఉన్నప్పటికీ, కంపెనీలు మార్కెట్‌పై తమ నమ్మకాన్ని కోల్పోలేదు. 2025లో ఐపీఓల ద్వారా కంపెనీలు ఇప్పటివరకు రూ.1.6 లక్షల కోట్లకు పైగా నిధులను సమీకరించాయి. ఇది 2024లో సేకరించిన రూ.1.59 లక్షల కోట్ల రికార్డును అధిగమించింది.

ప్రముఖ సంస్థలు తమ ఐపీఓలను ప్రకటించడంతో ఈ మొత్తం మరింత పెరిగే అవకాశం ఉంది. ఉదాహరణకు మీషో లిమిటెడ్ సుమారు రూ.5,421 కోట్లు, ఎక్విటస్ లిమిటెడ్ రూ.921 కోట్లు, విద్యా వైర్స్ లిమిటెడ్ రూ.300 కోట్ల నిధులను సమీకరించాలని లక్ష్యంగా పెట్టుకున్నాయి.

సెప్టెంబర్ నెల కీలకం

ఈ సంవత్సరపు ఐపీఓల వృద్ధిలో సగం నిధులు కేవలం సెప్టెంబర్ నెల తర్వాతే వచ్చాయి. మనీకంట్రోల్ నివేదిక ప్రకారం.. మరో పది కంపెనీలు సుమారు రూ.25,000 కోట్ల విలువైన ఐపీఓలను తీసుకురావడానికి సన్నాహాలు చేస్తున్నాయి. దీనితో ఈ ఏడాది మొత్తం ఐపీఓ నిధుల సమీకరణ దాదాపు రూ.2 లక్షల కోట్ల మార్కును చేరుకోవచ్చని అంచనా వేస్తున్నారు.

పాత పెట్టుబడిదారులదే పైచేయి

ఈ ఏడాది ఐపీఓల ద్వారా నిధులు భారీగా సమకూరినప్పటికీ ఇందులో ఆఫర్ ఫర్ సేల్ వాటానే అధికంగా ఉంది. కంపెనీ యజమానులు, ప్రైవేట్ ఇన్వెస్ట్‌మెంట్ సంస్థలు, వెంచర్ క్యాపిటల్ ఫండ్‌ల వంటి పాత పెట్టుబడిదారులు OFS ద్వారా రూ.లక్ష కోట్ల కంటే ఎక్కువ విలువైన షేర్లను విక్రయించారు. 2024లో OFS ద్వారా రూ.95,300 కోట్లు సమకూరగా, కొత్త షేర్ల అమ్మకం ద్వారా కేవలం రూ.64,500 కోట్లు మాత్రమే వచ్చాయి.

2021 నుంచి 2025 వరకు భారతీయ కంపెనీలు షేర్ మార్కెట్ నుంచి రూ.5.4 లక్షల కోట్లు సమీకరించగా, అందులో మూడింట రెండు వంతుల (దాదాపు రూ.3.37 లక్షల కోట్లు) డబ్బు OFS ద్వారా పాత పెట్టుబడిదారులు షేర్లను అమ్మడం ద్వారానే వచ్చింది.

విదేశీ పెట్టుబడిదారుల విశ్వాసం

ఈక్విటీ మార్కెట్లలో భారీ అస్థిరత ఉన్నప్పటికీ కొత్తగా వచ్చిన ఐపీఓలు ఇన్వెస్టర్లలో ఉత్సాహాన్ని పెంచాయి. ముఖ్యంగా గ్రో మాతృ సంస్థ బిలియన్‌బ్రెయిన్ గ్యారేజ్ వెంచర్స్, ఫిన్‌టెక్ కంపెనీ పైన్‌ ల్యాబ్స్, ఫిజిక్స్‌వాలా వంటి సంస్థల ఐపీఓలు విజయవంతం కావడంతో పెట్టుబడిదారుల నమ్మకం పెరిగింది. విదేశీ పెట్టుబడిదారులు ఇతర మార్కెట్‌లలో సుమారు 24 బిలియన్ డాలర్ల విలువైన షేర్లను విక్రయించినప్పటికీ, భారతీయ కొత్త ఐపీఓలలో మాత్రం ఏకంగా 7.55 బిలియన్ డాలర్ల వరకు పెట్టుబడి పెట్టారు. ఇది భారతీయ స్టాక్ మార్కెట్ సామర్థ్యంపై వారికున్న విశ్వాసాన్ని నిరూపిస్తుంది.