Post Office : రిజిస్టర్డ్ పోస్ట్ ఇకపై జ్ఞాపకమే.. పోస్టాఫీస్ కీలక సేవలకు గుడ్ బై

Post Office : పోస్టాఫీస్ అందించే ముఖ్యమైన సేవలలో ఒకటైన రిజిస్టర్డ్ పోస్ట్ ఇకపై చరిత్రలో కలిసిపోనుంది. ఈ సేవను నిలిపివేయాలని నిర్ణయించింది. ఈ మేరకు ఇటీవల ఒక సర్క్యులర్ కూడా విడుదల చేసింది. దీని ప్రకారం సెప్టెంబర్ 1 నుండి రిజిస్టర్డ్ పోస్ట్‌కు అధికారికంగా వీడ్కోలు పలకనున్నారు. ఆ రోజు నుంచి రిజిస్టర్డ్ పోస్ట్ సేవ, స్పీడ్ పోస్ట్ సేవ విలీనం కానున్నాయి. రిజిస్టర్డ్ పోస్ట్ అని పేరున్న పోస్టల్ శాఖ కార్యాలయానికి సంబంధించిన అన్ని పని పద్ధతులను జూలై 31 లోపు సవరించాలని సూచించారు. రిజిస్టర్డ్ పోస్ట్ స్థానంలో అది ఇకపై స్పీడ్ పోస్ట్ గా మారుతుంది. దీనితో పోస్టాఫీసులో రిజిస్టర్డ్ పోస్ట్ అనే ఒక అధ్యాయం ముగిసిపోతుంది.

సెప్టెంబర్ 1 నుండి పోస్ట్ ఆఫీసులో స్పీడ్ పోస్ట్ , సాధారణ పోస్ట్ సేవలు మాత్రమే అందుబాటులో ఉంటాయి. ఇవి ఉత్తరాలను పంపిణీ చేసే సేవలు. అయితే, పోస్టాఫీసులో ఉన్న రికరింగ్ డిపాజిట్, సుకన్య సమృద్ధి అకౌంట్ వంటి చిన్న పొదుపు పథకాలు యథావిధిగా కొనసాగుతాయి. వాటిలో ఎలాంటి మార్పు ఉండదు.

కొరియర్ సేవలు అందుబాటులోకి వచ్చే వరకు రిజిస్టర్డ్ పోస్ట్ చాలా విస్తృతంగా ఉపయోగంలో ఉండేది. ముఖ్యమైన ఉత్తరాలు రిజిస్టర్డ్ పోస్ట్ ద్వారానే పంపేవారు. కంపెనీల ఇంటర్వ్యూ లెటర్లు, అపాయింట్‌మెంట్ లెటర్లు, నోటీసులు వంటి ముఖ్యమైన పత్రాలన్నీ దీని ద్వారానే పంపేవారు. అన్నిటికంటే ముఖ్యంగా రిజిస్టర్డ్ పోస్ట్ చేస్తే అది కచ్చితంగా, సురక్షితంగా చేరుకుంటుంది అనే గట్టి నమ్మకం ఉండేది.

కొరియర్ సేవలు అందుబాటులోకి వచ్చిన తర్వాత రిజిస్టర్డ్ పోస్ట్‌కు డిమాండ్ నెమ్మదిగా తగ్గడం మొదలైంది. దీనిని అధిగమించడానికి పోస్టాఫీస్ స్పీడ్ పోస్ట్ సేవను ప్రారంభించింది. కొరియర్‌ల మాదిరిగానే, స్పీడ్ పోస్ట్‌లు ఒకటి లేదా రెండు రోజుల్లో గమ్యాన్ని చేరుకునేవి. ఇప్పుడు పోస్టాఫీసులో రిజిస్టర్డ్ పోస్ట్ స్థానంలో స్పీడ్ పోస్ట్ సేవ మాత్రమే కొనసాగనుంది. వినియోగదారుల అవసరాలకు అనుగుణంగా తపాలా శాఖ సేవలను ఆధునీకరిస్తోంది.