Mukesh Ambani : అంబానీ రేంజ్ అంటే ఇదే.. మూడు రోజుల్లోనే రూ. 1.35 లక్షల కోట్ల లాభం

Mukesh Ambani : భారతీయ స్టాక్ మార్కెట్ దిగ్గజం, ముకేశ్ అంబానీ నేతృత్వంలోని రిలయన్స్ ఇండస్ట్రీస్ (RIL) దలాల్ స్ట్రీట్‌లో కాసుల వర్షం కురిపిస్తోంది. కేవలం మూడు రోజుల్లోనే ఈ కంపెనీ సాధించిన విజయం చూస్తుంటే ఇన్వెస్టర్లకు కళ్లు బైర్లు కమ్మడం ఖాయం. అంబానీ కంపెనీ షేర్లు వరుసగా మూడు రోజులు లాభాల్లో పయనిస్తూ హ్యాట్రిక్ కొట్టడమే కాకుండా, కంపెనీ మార్కెట్ విలువను ఏకంగా రూ.1.35 లక్షల కోట్లు పెంచేసింది. మార్కెట్లు ఒడిదుడుకుల్లో ఉన్నా, రిలయన్స్ మాత్రం అప్రతిహతంగా దూసుకుపోతోంది.

మూడు రోజుల భారీ లాభం

రిలయన్స్ ఇండస్ట్రీస్ షేర్లు గత మూడు ట్రేడింగ్ సెషన్లలో అద్భుతమైన ప్రదర్శన కనబరిచాయి. గత వారం ముగిసే సమయానికి షేర్ ధర రూ.1,327 వద్ద ఉండగా, బుధవారం నాటికి ఇది ఏకంగా రూ.100 పెరిగి రూ.1,427 మార్కును తాకింది. అంటే కేవలం మూడు రోజుల్లోనే షేరు విలువ 7.50 శాతం పెరిగింది. కంపెనీ విడుదల చేసిన తాజా త్రైమాసిక ఫలితాలు అద్భుతంగా ఉండటంతో ఇన్వెస్టర్లు రిలయన్స్ షేర్లను కొనేందుకు ఎగబడుతున్నారు. బుధవారం మధ్యాహ్నం సమయానికి షేరు 2.77 శాతం లాభంతో దూసుకుపోయింది.

మార్కెట్ విలువలో సరికొత్త రికార్డు

ఈ మూడు రోజుల జోరుతో రిలయన్స్ మార్కెట్ క్యాపిటలైజేషన్ భారీగా పెరిగింది. గత శుక్రవారం నాటికి కంపెనీ విలువ రూ.18 లక్షల కోట్ల లోపే ఉండగా, ఇప్పుడు అది రూ.19.31 లక్షల కోట్లకు చేరుకుంది. కేవలం మూడు రోజుల్లోనే రూ.1,34,919 కోట్ల సంపద పెరిగింది. బుధవారం ఒక్క రోజే కంపెనీ విలువకు రూ.52,000 కోట్లు తోడయ్యాయి. ఇదే జోరు కొనసాగితే, త్వరలోనే రిలయన్స్ రూ.20 లక్షల కోట్ల మార్కెట్ క్యాప్ కలిగిన మొదటి భారతీయ కంపెనీగా రికార్డు సృష్టించబోతోంది.

మార్కెట్ వ్యతిరేక దిశలో కూడా జోరు

సాధారణంగా సెన్సెక్స్, నిఫ్టీ పడిపోయినప్పుడు అన్ని కంపెనీల షేర్లు నష్టపోతుంటాయి. కానీ మంగళవారం మార్కెట్లు నష్టాల్లో ఉన్నప్పటికీ, రిలయన్స్ షేర్లు మాత్రం లాభాల్లోనే ట్రేడ్ అవ్వడం విశేషం. ముకేశ్ అంబానీ నేతృత్వంలోని ఈ సంస్థకు ఉన్న నమ్మకం, బలానికి ఇది నిదర్శనం. సోమవారం 3 శాతం, మంగళవారం 1.68 శాతం, బుధవారం దాదాపు 3 శాతం చొప్పున షేరు విలువ పెరగడం ఇన్వెస్టర్లకు భారీ లాభాలను తెచ్చిపెట్టింది.

పెరగడానికి కారణాలేంటి?

రిలయన్స్ షేర్లు ఇలా పెరగడానికి ప్రధానంగా రెండు కారణాలు కనిపిస్తున్నాయి. ఒకటి, కంపెనీ ప్రకటించిన బంపర్ త్రైమాసిక ఫలితాలు. రెండోది, రిలయన్స్ జియో మరియు రిటైల్ రంగాల్లో కంపెనీ తీసుకుంటున్న దూకుడు నిర్ణయాలు. నిపుణుల అంచనా ప్రకారం, రాబోయే రోజుల్లో రిలయన్స్ నుంచి మరికొన్ని సానుకూల ప్రకటనలు వచ్చే అవకాశం ఉండటంతో విదేశీ ఇన్వెస్టర్లు కూడా భారీగా నిధులను కుమ్మరిస్తున్నారు. మొత్తానికి అంబానీ కంపెనీ హ్యాట్రిక్‎తో తన ఆధిపత్యాన్ని మరోసారి నిరూపించుకుంది.