Reliance vs Starlink: పోటీకి మేం సిద్ధం.. స్టార్‌లింక్‌కు రిలయన్స్ గట్టి కౌంటర్

Reliance vs Starlink: భారత టెలికాం వ్యాపార రంగంలో ప్రస్తుతం నడుస్తున్న పోటీపై ప్రముఖ దిగ్గజ సంస్థ రిలయన్స్ ఇండస్ట్రీస్ స్పష్టమైన ప్రకటన చేసింది. దేశీయ మార్కెట్లోకి కొత్త ఆలోచనలు, పెట్టుబడులను ఆకర్షించే ఎలాంటి ఆరోగ్యకరమైన పోటీనైనా తమ సంస్థ స్వాగతిస్తుందని స్పష్టం చేసింది. ప్రపంచ కుబేరుడు ఎలాన్ మస్క్‌కు చెందిన శాటిలైట్ ఇంటర్నెట్ సంస్థ స్టార్‌లింక్ భారత్‌లోకి అడుగుపెడుతున్న తరుణంలో రిలయన్స్ నుంచి ఈ వ్యాఖ్యలు రావడం ప్రాధాన్యత సంతరించుకుంది. దేశంలో వ్యాపారం చేసే ప్రతి సంస్థ ఇక్కడి చట్టాలకు, ప్రభుత్వ నిబంధనలకు కట్టుబడి పనిచేయాలని, ప్రభుత్వం ప్రతి దరఖాస్తునూ ఒకే రీతిలో నిష్పాక్షికంగా పరిశీలిస్తుందని కంపెనీ పేర్కొంది.

పోటీకి భయపడే ప్రసంగే లేదన్న కంపెనీ

పోటీ వస్తుందంటే తమకు ఎలాంటి భయం లేదని రిలయన్స్ స్పష్టమైన పదాల్లో తేల్చిచెప్పింది. కస్టమర్లకు ఎవరు అత్యుత్తమ నాణ్యమైన సేవలు అందిస్తారనేదే వ్యాపారంలో అసలైన పరీక్ష అని వ్యాఖ్యానించింది. ఈ సందర్భంగా తమ ప్రయాణాన్ని గుర్తుచేస్తూ, 2016లో జియో టెలికాం రంగంలోకి అడుగుపెట్టినప్పుడు ఒక్క వినియోగదారుడు కూడా లేరని పేర్కొంది. కానీ గడిచిన పదేళ్ల కాలంలో అత్యంత చౌకైన డేటా, మెరుగైన డిజిటల్ సేవలు అందించడం ద్వారా ఏకంగా 53 కోట్లకు పైగా వినియోగదారుల నమ్మకాన్ని గెలుచుకోగలిగామని వివరించింది.

స్టార్‌లింక్ రాకపై విస్పష్టమైన వైఖరి

శాటిలైట్ ఇంటర్నెట్ విభాగంలోకి స్టార్‌లింక్‌తో పాటు మరిన్ని విదేశీ సంస్థలు ప్రవేశించడాన్ని తాము ఏమాత్రం వ్యతిరేకించడం లేదని రిలయన్స్ తెలిపింది. అయితే జియోతో సహా దేశంలో సేవలు అందించే ఏ సంస్థయినా సరే ఇక్కడి నిబంధనలు, భద్రతా విధానాలను తప్పనిసరిగా పాటించాల్సి ఉంటుందని స్పష్టం చేసింది. దేశ పౌరులకు మెరుగైన సేవలు అందించడంతో పాటు భారతీయ చట్టాల చట్రంలోనే వ్యాపారం నిర్వహించాలని కోరింది. అదే సమయంలో జియోకు చెందిన సొంత శాటిలైట్ బ్రాడ్‌బాండ్ సేవలు కూడా ప్రస్తుతం ప్రభుత్వ తుది అనుమతుల కోసం నిరీక్షిస్తున్నాయని వెల్లడించింది.

చట్టాల పరిధిలోనే వ్యాపార నిర్వహణ ప్రాధాన్యం

భారతదేశంలో వ్యాపారం చేయాలనుకునే ఏ విదేశీ లేదా స్వదేశీ సంస్థ అయినా ఇక్కడి చట్టాలను గౌరవించాల్సిన అవసరం ఉందని రిలయన్స్ తన ప్రకటన ద్వారా తెలిపింది. ప్రభుత్వం అందరికీ సమానమైన వేదికను కల్పిస్తున్నప్పుడు, ప్రతి కంపెనీ పారదర్శకమైన పద్ధతుల్లోనే వ్యవహరించాలి. వినియోగదారుల భద్రత, డేటా గోప్యత వంటి అంశాల్లో ఎలాంటి రాజీ ఉండకూడదని ఆకాంక్షించింది. చివరికి వినియోగదారుడికి మేలు జరిగేలా అత్యుత్తమ సేవలు అందించడమే తమ ప్రధాన లక్ష్యమని స్పష్టం చేసింది.