Relief for Oil PSUs: గ్యాస్ ధరల ఎఫెక్ట్.. చమురు కంపెనీల నష్టాలు తీర్చనున్న ప్రభుత్వం!

Relief for Oil PSUs: ఇటీవల గ్యాస్ సిలిండర్ కొనుగోలు చేసి ఉంటే ధర గురించి కాస్త అసహనంగా ఉండవచ్చు. కానీ, ఇండియన్ ఆయిల్, భారత్ పెట్రోలియం, హిందుస్థాన్ పెట్రోలియం వంటి ప్రభుత్వ చమురు కంపెనీలు LPG సిలిండర్‌ను తమ ఉత్పత్తి వ్యయం కంటే తక్కువ ధరకు అమ్ముతున్నాయి? ఈ కారణంగా ఈ కంపెనీలు వేల కోట్ల రూపాయల నష్టాలను చవిచూశాయి. అయితే, ఇప్పుడు ప్రభుత్వం ఈ కంపెనీలకు ఉపశమనం కల్పించడానికి సిద్ధమవుతోంది. ప్రభుత్వం ఈ కంపెనీలకు రూ.30,000 నుండి రూ.35,000 కోట్ల వరకు సబ్సిడీని ఇవ్వొచ్చు. ఈ వార్త తర్వాత ఈ కంపెనీల షేర్లలో భారీ వృద్ధి నమోదయ్యే అవకాశం ఉంది.

ఫిబ్రవరి 2025లో వచ్చిన బడ్జెట్‌లో ఇలాంటి సబ్సిడీ గురించి ఎలాంటి ప్రస్తావన లేదు. అయితే, ఏప్రిల్‌లో ప్రభుత్వం గుట్టుచప్పుడు కాకుండా పెట్రోల్, డీజిల్ పై ఎక్సైజ్ డ్యూటీని పెంచింది. దీని ద్వారా ప్రభుత్వానికి దాదాపు రూ.32,000 కోట్ల అదనపు ఆదాయం వచ్చింది. ఇప్పుడు ఈ డబ్బును చమురు కంపెనీలకు జరిగిన నష్టాలను పూడ్చడానికి ఉపయోగిస్తారని భావిస్తున్నారు.

భారతదేశంలో LPG ధరలను ప్రభుత్వమే నిర్ణయిస్తుంది. తద్వారా సామాన్య ప్రజలకు అధిక ధరల నుంచి ఉపశమనం లభిస్తుంది. కానీ అంతర్జాతీయ మార్కెట్‌లో LPG ధరలు ఎక్కువగా ఉండటం వల్ల చమురు కంపెనీలు నష్టాలను చవిచూడాల్సి వస్తుంది. దీనిని అండర్-రికవరీ అంటారు. ఈ ఆర్థిక సంవత్సరంలో (2024-25) LPG అమ్మకాల వల్ల ఈ కంపెనీలకు దాదాపు రూ.40,500 కోట్ల నష్టం వస్తుందని అంచనా. భారతదేశంలో LPG కి ఇంత ఎక్కువ డిమాండ్ ఉండటంతో, దీనిని తీర్చడానికి బయటి నుండి గ్యాస్ కొనుగోలు చేయాల్సి వస్తుంది. దీనివల్ల ఈ నష్టం జరుగుతుంది.

ప్రభుత్వం ఏప్రిల్‌లో 14.2 కిలోల డొమెస్టిక్ గ్యాస్ సిలిండర్ ధరను రూ.50 పెంచింది. దీనివల్ల గ్యాస్ అసలు ధర, అమ్మకపు ధర మధ్య వ్యత్యాసం కొద్దిగా తగ్గింది. అంటే, చమురు కంపెనీలకు ఇప్పుడు మునుపటి కంటే కొంచెం తక్కువ నష్టం జరుగుతోంది. అయినప్పటికీ, నష్టం చాలా పెద్దది కావడంతో ప్రభుత్వం దానిని భర్తీ చేయడానికి చర్యలు తీసుకోవాల్సి వస్తుంది. ముందుగా, ప్రభుత్వం రెండేళ్లలో రూ.35,000 కోట్ల సబ్సిడీ ఇవ్వాలని ఆలోచించింది. కానీ ఇప్పుడు, పెట్రోల్-డీజిల్ పై పెరిగిన పన్నుల నుండి వచ్చిన అదనపు డబ్బును చమురు కంపెనీలకు పరిహారంగా ఇవ్వడానికి ప్లాన్ చేస్తున్నారు. ఈ డబ్బు కన్సాలిడేటెడ్ ఫండ్ ఆఫ్ ఇండియా నుండి ఇవ్వబడుతుందని ఒక అధికారి తెలిపారు. ఈ పరిహార ప్రణాళిక ఖరారు కాగానే దీనిని ఆమోదం కోసం క్యాబినెట్ కు పంపుతారు.

చమురు కంపెనీలకు ప్రభుత్వం సహాయం చేయడం ఇదే మొదటిసారి కాదు. గతంలో 2021-22, 2022-23 ఆర్థిక సంవత్సరాల్లో కూడా ప్రభుత్వం IOC, BPCL, HPCL కు రూ.22,000 కోట్ల సబ్సిడీని ఇచ్చింది. అయితే వాటి మొత్తం నష్టం రూ.28,249 కోట్ల. ఆ సమయంలో కూడా ఈ కంపెనీలు ఈ డబ్బును తమ ప్రాజెక్టులు మెరుగుపరచడానికి ఉపయోగించాయి. ఈ సబ్సిడీకి క్యాబినెట్ ఆమోదం లభించిన వెంటనే లేదా అధికారికంగా ప్రకటించిన వెంటనే, IOC, BPCL, HPCL షేర్లలో భారీ వృద్ధి కనిపించవచ్చు. స్టాక్ మార్కెట్ నిపుణులు దీనిని పాజిటివ్ ట్రిగ్గర్ గా భావిస్తున్నారు.