Rupee : రూపాయి రికార్డు పతనం.. చరిత్రలో తొలిసారిగా 94 మార్కును దాటేసిన డాలర్ విలువ

Rupee : భారతీయ కరెన్సీ రూపాయి విలువ మునుపెన్నడూ లేనంతగా పాతాళానికి పడిపోయింది. సోమవారం (మార్చి 24, 2026) ఫారెక్స్ మార్కెట్లో రూపాయి చరిత్రలో తొలిసారిగా 94 మార్కును దాటేసింది. డాలర్‌తో పోలిస్తే రూపాయి విలువ ఒకే రోజు 50 పైసలు క్షీణించి 94.03 వద్ద ముగియడం దేశ ఆర్థిక వ్యవస్థపై ఆందోళన కలిగిస్తోంది. అంతర్జాతీయ మార్కెట్లో ముడి చమురు ధరలు మండిపోవడం, విదేశీ ఇన్వెస్టర్లు మన స్టాక్ మార్కెట్ల నుంచి పెట్టుబడులను వెనక్కి తీసుకోవడమే ఈ భారీ పతనానికి ప్రధాన కారణాలుగా ఆర్థిక నిపుణులు విశ్లేషిస్తున్నారు.

ఏం జరిగింది? రూపాయి ఎందుకు పడిపోయింది?

ఇంటర్ బ్యాంక్ ఫారిన్ ఎక్స్ఛేంజ్ మార్కెట్లో సోమవారం ఉదయం రూపాయి 93.84 వద్ద ప్రారంభమైంది. రోజంతా బలహీనపడుతూ చివరకు 94.03 వద్ద స్థిరపడింది. గడిచిన కొద్ది రోజుల్లోనే రూపాయి విలువ భారీగా పడిపోవడం గమనార్హం. ఫిబ్రవరి 28న డాలర్ విలువ రూ.91.08 వద్ద ఉండగా, ఇప్పుడు అది రూ.94 దాటేసింది. ముఖ్యంగా ఇరాన్ యుద్ధం మొదలైనప్పటి నుంచి రూపాయి విలువ సుమారు 3.25 శాతం క్షీణించింది. అంతర్జాతీయంగా డాలర్ ఇండెక్స్ బలపడటం, దేశీయ షేర్ మార్కెట్లు భారీగా నష్టపోవడం రూపాయిని కోలుకోలేని దెబ్బ తీశాయి.

చమురు ధరలు.. విదేశీ నిధుల వెల్లువ

ముడి చమురు ధరలు అంతర్జాతీయ మార్కెట్లో బ్యారెల్ 113 డాలర్ల వద్ద ట్రేడ్ అవుతున్నాయి. భారత్ తన చమురు అవసరాల కోసం ఎక్కువగా దిగుమతులపైనే ఆధారపడుతుంది. చమురు ధరలు పెరిగితే మనం డాలర్ల రూపంలో ఎక్కువ చెల్లించాల్సి ఉంటుంది, ఇది రూపాయిపై ఒత్తిడి పెంచుతుంది. దీనికి తోడు విదేశీ సంస్థాగత ఇన్వెస్టర్లు భారత మార్కెట్ల నుంచి భారీగా నిధులను వెనక్కి తీసుకుంటున్నారు. గత శుక్రవారం ఒక్కరోజే విదేశీ ఇన్వెస్టర్లు రూ.5,518.39 కోట్ల విలువైన షేర్లను విక్రయించారు. ఈ పరిణామాలన్నీ రూపాయిని బలహీనపరిచాయి.

స్టాక్ మార్కెట్ల కుప్పకూత.. ఆవిరైన లక్షల కోట్లు

కరెన్సీ మార్కెట్ పతనం స్టాక్ మార్కెట్‌పై కూడా పెను ప్రభావం చూపింది. సోమవారం సెన్సెక్స్ ఏకంగా 1,836 పాయింట్లు పతనమై 72,696 వద్ద ముగియగా, నిఫ్టీ 484 పాయింట్లు నష్టపోయి 22,630 వద్ద స్థిరపడింది. మరోవైపు భారత విదేశీ మారక నిల్వలు కూడా తగ్గుముఖం పట్టాయి. మార్చి 13తో ముగిసిన వారానికి నిల్వలు 7.052 బిలియన్ డాలర్లు తగ్గి 709.759 బిలియన్ డాలర్లకు చేరుకున్నాయి. రిజర్వ్ బ్యాంక్ ఆఫ్ ఇండియా అప్పుడప్పుడు మార్కెట్లో జోక్యం చేసుకుంటున్నప్పటికీ, రూపాయి పతనం మాత్రం ఆగడం లేదు.

మున్ముందు పరిస్థితి ఏంటి?

రాబోయే రోజుల్లో రూపాయి విలువ మరింత పడిపోయే అవకాశం ఉందని మార్కెట్ విశ్లేషకులు హెచ్చరిస్తున్నారు. డాలర్-రూపాయి స్పాట్ ధర రూ. 93.60 నుంచి రూ.94.40 రేంజ్‌లో ఉండవచ్చని అంచనా వేస్తున్నారు. పశ్చిమ ఆసియాలో యుద్ధం ముదిరితే చమురు ధరలు ఇంకా పెరిగి రూపాయి విలువ 95 లేదా 96కు కూడా వెళ్లవచ్చని భయపడుతున్నారు. రూపాయి పడిపోవడం వల్ల విదేశీ చదువులు, దిగుమతి చేసుకునే ఎలక్ట్రానిక్ వస్తువులు, పెట్రోల్ ధరలు భారంగా మారనున్నాయి. కేవలం ఆర్బీఐ గట్టిగా జోక్యం చేసుకుంటేనే రూపాయికి కొంత ఊరట లభించే అవకాశం ఉంది.