Rupee Vs DoIlar : ఆర్బీఐ దెబ్బకు కుప్పకూలిన అమెరికా కరెన్సీ.. అంతర్జాతీయ వేదికపై పెరిగిన రూపాయి పవర్

Rupee Vs DoIlar : గ్లోబల్ మార్కెట్లలో నెలకొన్న తీవ్ర ఒడిదొడుకుల మధ్య భారత రూపాయి ఎట్టకేలకు కాస్త ఊపిరి పీల్చుకుంది. రిజర్వ్ బ్యాంక్ ఆఫ్ ఇండియాకి చెందిన ద్రవ్య పరపతి కమిటీ కీలక నిర్ణయాలు, అంతర్జాతీయ మార్కెట్లో ముడిచమురు ధరలు స్వల్పంగా తగ్గడం రూపాయికి కలిసి వచ్చింది. గత కొన్ని రోజులుగా అమెరికా డాలర్ చేతిలో దెబ్బతింటూ వచ్చిన దేశీ కరెన్సీ, గురువారం నాటి ట్రేడింగ్‌లో పుంజుకుని లాభాల్లో ముగిసింది. ఆర్బీఐ వడ్డీ రేట్ల ప్రకటనకు ముందే మార్కెట్ సానుకూలంగా స్పందించడం గమనార్హం.

95.74 వద్ద ముగిసిన రూపాయి విలువ

ఇంటర్‌బ్యాంక్ ఫారెక్స్ మార్కెట్ గణాంకాల ప్రకారం.. గురువారం ట్రేడింగ్ ప్రారంభంలో రూపాయి డాలర్‌తో పోలిస్తే 95.70 వద్ద ఓపెన్ అయింది. ఇంట్రాడే ట్రేడింగ్‌లో గరిష్టంగా 95.59 స్థాయిని, కనిష్టంగా 95.87 స్థాయిని తాకింది. చివరకు బుధవారం నాటి ముగింపుతో పోలిస్తే 2 పైసలు బలపడి 95.74 వద్ద స్థిరపడింది. దీనికి ముందు రోజు బుధవారం నాడు రూపాయి ఏకంగా 40 పైసలు క్షీణించి 95.76 వద్ద ముగిసిన సంగతి తెలిసిందే. ఆ నష్టాల నుంచి రూపాయి గురువారం నాటి సెషన్‌లో కొంతవరకు రికవరీ సాధించింది.

పశ్చిమ ఆసియా టెన్షన్ల ప్రభావం

ప్రస్తుతం పశ్చిమ ఆసియాలో అమెరికా, ఇరాన్ దేశాల మధ్య పెరుగుతున్న భౌగోళిక రాజకీయ ఉద్రిక్తతలు భారత ఆర్థిక రంగానికి పెద్ద సవాలుగా మారాయి. భారతదేశం తన ఇంధన అవసరాల కోసం అత్యధికంగా విదేశీ దిగుమతులపైనే ఆధారపడుతోంది. ఈ రెండు దేశాల మధ్య యుద్ధ వాతావరణం కారణంగా అంతర్జాతీయంగా ఎనర్జీ మార్కెట్లలో తీవ్ర అస్థిరత నెలకొంది. ఇన్వెస్టర్లు రిస్క్ తీసుకోకుండా సురక్షితమైన పెట్టుబడుల వైపు మొగ్గు చూపుతుండటంతో రూపాయి ఆశించిన స్థాయిలో వేగంగా పుంజుకోలేకపోతోంది.

రెపో రేటును 5.25 శాతంగా ఉంచే ఛాన్స్

ఆర్బీఐ గవర్నర్ సంజయ్ మల్హోత్రా నేతృత్వంలోని ఆరుగురు సభ్యుల ద్రవ్య పరపతి కమిటీ సమీక్షా నిర్ణయాలపైనే ప్రస్తుతం మార్కెట్ వర్గాల దృష్టంతా నిలిచింది. పశ్చిమ ఆసియా సంక్షోభం కారణంగా అంతర్జాతీయంగా ద్రవ్యోల్బణం పెరిగే ముప్పు పొంచి ఉందని ఆర్థిక నిపుణులు భావిస్తున్నారు. ఈ నేపథ్యంలో దేశీయ ఆర్థిక వృద్ధిని దెబ్బతీయకుండా ఉండేందుకు, ద్రవ్యోల్బణాన్ని అదుపులో ఉంచేందుకు ఆర్‌బీఐ తన కీలకమైన రెపో రేటును ప్రస్తుతానికి 5.25 శాతం వద్దే యథాతథంగా కొనసాగించే అవకాశం ఉందని మార్కెట్ విశ్లేషకులు అంచనా వేస్తున్నారు.

ముడిచమురు, డాలర్ ఇండెక్స్ డౌన్

ఇదే సమయంలో అంతర్జాతీయంగా డాలర్ ఇండెక్స్ , బ్రెంట్ క్రూడ్ ధరలు తగ్గడం భారత్‌కు కలిసొచ్చిన అంశం. ప్రపంచంలోని ఆరు ప్రధాన కరెన్సీలతో డాలర్ బలాన్ని లెక్కించే డాలర్ ఇండెక్స్ 0.21 శాతం క్షీణించి 99.31 వద్ద ట్రేడ్ అయింది. అలాగే అంతర్జాతీయ చమురు బెంచ్‌మార్క్ బ్రెంట్ క్రూడ్ ధర కూడా 2.04 శాతం తగ్గి ప్రతి బ్యారెల్‌కు 95.81 డాలర్లకు పడిపోయింది. రాబోయే రోజుల్లో అమెరికా ఉపాధి గణాంకాలు, ఆర్‌బీఐ విధానాల ఆధారంగా డాలర్-రూపాయి మార్పిడి రేటు 95.40 నుంచి 96.15 పరిధిలో కదలాడవచ్చని మిరాఏ అసెట్ షేర్‌ఖాన్ రీసెర్చ్ అనలిస్ట్ అనుజ్ చౌదరి తెలిపారు.

స్టాక్ మార్కెట్లలో పరిమిత లాభాలు

దేశీయ ఈక్విటీ మార్కెట్లు గురువారం నాటి సెషన్‌లో స్వల్ప లాభాలతో ముగిశాయి. బాంబే స్టాక్ ఎక్స్ఛేంజ్ సూచీ సెన్సెక్స్ 13.84 పాయింట్లు పెరిగి 74,360.01 వద్ద ముగియగా, నేషనల్ స్టాక్ ఎక్స్ఛేంజ్ సూచీ నిఫ్టీ 10.95 పాయింట్ల స్వల్ప లాభంతో 23,416.55 వద్ద స్థిరపడింది. అయితే విదేశీ సంస్థాగత ఇన్వెస్టర్లు భారత మార్కెట్ల నుంచి తమ పెట్టుబడులను ఉపసంహరించుకుంటూనే ఉన్నారు. గురువారం ఒక్కరోజే విదేశీ ఇన్వెస్టర్లు నికరంగా రూ.4,447.06 కోట్ల విలువైన షేర్లను విక్రయించడం మార్కెట్లో కొంత ఒత్తిడిని పెంచింది.