Stock Market : అమెరికా శుభవార్తతో కళకళలాడుతున్న స్టాక్ మార్కెట్లు.. సెన్సెక్స్-నిఫ్టీలో భారీ జంప్!
సెన్సెక్స్-నిఫ్టీలో భారీ జంప్!
Stock Market : అమెరికా నుంచి వచ్చిన ఒక సానుకూల వార్త కారణంగా భారత స్టాక్ మార్కెట్ ఈరోజు, నవంబర్ 12న భారీ ఉత్సాహంతో ప్రారంభమైంది. మునుపటి రోజు లాభాలను కొనసాగిస్తూ రెండు ప్రధాన సూచీలు - బీఎస్‌ఈ సెన్సెక్స్, ఎన్‌ఎస్‌ఈ నిఫ్టీ - ట్రేడింగ్‌ను గ్రీన్ మార్క్‌లో ప్రారంభించాయి. ముఖ్యంగా అమెరికన్ షట్‌డౌన్ ముగింపు వార్త దేశీయ ఇన్వెస్టర్లలో ఆత్మవిశ్వాసాన్ని నింపింది. ప్రారంభంలో సెన్సెక్స్ 367 పాయింట్లకు పైగా, నిఫ్టీ 139 పాయింట్లకు పైగా లాభపడింది.
నవంబర్ 12, బుధవారం నాటి ట్రేడింగ్ సెషన్ సానుకూల ధోరణితో ప్రారంభమైంది. 30 షేర్ల బీఎస్‌ఈ సెన్సెక్స్ ఇండెక్స్ 367.54 పాయింట్లు (0.44%) పెరిగి 84,238.86 స్థాయి వద్ద ప్రారంభమైంది. ఎన్‌ఎస్‌ఈ నిఫ్టీ 50 సూచీ 139.35 పాయింట్లు (0.54%) పెరిగి 25,834.30 వద్ద ఓపెన్ అయింది. ప్రారంభంలో వచ్చిన ఉత్సాహంతో ఉదయం 9:20 గంటల సమయానికి సెన్సెక్స్ మరింత పెరిగి 84,308 వద్ద (436 పాయింట్ల లాభంతో) ట్రేడ్ అవుతోంది, నిఫ్టీ 25,811 స్థాయి వద్ద కొనసాగుతోంది.
భారత మార్కెట్‌లో ఈ బలమైన వృద్ధికి ప్రధాన కారణం అమెరికా నుంచి వచ్చిన ఒక ముఖ్యమైన వార్త. అమెరికాలో కొనసాగుతున్న చారిత్రక ప్రభుత్వ షట్‌డౌన్ త్వరలో ముగియనుందనే వార్త వెలువడింది. ఈ సానుకూల పరిణామం ప్రపంచ ఆర్థిక వ్యవస్థపై నమ్మకాన్ని పెంచి, భారతీయ స్టాక్ మార్కెట్‌కు పెద్ద మద్దతుగా నిలిచింది.
బీఎస్‌ఈ టాప్ గెయినర్స్ : ఎటర్నల్, టీసీఎస్, భారతీ ఎయిర్‌టెల్, రిలయన్స్,
బీఎస్‌ఈ టాప్ లూజర్స్ : ఐటీసీ, ఏషియన్ పెయింట్స్, టైటాన్, హిందుస్తాన్ యూనిలీవర్,
మంగళవారం మార్కెట్ ముగింపు వివరాలు
నవంబర్ 11, మంగళవారం నాడు కూడా భారత మార్కెట్ లాభాలతోనే ముగిసింది, ఈరోజు ట్రేడింగ్‌కు అది బలాన్నిచ్చింది. సెన్సెక్స్ 335.97 పాయింట్లు (0.40%) పెరిగి 83,871.32 వద్ద ముగిసింది. నిఫ్టీ 50 120.60 పాయింట్లు (0.47%) పెరిగి 25,694.95 వద్ద ముగిసింది. నిఫ్టీ బ్యాంక్, నిఫ్టీ మిడ్‌క్యాప్, నిఫ్టీ ఆటో, నిఫ్టీ ఐటీ వంటి దాదాపు అన్ని ప్రధాన రంగాల సూచీలు లాభాలతో ముగిశాయి. నిఫ్టీ స్మాల్‌క్యాప్ 100 మాత్రం స్వల్పంగా నష్టాన్ని నమోదు చేసింది. మంగళవారం టాప్ గెయినర్స్ గా మహింద్రా, అదానీ పోర్ట్, హెచ్‌సీఎల్ టెక్, ఎటర్నల్, సన్ ఫార్మా నిలిచాయి.
