Crude Oil : గ్లోబల్ ఆయిల్ మార్కెట్‌కు పెద్ద ఊరట.. వార్త తెలియగానే 3 శాతం పడిపోయిన క్రూడాయిల్ ధరలు

Crude Oil : గత మూడు నెలలుగా అమెరికా, ఇరాన్ దేశాల మధ్య నడుస్తున్న తీవ్రమైన ఉద్రిక్తతలకు ఎట్టకేలకు తెరపడబోతోంది. ప్రపంచవ్యాప్తంగా చమురు ఆర్థిక వ్యవస్థను వణికించిన ఈ వివాదం ముగింపు దశకు చేరుకుంది. అమెరికా పంపిన శాంతి ప్రతిపాదనకు ఇరాన్ ప్రభుత్వం సూత్రప్రాయంగా అంగీకారం తెలిపింది. దీనివల్ల అంతర్జాతీయంగా అత్యంత కీలకమైన స్ట్రెయిట్ ఆఫ్ హోర్ముజ్ సముద్ర మార్గాన్ని మళ్లీ పూర్తిగా తెరవడానికి ఇరు దేశాలు అంగీకరించాయి. జూన్ 14వ తేదీన డోనాల్డ్ ట్రంప్ పుట్టినరోజు సందర్భంగా ఈ చారిత్రాత్మక శాంతి ఒప్పందం అధికారికంగా కుదిరే అవకాశం ఉందని అంతర్జాతీయ వర్గాలు వెల్లడించాయి. ఈ వార్త బయటకు రాగానే అంతర్జాతీయ మార్కెట్లో ముడి చమురు ధరలు ఒక్కసారిగా 3 శాతానికి పైగా పడిపోయాయి.

ప్రపంచ ఇంధన రంగానికి జీవనరేఖ

భూగోళ శాస్త్రం ప్రకారం.. పర్షియన్ గల్ఫ్‌ను అరబిక్ సముద్రంతో కలిపే ఈ చిన్న సముద్ర మార్గం ప్రపంచ చమురు సరఫరాకు అత్యంత కీలకమైన లైఫ్ లైన్ లాంటిది. అమెరికా ఎనర్జీ ఇన్ఫర్మేషన్ అడ్మినిస్ట్రేషన్ (EIA) లెక్కల ప్రకారం, ఈ రూట్ ద్వారా ప్రతిరోజూ ఏకంగా 2.09 కోట్ల బ్యారెళ్ల ముడి చమురు రవాణా అవుతుంది. అంటే ప్రపంచవ్యాప్తంగా వాడే మొత్తం చమురులో దాదాపు 20 శాతం వాటా కేవలం ఈ ఒక్క సన్నటి సముద్ర మార్గం గుండానే వెళ్లాలి. మార్కెట్ భాషలో చెప్పాలంటే, ప్రపంచంలో వాడే ప్రతి 5 ఆయిల్ బ్యారెళ్లలో ఒక బ్యారెల్ ఇక్కడి నుంచే ప్రయాణిస్తుంది. అందుకే ఇరాన్ ఈ మార్గాన్ని మూసివేయడంతో ప్రపంచవ్యాప్తంగా ఆయిల్ కొరత ఏర్పడి రేట్లు ఆకాశాన్ని తాకాయి.

ఆయిల్ మాత్రమే కాదు.. గ్యాస్ సప్లై కూడా ఇక్కడే

హోర్ముజ్ జలసంధి ప్రాధాన్యత కేవలం ముడి చమురుతోనే ముగిసిపోదు. ప్రపంచవ్యాప్తంగా జరిగే ఎల్‌ఎన్‌జీ వ్యాపారంలో కూడా 20 శాతం వాటా ఈ మార్గంపైనే ఆధారపడి ఉంది. ముఖ్యంగా ప్రపంచంలోనే అతిపెద్ద గ్యాస్ ఎగుమతి దేశమైన ఖతార్.. తన గ్యాస్ సిలిండర్ల సరుకును ఆసియా, యూరప్ దేశాలకు పంపడానికి ఈ రూట్‌నే వాడుతుంది. సౌదీ అరేబియా, ఇరాక్, యూఏఈ, కువైట్ వంటి అరబ్ దేశాల బిజినెస్ అంతా దీనిపైనే నడుస్తుంది. ఈ రూట్ గనుక క్లియర్ అయితే గ్యాస్ కొరత కూడా తీరిపోతుంది. అయితే, మార్కెట్ నిపుణుల అంచనా ప్రకారం.. ఇన్నాళ్లూ నిలిచిపోయిన సరఫరా మళ్లీ పాత ఫామ్‌లోకి రావడానికి కనీసం ఒక సంవత్సరం టైమ్ పట్టే అవకాశం ఉంది.

భారతదేశానికి ఎందుకు ఇంత లాభం?

ఈ రూట్ ఓపెన్ అవ్వడం వల్ల ప్రపంచంలోనే అత్యధికంగా లాభపడే దేశాల్లో భారతదేశం ముందు వరుసలో ఉంటుంది. ఎందుకంటే భారత్ తన దేశీయ అవసరాల కోసం దాదాపు 85 నుంచి 88 శాతం ముడి చమురును ఇతర దేశాల నుంచే దిగుమతి చేసుకుంటుంది. మన దేశానికి వచ్చే మొత్తం ఆయిల్ లో 35 నుంచి 40 శాతం వాటా ఈ హోర్ముజ్ జలసంధి దాటుకుని వచ్చే అరబ్ దేశాల నుంచే వస్తుంది. గతంలో ఈ రూట్ బంద్ అవ్వడం వల్లే ఇండియాలో పెట్రోల్, డీజిల్ రేట్లతో పాటు కమర్షియల్, డొమెస్టిక్ ఎల్‌పీజీ గ్యాస్ సిలిండర్ల ధరలను ప్రభుత్వం పెంచాల్సి వచ్చింది. ఇప్పుడు క్రూడాయిల్ రేట్లు తగ్గితే మన దేశీయ ఆయిల్ మార్కెటింగ్ కంపెనీలపై (HPCL, IOCL) భారం పూర్తిగా తగ్గిపోతుంది.

తగ్గనున్న ఇన్సూరెన్స్ ఛార్జీలు.. రూపాయికి బలం

హోర్ముజ్ రూట్ క్లియర్ అవ్వడం వల్ల భారతదేశానికి మరో పెద్ద అడ్వాంటేజ్ ఉంది. యుద్ధ వాతావరణం ఉన్నప్పుడు సముద్రంలో ప్రయాణించే పెద్ద పెద్ద ఆయిల్ షిప్‌లకు అంతర్జాతీయ ఇన్సూరెన్స్ కంపెనీలు భారీగా ప్రీమియం ఛార్జీలు వసూలు చేస్తాయి. దీనివల్ల ఆయిల్ రవాణా ఖర్చులు (షిప్పింగ్ కాస్ట్) విపరీతంగా పెరిగిపోతాయి. ఇప్పుడు పరిస్థితులు సాధారణ స్థితికి వస్తే ఆ అదనపు ఇన్సూరెన్స్ భారం తప్పుతుంది. ఫలితంగా భారతదేశానికి తక్కువ ధరకే ఆయిల్ అందుతుంది. దీనివల్ల దేశ విదేశీ మారక ద్రవ్య నిల్వలు ఆదా అవుతాయి, కరెంట్ అకౌంట్ లోటు తగ్గుతుంది, దేశంలో ద్రవ్యోల్బణం అదుపులోకి వస్తుంది. అలాగే అంతర్జాతీయ మార్కెట్లో డాలర్‌తో పోలిస్తే మన రూపాయి విలువ మరింత స్థిరంగా మారుతుంది.

భారత్‌లో ఏ ఏ రంగాలకు పండగ?

చమురు ధరలు తగ్గడం వల్ల మన దేశంలోని కొన్ని కీలక రంగాలు లాభాల జాతర జరుపుకోనున్నాయి. ముఖ్యంగా ఏవియేషన్, లాజిస్టిక్స్, ట్రాన్స్‌పోర్ట్ , కెమికల్ పెయింట్ పరిశ్రమలకు ఈ నిర్ణయం అమృతం లాంటిది. ఎందుకంటే విమాన ఇంధనం, డీజిల్, పెయింట్స్ తయారీలో వాడే పెట్రోకెమికల్స్ ఖర్చులు భారీగా తగ్గిపోతాయి. తయారీ వ్యయం తగ్గడం వల్ల ఈ కంపెనీల లాభాల మార్జిన్ విపరీతంగా పెరుగుతుంది. అంతిమంగా కంపెనీల ఖర్చులు తగ్గితే, ఆ లాభాన్ని వినియోగదారులకు బదిలీ చేయడం ద్వారా సామాన్య ప్రజలపై కూడా ధరల భారం తగ్గి ఊరట లభించే అవకాశం పుష్కలంగా ఉంది.