LPG Ships : భారత్కు భారీ ఊరట.. పర్షియన్ గల్ఫ్లో చిక్కుకున్న భారతీయ ఓడలకు విముక్తి
భారతీయ ఓడలకు విముక్తి
LPG Ships : పశ్చిమాసియా ప్రాంతంలో నెలకొన్న అంతర్జాతీయ ఉద్రిక్తతల వల్ల ఆందోళనలో ఉన్న భారతదేశానికి సోమవారం ఉదయం ఒక అద్భుతమైన శుభవార్త అందింది. ప్రపంచవ్యాప్తంగా చమురు రవాణాకు అత్యంత కీలకమైన హోర్ముజ్ జలసంధి గుండా వాణిజ్య నౌకల రాకపోకలు మళ్లీ సురక్షితంగా ప్రారంభమయ్యాయి. అమెరికా, ఇరాన్ దేశాల మధ్య కుదిరిన శాంతి ఒప్పంద చర్చల ఫలితంగా ఈ సముద్ర మార్గంలో యుద్ధ మేఘాలు తొలగిపోయాయి. దీనివల్ల గత కొంతకాలంగా అక్కడ ఇరుక్కుపోయిన డజన్ల కొద్దీ భారతీయ, అంతర్జాతీయ నౌకలు క్షేమంగా తమ గమ్యస్థానాలకు బయలుదేరాయి.
భారీ గ్యాస్ లోడ్తో సురక్షితంగా బయటపడ్డ దిశా నౌక
ఈ రూట్ క్లియరెన్స్ ద్వారా లబ్ధి పొందిన మొట్టమొదటి భారతీయ నౌకగా దిశా అనే ఎల్ఎన్జీ క్యారియర్ రికార్డు సృష్టించింది. షిప్పింగ్ మంత్రిత్వ శాఖ డైరెక్టర్ ఓపేష్ కుమార్ శర్మ అందించిన సమాచారం ప్రకారం.. ఈ భారీ నౌక ఏకంగా 62,370 టన్నుల ద్రవీకృత సహజ వాయువు (LNG) లోడ్తో హోర్ముజ్ జలసంధిని అత్యంత సురక్షితంగా దాటేసింది. అంతా అనుకున్నట్లు జరిగితే ఈ నౌక జూన్ 18వ తేదీ నాటికి గుజరాత్లోని దాహేజ్ బంధరుకు చేరుకోనుంది. కాగా, ఇప్పటివరకు ఈ మార్గం గుండా 10 భారతీయ జెండా ఉన్న నౌకలు, 5 విదేశీ నౌకలు సురక్షితంగా బయటపడ్డాయి.
రైతులకు అవసరమైన ఎరువుల సరఫరా పునరుద్ధరణ
సముద్రంలో చిక్కుకుపోయిన మొత్తం 35 నౌకలలో.. భారతీయ రైతులకు అత్యంత అవసరమైన ఎరువులు ఉన్న ఓడలే ఎక్కువగా ఉన్నాయి. ఎరువుల శాఖ సంయుక్త కార్యదర్శి వందన ప్రేయసి తెలిపిన వివరాల ప్రకారం.. సుమారు 16 నౌకలలో భారీ మొత్తంలో ఎరువుల స్టాక్ ఉంది. ఇందులో 8 నౌకల్లో యూరియా, 4 నౌకల్లో డీఏపీ (DAP), 3 నౌకల్లో సల్ఫర్, ఒక నౌకలో అమ్మోనియా లోడ్ అయి ఉన్నాయి. ప్రస్తుత సాగు సీజన్లో ఈ ఎరువుల నౌకలు భారతదేశానికి చేరుకోవడం వల్ల దేశీయ వ్యవసాయ రంగానికి, కోట్లాది మంది రైతులకు పెద్ద ఊరట లభించనుంది. ఎరువుల కొరత భయాలు పూర్తిగా తొలగిపోనున్నాయి.
రాత్రికి రాత్రే తీరని ఇంధన ఇబ్బందులు
సముద్ర మార్గం తెరుచుకున్నప్పటికీ, భారతదేశానికి అవసరమైన పూర్తి స్థాయి గ్యాస్, చమురు సరఫరా సాధారణ స్థితికి రావడానికి మరికొంత సమయం పట్టే అవకాశం ఉంది. ఎందుకంటే ఇటీవల ఖతార్, యూఏఈ దేశాల్లోని చమురు క్షేత్రాలపై జరిగిన దాడుల వల్ల అక్కడి ఇంధన ప్రాసెసింగ్ యూనిట్లు తీవ్రంగా దెబ్బతిన్నాయి. ఖతార్ ఎనర్జీకి చెందిన రాస్ లఫాన్ ప్లాంట్లో రెండు గ్యాస్ ప్రాసెసింగ్ యూనిట్లు దెబ్బతినడం వల్ల ఉత్పత్తి సామర్థ్యం 17 శాతం పడిపోయింది. అలాగే యూఏఈకి చెందిన హబ్షాన్ గ్యాస్ ప్లాంట్ కూడా దెబ్బతింది. ప్రస్తుతం ఇది 60 శాతం సామర్థ్యంతో నడుస్తుండగా, 2026 చివరి నాటికి 80 శాతానికి చేరుకుంటుందని, పూర్తిగా కోలుకోవడానికి 2027 అవుతుందని అంచనా వేస్తున్నారు.
పశ్చిమ ఆసియా జలమార్గంపై భారత్ ఆధారపడటం
భారతదేశ ఆర్థిక వ్యవస్థ, ఇంధన భద్రతకు హోర్ముజ్ జలసంధి ఎంతటి కీలకమైనదో తాజా సంక్షోభం నిరూపించింది. ఈ వివాదం మొదలవడానికి ముందు, భారత్ తన దేశీయ అవసరాల కోసం దిగుమతి చేసుకునే ముడి చమురులో దాదాపు 88 శాతం వాటాను విదేశాల నుంచే తెచ్చుకునేది. అందులో సగం వాటా కేవలం పశ్చిమ ఆసియా దేశాల నుంచే, ఈ హోర్ముజ్ జలమార్గం గుండానే వచ్చేది. అలాగే దేశానికి వచ్చే ఎల్ఎన్జీ గ్యాస్లో 60 శాతం, ఎల్పీజీ గ్యాస్లో 90 శాతం ఈ రూట్ ద్వారానే దిగుమతి అవుతుంది. ఇప్పుడు ఇక్కడ పరిస్థితులు చక్కబడటం వల్ల అంతర్జాతీయ మార్కెట్లో ఇంధన ధరలు స్థిరంగా ఉండి, భారతీయ పరిశ్రమల చక్రం సాఫీగా సాగేందుకు వీలవుతుంది.
