Tax Collection : పన్ను వసూళ్లు తగ్గితే ప్రభుత్వ ఖజానా ఖాళీ అవుతుందా? భయపెడుతున్న కొత్త రిపోర్ట్

Tax Collection : జీఎస్టీ రేట్ల తగ్గింపు, ఆదాయపు పన్నులో ఉపశమనం, కార్పొరేట్ ఆదాయంపై అంతర్జాతీయంగా పెరుగుతున్న ఒత్తిడి కారణంగా ప్రస్తుత ఆర్థిక సంవత్సరంలో కేంద్ర ప్రభుత్వ ఖజానాకు చేరే పన్ను వసూళ్లు బడ్జెట్‌లో నిర్దేశించుకున్న లక్ష్యం కంటే స్వల్పంగా తగ్గే అవకాశం ఉందని ఒక నివేదిక భయపెడుతోంది. అయితే పన్ను వసూళ్లలో ఏర్పడే ఈ లోటును అంచనా వేసిన దానికంటే ఎక్కువ ఉన్న పన్నుయేతర ఆదాయం, కొన్ని ముఖ్యమైన పథకాల కింద ఖర్చులో జరిగే పొదుపు ద్వారా భర్తీ చేసుకోవాలని ప్రభుత్వం ఆశిస్తోంది. దీని ద్వారా 2025-26 ఆర్థిక సంవత్సరానికి నిర్దేశించుకున్న 4.4 శాతం జీడీపీ లోటు లక్ష్యాన్ని చేరుకోవాలని కేంద్రం ప్రణాళికలు వేస్తోంది.

పండుగ సీజన్ ముగిసిన తర్వాత జీఎస్టీ వసూళ్లు, మూడో త్రైమాసికపు అడ్వాన్స్ ట్యాక్స్ ట్రెండ్‌లను విశ్లేషించిన తర్వాత డిసెంబర్ 15 తర్వాత వసూళ్లలో ఎంత లోటు ఉంటుందో అంచనా వేయవచ్చని ఒక అధికారి తెలిపారు. ప్రస్తుత ఆర్థిక సంవత్సరంలో నవంబర్ 10 నాటికి నెట్ డైరెక్ట్ ట్యాక్స్ వసూళ్లు గత ఏడాదితో పోలిస్తే దాదాపు 7 శాతం పెరిగి రూ.12.92 లక్షల కోట్లకు చేరాయి. ఇదే కాలంలో రీఫండ్‌లు 18 శాతం తగ్గి సుమారు రూ.2.42 లక్షల కోట్లుగా ఉన్నాయి.

2025-26 ఆర్థిక సంవత్సరానికి ప్రత్యక్ష పన్నుల వసూళ్లలో దాదాపు 13 శాతం వృద్ధిని సాధించి రూ.25.2 లక్షల కోట్లు లక్ష్యంగా కేంద్రం బడ్జెట్‌లో నిర్దేశించింది. ఈ నెల ప్రారంభంలో కేంద్ర ప్రత్యక్ష పన్నుల బోర్డు చైర్మన్ రవి అగర్వాల్ మాట్లాడుతూ.. ప్రభుత్వం బడ్జెట్ లక్ష్యాలను చేరుకోవడం పట్ల విశ్వాసంగా ఉందని, డిసెంబర్ నాటికి పన్ను వసూళ్లు మరింత మెరుగుపడవచ్చని అన్నారు. అయితే డిసెంబర్ త్రైమాసికపు అడ్వాన్స్ ట్యాక్స్ గణాంకాలపైనే తుది అంచనాలు ఆధారపడి ఉంటాయని ఆయన నొక్కి చెప్పారు.

సెప్టెంబర్ 22 నుంచి దాదాపు 99 శాతం వస్తువులపై జీఎస్టీ రేట్లను తగ్గించడం అనేది పండుగల సమయంలో ఆటోమొబైల్స్, ఎలక్ట్రానిక్స్ వంటి ఉత్పత్తుల కొనుగోళ్లను పెంచింది. ఈ పెరిగిన డిమాండ్, పన్ను రాయితీ ప్రభావం బడ్జెట్ లక్ష్యంపై పడకుండా తగ్గిస్తుందని ప్రభుత్వం ఆశిస్తోంది. జీఎస్టీ రేట్ల తగ్గింపు పండుగ కొనుగోళ్లకు మద్దతు ఇచ్చినా, పండుగ సీజన్ ముగిసిన తర్వాత పన్ను వసూళ్లు తగ్గే అవకాశం ఉందని కొంతమంది నిపుణులు భావిస్తున్నారు. అందుకే ఆర్థిక సంవత్సరం చివరి మూడు నెలల్లో జీఎస్టీ వసూళ్లు డిసెంబర్ త్రైమాసికం స్థాయిని కొనసాగించకపోవచ్చని వారు అభిప్రాయపడుతున్నారు.

ఈ ఆర్థిక సంవత్సరంలో అక్టోబర్ వరకు జీఎస్టీ వసూళ్లు (రీఫండ్‌లు మినహా) రూ.12.07 లక్షల కోట్లకు చేరుకున్నాయి. ఇది గత ఏడాదితో పోలిస్తే 7.1 శాతం ఎక్కువ. అయితే బడ్జెట్‌లో లక్ష్యంగా పెట్టుకున్న 11 శాతం వృద్ధి రేటు కంటే ఇది తక్కువ. ద్రవ్యోల్బణంలో వచ్చిన వేగవంతమైన తగ్గుదల కూడా పన్ను వసూళ్ల వృద్ధిపై ప్రభావం చూపినట్లు నిపుణులు పేర్కొన్నారు.