TCS Share : కరోనా క్రాష్ తర్వాత టీసీఎస్‌కు ఇదే అతిపెద్ద షాక్.. కుప్పకూలిన ఐటీ ఇండెక్స్

TCS Share : భారత ఐటీ రంగంలోనే అతిపెద్ద దిగ్గజ సంస్థ అయిన టాటా కన్సల్టెన్సీ సర్వీసెస్ (TCS) షేర్లు బుధవారం ట్రేడింగ్‌లో ఘోరంగా పతనమయ్యాయి. మార్కెట్ ప్రారంభమైనప్పటి నుంచి విపరీతమైన అమ్మకాల ఒత్తిడిని ఎదుర్కొన్న టీసీఎస్ షేరు, ఒక దశలో ఏకంగా 9 శాతానికి పైగా క్షీణించి రూ.2,224.80 కనిష్ట స్థాయికి పడిపోయింది. మార్చి 2020 లో వచ్చిన కోవిడ్-19 మార్కెట్ సంక్షోభం తర్వాత, టీసీఎస్ ఒకే రోజులో ఈ స్థాయిలో పడిపోవడం ఇదే మొదటిసారి. మార్కెట్ క్యాపిటలైజేషన్ పరంగా దేశంలోనే అతిపెద్ద కంపెనీలలో ఒకటి కావడంతో, దీని పతనం ప్రభావం మొత్తం స్టాక్ మార్కెట్‌పై పడింది.

టీసీఎస్ లో వచ్చిన ఈ ఊహించని భారీ పతనం కారణంగా నిఫ్టీ ఐటీ ఇండెక్స్‌తో పాటు ప్రధాన సూచీలైన సెన్సెక్స్, నిఫ్టీలు కూడా భారీ నష్టాలను చవిచూశాయి. నిజానికి ఈ పతనానికి ముందు ఐటీ షేర్లు మంచి లాభాల్లో నడుస్తున్నాయి. అంతకుముందు మంగళవారం రోజే నిఫ్టీ ఐటీ ఇండెక్స్ ఏకంగా 4 శాతానికి పైగా లాభపడి, మే 2026 తర్వాత అత్యుత్తమ ఒకరోజు లాభాన్ని నమోదు చేసింది. గత మూడు ట్రేడింగ్ సెషన్లలో ఐటీ ఇండెక్స్ దాదాపు 8 శాతం పెరిగింది. కానీ, బుధవారం టీసీఎస్ లో వచ్చిన భారీ అమ్మకాలు కేవలం ఒక్క రోజులోనే ఆ లాభాలన్నింటినీ పూర్తిగా తుడిచిపెట్టేశాయి.

ఎస్బీఐ సెక్యూరిటీస్ టెక్నికల్ రీసెర్చ్ హెడ్ సుదీప్ షా విశ్లేషణ ప్రకారం.. టీసీఎస్ షేరుకు రూ.2,600 -2,605 స్థాయి వద్ద బలమైన రెసిస్టెన్స్ ఎదురైంది. ఈ స్థాయి కంపెనీ 100-రోజుల ఎక్స్‌పోనెన్షియల్ మూవింగ్ యావరేజ్ (EMA)కు దగ్గరగా ఉంది. ఇక్కడి నుంచే ఇన్వెస్టర్లు పెద్ద ఎత్తున ప్రాఫిట్ బుకింగ్, విక్రయాలకు పాల్పడ్డారు. దీనికి తోడు ఆర్‌ఎస్‌ఐ (RSI) వంటి మొమెంటం ఇండికేటర్లు కూడా బలహీనపడుతున్నాయని, షేరు కీలకమైన మూవింగ్ యావరేజ్ స్థాయిల కంటే కిందకు పడిపోవడం వల్ల సాంకేతికంగా చార్ట్ చాలా బలహీనంగా కనిపిస్తోందని ఆయన పేర్కొన్నారు.

ఇన్వాసెట్ పీఎమ్ఎస్ బిజినెస్ హెడ్ హర్షల్ దసాని అభిప్రాయం ప్రకారం.. టీసీఎస్ షేరుకు ఇప్పుడు రూ.2,206 స్థాయి అత్యంత కీలకం కానుంది. ఎందుకంటే ఇది ఈ షేరు యొక్క 52 వారాల కనిష్ట స్థాయి. రాబోయే రోజుల్లో కనుక ఈ షేరు రూ. 2,206 స్థాయి కంటే దిగువన ముగిస్తే, పతనం ఇంకా తీవ్రమయ్యే ప్రమాదం ఉంది. మార్కెట్ నిపుణుల ప్రకారం.. పైకి వెళ్లే క్రమంలో ఇప్పుడు రూ. 2,400 నుంచి రూ. 2,450 పరిధి బలమైన రెసిస్టెన్స్‌గా మారింది. ఈ మార్కును దాటితేనే షేరులో మళ్లీ రికవరీని ఆశించవచ్చు.

టాటా గ్రూప్‌నకు చెందిన టీసీఎస్ ఇప్పటికీ అత్యంత బలమైన, నమ్మకమైన కంపెనీ అనడంలో ఎలాంటి సందేహం లేదు. అయినప్పటికీ ప్రస్తుత అంతర్జాతీయ పరిస్థితుల వల్ల ఐటీ సేవలకు డిమాండ్ తగ్గడం, ఆర్టిఫిషియల్ ఇంటెలిజెన్స్ టెక్నాలజీ నుంచి పెరుగుతున్న పోటీ, రాబోయే త్రైమాసికాలపై కంపెనీ బలహీనమైన గ్రోత్ అవుట్‌లుక్ వంటి అంశాలు ఇన్వెస్టర్లలో తీవ్ర ఆందోళన కలిగిస్తున్నాయి. ఈ కారణాల వల్లనే పెద్ద పెద్ద ఇన్వెస్టర్లు ఐటీ షేర్ల నుంచి తప్పుకుంటున్నట్లు తెలుస్తోంది.