Tesla Sales : భారత్‌లో ఉడకని మస్క్ పప్పులు.. టెస్లా కంటే విన్‌ఫాస్ట్ ముందంజ

Tesla Sales : ప్రపంచంలోని అత్యంత ధనవంతుడు ఎలన్ మస్క్ టెస్లా కార్లు అమెరికా నుంచి చైనా వరకు సంచలనం సృష్టించినప్పటికీ భారతదేశంలో మాత్రం ఈ కారు ప్రస్తుతానికి ఫెయిల్ అయినట్లే కనిపిస్తోంది. కంపెనీ ఇప్పటివరకు దేశంలో కేవలం 157 కార్లను మాత్రమే విక్రయించగలిగింది. సుమారు 1.5 బిలియన్ల జనాభాతో ప్రపంచంలోనే అత్యధిక జనాభా కలిగిన దేశమైన భారత్‌లో ఈ సంఖ్య చాలా తక్కువగా ఉంది. మరోవైపు సెప్టెంబర్ నుంచి డెలివరీలను ప్రారంభించిన వియత్నాం కంపెనీ విన్‌ఫాస్ట్ నవంబర్‌లో ఏకంగా 362 కార్లను విక్రయించింది. అంతేకాకుండా టెస్లా ప్రధాన ప్రత్యర్థి అయిన బీవైడీ కూడా ప్రతి నెల 500కు పైగా కార్లను అమ్ముతోంది.

ప్రభుత్వ వాహన్ పోర్టల్ ప్రకారం.. నవంబర్‌లో టెస్లా కేవలం 48 కార్లను మాత్రమే డెలివరీ చేసింది. ఇది బీఎమ్‌డబ్ల్యూ, మెర్సిడెస్-బెంజ్ వంటి ఇప్పటికే ఉన్న లగ్జరీ బ్రాండ్‌ల కంటే చాలా తక్కువ. పోలిక కోసం, బీఎమ్‌డబ్ల్యూ ఇండియా నవంబర్‌లో మాత్రమే 267 ఎలక్ట్రిక్ కార్లను విక్రయించింది. ఇది ప్రీమియం ఈవీ విభాగంలో టెస్లాకు గట్టి పోటీ ఎదురవుతున్నట్లు సూచిస్తుంది. అమెరికన్ కంపెనీ టెస్లా భారతదేశంలో తన కార్యకలాపాలను ప్రారంభించడానికి మొదటి కారుగా మోడల్ Y ఎలక్ట్రిక్ కారును లాంచ్ చేసింది.

భారతదేశంలో ఎలక్ట్రిక్ కార్ల విక్రయాల విషయంలో టెస్లా ప్రస్తుతం 10వ స్థానంలో ఉంది. ఈ విషయంలో టాటా మోటార్స్ అగ్రస్థానంలో ఉంది. టాటా మోటార్స్ నవంబర్‌లో 7,315 కార్లు విక్రయించింది. ఇతర కంపెనీల వివరాలు.. ఎంజీ 4,471, మహీంద్రా 3,572, కియా 550, బీవైడీ 524, హ్యుందాయ్ 447, విన్‌ఫాస్ట్ 362, బీఎమ్‌డబ్ల్యూ 310, మెర్సిడెస్ 112, టెస్లా కేవలం 48 కార్లు మాత్రమే విక్రయించింది. అయినప్పటికీ, అక్టోబర్ 2025 తో పోలిస్తే విన్‌ఫాస్ట్, మెర్సిడెస్, టెస్లా అమ్మకాలలో వృద్ధి కనిపించింది.

భారతదేశంలో టెస్లా కార్ల అమ్మకాలు తక్కువగా ఉండటానికి ప్రధాన కారణం అధిక దిగుమతి సుంకం, ఇది దాదాపు 100% వరకు ఉంది. దీనివల్ల ధర-సున్నితత్వం ఎక్కువగా ఉన్న భారత మార్కెట్‌లో కార్లు చాలా ఖరీదైనవిగా మారుతున్నాయి. అదనంగా భారతదేశంలో టెస్లాకు స్థానిక తయారీ లేదు. అలాగే, మార్కెట్లో లగ్జరీ మరియు బడ్జెట్ విభాగాలలో ఉన్న ఇతర ఈవీ కంపెనీల నుంచి గట్టి పోటీ ఉంది. ఛార్జింగ్ మౌలిక సదుపాయాలు కూడా ఇంకా పూర్తిగా అభివృద్ధి చెందలేదు. అయితే, టెస్లా తన ఎక్స్‌పీరియన్స్ సెంటర్‌లు, సూపర్‌ఛార్జర్‌ల ద్వారా ఈ లోపాలను సరిదిద్దడానికి ప్రయత్నిస్తోంది.

టెస్లా తన అమ్మకాలు నెమ్మదిగా పెరుగుతున్నప్పటికీ భారతదేశంలో తన ఉనికిని నిరంతరం బలపరుస్తోంది. గత వారం కంపెనీ గురుగ్రామ్‌లో తన మొదటి ఆల్-ఇన్-వన్ టెస్లా సెంటర్ ను ప్రారంభించినట్లు ప్రకటించింది. ఈ కొత్త సెంటర్ సెక్టార్ 48లోని ఆర్కిడ్ బిజినెస్ పార్క్‌లో ఉంది. ఇక్కడ రిటైల్, ఆఫ్టర్-సేల్స్ సర్వీస్, డెలివరీ, ఛార్జింగ్ అన్నీ ఒకే చోట లభిస్తాయి. తద్వారా వినియోగదారులకు పూర్తి సౌలభ్యం లభిస్తుంది. టెస్లా లక్ష్యం ప్రజలు త్వరగా సుస్థిర శక్తి వైపు మళ్లడం. ఛార్జింగ్ వ్యవస్థను బలోపేతం చేయడం, డైరెక్ట్ బిజినెస్ మోడల్‌ను అనుసరించడం ద్వారా భారతదేశంలో ఈవీల వినియోగాన్ని వేగంగా పెంచాలని కంపెనీ కోరుకుంటోంది.