Kanhaiyalal Khatik : ఒంటిపై 3.5 కిలోల బంగారం ఉన్నా పర్సనల్ సెక్యూరిటీ లేకుండా తిరుగుతున్న గోల్డ్‌మ్యాన్

Kanhaiyalal Khatik : బంగారం ధరలు రోజురోజుకూ పెరుగుతున్న ప్రస్తుత తరుణంలో పెళ్లిళ్లు లేదా పండుగల సమయంలో బంగారం కొనుగోలు చేయాలంటే సామాన్యులు వెనుకడుగు వేస్తున్నారు. అయితే రాజస్థాన్‌లోని చిత్తోర్‌గఢ్‌కు చెందిన ఒక వ్యక్తి మాత్రం కిలోల కొద్దీ బంగారాన్ని ధరించి తిరుగుతూ గోల్డ్‌మ్యాన్ గా పేరు సంపాదించుకున్నాడు. ఆయన పేరు కన్హయ్యాలాల్ ఖటిక్. ఈయన ప్రతిరోజూ దాదాపు 3 నుంచి 3.5 కిలోల బంగారు ఆభరణాలు ధరించి బయటకు వస్తారు. నేటి ధరల ప్రకారం, ఆయన ప్రతిరోజూ సుమారు రూ.4 నుంచి రూ.4.5 కోట్ల విలువైన బంగారాన్ని ధరించి తిరుగుతున్నట్లు అంచనా. కన్హయ్యాలాల్ ఖటిక్ జీవిత ప్రస్థానం సామాన్యుడి నుంచి అసామాన్యుడిగా ఎదగడం మరింత ఆసక్తికరం.

సుమారు 25 సంవత్సరాల క్రితం.. కన్హయ్యాలాల్ ఖటిక్ రోడ్డు పక్కన ఒక చిన్న బండిపై పండ్లు, కూరగాయలు అమ్ముకునేవారు. అయితే ఆయనకు బంగారు ఆభరణాలు ధరించడం అంటే విపరీతమైన ఇష్టం. దీనికి ఆయన సంగీత దర్శకుడు బప్పీలహరిని ఆదర్శంగా తీసుకునేవారు. అందుకే ఆయన్ను రాజస్థాన్ బప్పీలహరి అని కూడా పిలుస్తారు. ఒకప్పుడు ఒక స్నేహితుడు అప్పుగా ఇచ్చిన 20 గ్రాముల బంగారు గొలుసుతో ఆయన తన పండ్ల వ్యాపారాన్ని ప్రారంభించారు. వ్యాపారం వృద్ధి చెందడంతో, కశ్మీర్ నుంచి ఆపిల్స్ దిగుమతి చేసుకుని చిత్తోర్‌గఢ్‌లో అమ్మడం మొదలుపెట్టారు. వ్యాపారంలో విజయం సాధించిన తర్వాత, బంగారంపై తనకున్న మక్కువను పూర్తి చేసుకున్నారు. ప్రస్తుతం ఆయన మెడలో భారీ గొలుసులు, చేతికి పెద్ద బ్రేస్‌లెట్‌లు, బంగారు ఉంగరాలు వంటి ఆభరణాలు ఉన్నాయి.

కోట్లాది రూపాయల విలువైన బంగారు ఆభరణాలు ధరించి తిరుగుతున్నప్పటికీ, కన్హయ్యాలాల్ ఖటిక్ పర్సనల్ సెక్యూరిటీని ఏర్పాటు చేసుకోకపోవడం గమనార్హం. ఆయన స్థానిక ఖటిక్ కమ్యూనిటీ అసోసియేషన్ జిల్లా అధ్యక్షుడిగా కూడా ఉన్నారు. అయితే 50 ఏళ్ల ఖటిక్‌కు ఇటీవల గ్యాంగ్‌స్టర్ల నుంచి బెదిరింపులు వచ్చాయి. రోహిత్ గోదారా గ్యాంగ్‌కు చెందిన ఒక వ్యక్తి వాట్సాప్‌లో ఆడియో మెసేజ్ పంపి రూ. 5 కోట్లు ఇవ్వాలని డిమాండ్ చేశాడు. లేదంటే ఆభరణాలు ధరించడానికి వీలు లేకుండా చేస్తామని బెదిరించారు. దీంతో ఆయన వెంటనే పోలీసులకు ఫిర్యాదు చేశారు. ఈ ఫిర్యాదుపై పోలీసులు అప్రమత్తమై, కేసు దర్యాప్తు ప్రారంభించారు.