Koraput Coffee : కార్పొరేట్ ఉద్యోగాలు వదిలి కాఫీ సాగు.. ఒడిశా రైతుల ఘన విజయం

Koraput Coffee : ప్రధానమంత్రి నరేంద్ర మోడీ తన మన్ కీ బాత్ 127వ ఎడిషన్‌లో కాఫీ గురించి ప్రస్తావించారు. తనకు టీతో ఉన్న అనుబంధం అందరికీ తెలుసునని, అయితే మన్ కీ బాత్‎లో కాఫీ గురించి ఎందుకు మాట్లాడకూడదని తాను అనుకున్నానని ప్రధాని అన్నారు. దీని తర్వాత ఆయన భారతీయ కాఫీకి పెరుగుతున్న ప్రపంచవ్యాప్త ఆదరణను హైలైట్ చేశారు. ఒడిశాలోని కొరాపుట్ ప్రాంతాన్ని ప్రత్యేకంగా ప్రస్తావించారు.

పీఎం మోడీ మన్ కీ బాత్ కార్యక్రమంలో గత సంవత్సరం ఎడిషన్‌ను గుర్తు చేసుకున్నారు. అందులో ఆయన ఆంధ్రప్రదేశ్‌లోని అరకు కాఫీ గురించి మాట్లాడారు. కొంతకాలం క్రితం ఒడిశాలోని చాలా మంది ప్రజలు కొరాపుట్ కాఫీ గురించి వారి ఎక్స్‎పీరియన్స్‎ను తనతో పంచుకున్నారని పీఎం నరేంద్ర మోడీ అన్నారు. మన్ కీ బాత్‎లో కొరాపుట్ కాఫీ గురించి కూడా చర్చించాలని వారు తనకు లేఖ రాసి అభ్యర్థించారు.

కొరాపుట్ కాఫీ రుచి అద్భుతం అని అన్నారు. రుచి మాత్రమే కాకుండా కాఫీ సాగు స్థానిక ప్రజలకు గణనీయమైన ప్రయోజనాలను అందిస్తోందని ఆయన అన్నారు. కాఫీ సాగు కోసం తమ మంచి కార్పొరేట్ ఉద్యోగాలను వదులుకున్న కొరాపుట్‌లోని కొందరు ఉత్పత్తిదారుల అభిరుచిని ఆయన ప్రస్తావించారు. కాఫీ పట్ల వారి ప్రేమ ఎంత లోతైనదంటే, వారు తమ ఉద్యోగాలను విడిచిపెట్టి, ఇప్పుడు ఈ రంగంలో విజయవంతంగా పనిచేస్తున్నారని ఆయన తెలిపారు.

కొరాపుట్ దాని ప్రత్యేకమైన వ్యవసాయ-వాతావరణ పరిస్థితులకు ప్రసిద్ధి చెందింది. ఇవి అధిక నాణ్యత గల అరేబికా కాఫీకి అనుకూలమైనవి. రాష్ట్రంలో దాదాపు 5,000 హెక్టార్ల భూమిలో కాఫీ సాగు జరుగుతుంది. ఒడిశా గిరిజన అభివృద్ధి సహకార కార్పొరేషన్ లిమిటెడ్ కొనుగోలు నుండి ఎండబెట్టడం, గ్రేడింగ్, మార్కెటింగ్ వరకు ప్రాసెసింగ్‌ను నిర్వహిస్తుంది. భారతదేశంలో ప్రధానంగా అరేబికా, రోబస్టా కాఫీ సాగు చేస్తున్నారు. జాతీయ ఉత్పత్తిలో కర్ణాటక దాదాపు 70% వాటాను కలిగి ఉంది. ఆ తర్వాత కేరళ, తమిళనాడు ఉన్నాయి. ఆంధ్రప్రదేశ్, ఒడిశా వంటి సంప్రదాయేతర ప్రాంతాలు క్రమంగా కొత్త వ్యవసాయ కేంద్రాలుగా అభివృద్ధి చెందుతున్నాయి. ఈ ఆర్థిక సంవత్సరంలో ఏప్రిల్-సెప్టెంబర్ మధ్య భారతదేశ కాఫీ ఎగుమతులు 12.5% పెరిగి 1.05 బిలియన్ అమెరికన్ డాలర్లకు చేరుకున్నాయి.