Microsoft : మైక్రోసాఫ్ట్‌లో 15,000 మంది ఉద్యోగుల తొలగింపునకు కారణం ఇదే.. సత్య నాదెళ్ల షాకింగ్ ప్రకటన!

Microsoft : మైక్రోసాఫ్ట్ సీఈఓ సత్య నాదెళ్ల కంపెనీలో ఇటీవల జరిగిన భారీ ఉద్యోగుల తొలగింపులపై ఒక మెమో పంపారు. కంపెనీ రికార్డు లాభాలతో దూసుకుపోతున్నప్పుడు, షేర్ ధరలు ఆల్‌టైమ్ హైలో ఉన్నప్పుడు, ఆర్టిఫిషియల్ ఇంటెలిజెన్స్ లో భారీ పెట్టుబడులు పెడుతున్న సమయంలో ఈ తొలగింపులు జరగడం చాలా మందిని ఆశ్చర్యపరిచింది. అసలు దీని వెనుక కారణం ఏంటో నాదెళ్ల స్వయంగా వివరించారు. 2025లో ఇప్పటివరకు మైక్రోసాఫ్ట్ 15,000 మందికి పైగా ఉద్యోగులను తొలగించింది. దీంతో పాటు పర్ఫామెన్స్ సరిగా లేని సుమారు 2,000 మంది ఉద్యోగులను కూడా కంపెనీ నుండి తీసేశారు. మైక్రోసాఫ్ట్ ఆర్థికంగా చాలా పటిష్టంగా ఉన్న సమయంలోనే ఈ తొలగింపులు జరుగుతున్నాయి.

కంపెనీ గత మూడు ఆర్థిక త్రైమాసికాల్లో సుమారు $75 బిలియన్ల నికర ఆదాయాన్ని నమోదు చేసింది. అంతేకాకుండా, కంపెనీ ఏఐ టెక్నాలజీలో $80 బిలియన్ల పెట్టుబడులు పెడుతోంది. ఈ నెల జులై 9న మైక్రోసాఫ్ట్ షేర్లు మొదటిసారిగా $500 పైన ముగిశాయి. ఇది ఇప్పటివరకు ఒక రికార్డు.

ఇంతటి బలమైన ఆర్థిక ప్రదర్శన ఉన్నప్పటికీ, తొలగింపులకు కారణాన్ని వివరించడానికి నాదెళ్ల ప్రయత్నించారు. అతను ఇలా వ్రాశారు: "ఏ విధంగా చూసినా, మైక్రోసాఫ్ట్ అద్భుతంగా రాణిస్తోంది. మా మార్కెట్ పనితీరు, వ్యూహం, వృద్ధి అన్నీ సరైన దిశలో ఉన్నాయి. మేము గతంలో కంటే ఎక్కువ మూలధన వ్యయంలో పెట్టుబడి పెడుతున్నాము. మా మొత్తం ఉద్యోగుల సంఖ్యలో పెద్దగా మార్పు లేదు, పరిశ్రమలోని కొంతమంది బెస్ట్ టాలెంట్, నిపుణులు గతంలో కంటే ఎక్కువ గుర్తింపు, బహుమతులు పొందుతున్నారు. అయినప్పటికీ మేము తొలగింపులు చేయాల్సి వచ్చింది."

కొత్త సవాళ్లు, టెక్నాలజీలకు అనుగుణంగా మైక్రోసాఫ్ట్ కొత్త విషయాలు నేర్చుకోవాలి. పాత విషయాలను మరచిపోవాలి అని కూడా నాదెళ్ల చెప్పారు. కంపెనీ లక్ష్యం, ప్రాధాన్యతలు, సంస్కృతిని మరోసారి గుర్తుచేస్తూ, మైక్రోసాఫ్ట్ ఏ దిశలో, ఎందుకు, ఎలా ముందుకు సాగుతుందో అర్థం చేసుకోవడం చాలా ముఖ్యం అని ఆయన అన్నారు.