Trump Vs Canada : కెనడాకు డొనాల్డ్ ట్రంప్ అల్టిమేటం..విమానాలపై 50 శాతం టారిఫ్ బాంబు

Trump Vs Canada :అమెరికా అధ్యక్షుడు డొనాల్డ్ ట్రంప్ తన సోషల్ మీడియా వేదిక ట్రూత్ సోషల్ ద్వారా కెనడాపై నిప్పులు చెరిగారు. అమెరికాకు చెందిన ప్రముఖ విమాన తయారీ సంస్థ గల్ఫ్‌స్ట్రీమ్ తయారు చేసిన అత్యాధునిక జెట్ విమానాలైన G500, G600, G700, G800 మోడళ్లకు కెనడా ప్రభుత్వం ఉద్దేశపూర్వకంగా అనుమతులు ఇవ్వడం లేదని ట్రంప్ ఆరోపించారు. తమ దేశ విమానాలను అడ్డుకుంటే తాము కూడా చూస్తూ ఊరుకోబోమని, కెనడాకు చెందిన విమాన తయారీ దిగ్గజం బాంబార్డియర్ విమానాలపై 50 శాతం భారీ టారిఫ్ విధిస్తామని బెదిరించారు.

సాధారణంగా ఇలాంటి సాంకేతిక అనుమతుల వివాదాలు అధికారుల స్థాయిలో పరిష్కారమవుతాయి. కానీ ఒక దేశాధ్యక్షుడు నేరుగా జోక్యం చేసుకుని ఇలా బహిరంగంగా హెచ్చరించడం ప్రపంచ విమానయాన రంగంలో కలకలం రేపింది. బాంబార్డియర్ కంపెనీకి అమెరికానే అతిపెద్ద మార్కెట్. ఒకవేళ ట్రంప్ చెప్పినట్టు 50 శాతం ట్యాక్స్ విధిస్తే, కెనడా విమానాల ధరలు అమెరికాలో విపరీతంగా పెరిగిపోతాయి. దీనివల్ల ఆ కంపెనీ కోలుకోలేని దెబ్బ తింటుంది. ఇది కేవలం వ్యాపార వివాదం మాత్రమే కాదు, దీని వెనుక రాజకీయ వైషమ్యాలు కూడా ఉన్నాయి.

కెనడా ప్రధాని మార్క్ కార్నీ, డొనాల్డ్ ట్రంప్ మధ్య గత కొంతకాలంగా ప్రచ్ఛన్న యుద్ధం నడుస్తోంది. కెనడా సార్వభౌమాధికారాన్ని అమెరికా గౌరవించాలని కార్నీ చేసిన వ్యాఖ్యలు ట్రంప్‌కు కోపం తెప్పించాయి. "కెనడా ఈరోజు ఏ స్థితిలో ఉందంటే దానికి అమెరికాయే కారణం" అంటూ ట్రంప్ గతంలోనే ఎదురుదాడి చేశారు. వీరిద్దరి మధ్య జరిగిన ఒక ఫోన్ కాల్ విషయంలో కూడా భిన్నాభిప్రాయాలు ఉన్నాయి. కార్నీ ఫోన్ చేసి వివరణ ఇచ్చుకున్నారని అమెరికా అంటుంటే, ట్రంప్ వైపు నుంచే ఫోన్ వచ్చిందని కెనడా వాదిస్తోంది. ఈ కీచులాటలు ఇప్పుడు వాణిజ్య యుద్ధానికి దారితీశాయి.

ఈ వివాదంలో చైనా కోణం కూడా ఉందని విశ్లేషకులు భావిస్తున్నారు. కెనడా చైనాతో స్వేచ్ఛా వాణిజ్య ఒప్పందాల కోసం ప్రయత్నిస్తోందని అమెరికా అనుమానిస్తోంది. అయితే మార్క్ కార్నీ అలాంటిదేమీ లేదని స్పష్టం చేసినప్పటికీ, ట్రంప్ మాత్రం కెనడాపై ఆర్థిక ఒత్తిడి పెంచి తన దారిలోకి తెచ్చుకోవాలని చూస్తున్నారు. ఇప్పటికే సరిహద్దుల వద్ద రక్షణ, వలసల విషయంలో గొడవలు ఉండగా, ఇప్పుడు విమానాలపై టారిఫ్ బాంబు పేలడం ఇరు దేశాల ఆర్థిక వ్యవస్థలపై తీవ్ర ప్రభావం చూపే అవకాశం ఉంది.