Donald Trump: గ్లోబల్ ఎనర్జీ మార్కెట్లో ట్రంప్ మాస్టర్ ప్లాన్..వెనిజులా ఆయిల్తో నిండనున్న అమెరికా ఖజానా
వెనిజులా ఆయిల్తో నిండనున్న అమెరికా ఖజానా
Donald Trump: ప్రపంచ చమురు మార్కెట్ను శాసించే దిశగా అమెరికా అధ్యక్షుడు డోనాల్డ్ ట్రంప్ అడుగులు వేస్తున్నారు. ఖాళీ అయిన అమెరికా అత్యవసర చమురు నిల్వలను నింపడానికి వెనిజులా క్రూడ్ ఆయిల్ను ఉపయోగించబోతున్నట్లు సంచలన ప్రకటన చేశారు. అంతర్జాతీయ శక్తి మార్కెట్లో తీవ్ర సంచలనం సృష్టిస్తున్న ఈ చారిత్రాత్మక డీల్ పూర్తి వివరాలు చూద్దాం.
అమెరికా వద్ద ఉన్న స్ట్రాటజిక్ పెట్రోలియం రిజర్వ్ అనేది అత్యవసర పరిస్థితుల్లో ఆర్థిక వ్యవస్థను రక్షించే ప్రపంచంలోనే అతిపెద్ద క్రూడ్ ఆయిల్ నిల్వ కేంద్రం. గత జో బైడెన్ ప్రభుత్వ హయాంలో ఈ నిల్వలు పూర్తిగా ఖాళీ అయిపోయాయని విమర్శించిన ట్రంప్, ఇప్పుడు వాటిని మళ్లీ పూర్తిస్థాయిలో నింపేందుకు పక్కా ప్లాన్ రూపొందించారు. వెనిజులా నుంచి లభించే క్రూడ్ ఆయిల్ ద్వారానే ఈ రిజర్వులను వేగంగా నింపుతామని ఆయన స్పష్టం చేశారు. ఈ ప్రక్రియ త్వరలోనే ప్రారంభమవుతుందని, ఈ చమురు అమెరికా ప్రజలకు వెనిజులా అందిస్తున్న ఒక అరుదైన కానుకగా ఆయన అభివర్ణించారు.
ప్రపంచ చరిత్రలోనే అతిపెద్ద చమురు ఒప్పందం
ప్రపంచంలోనే అతిపెద్ద ధృవీకరించబడిన క్రూడ్ ఆయిల్ నిల్వలు ఉన్న వెనిజులా దేశంతో అమెరికా చారిత్రాత్మక ఒప్పందాన్ని కుదుర్చుకుంది. వాషింగ్టన్, వెనిజులా సంబంధాలలో చోటు చేసుకున్న ఈ ఊహించని మార్పు గ్లోబల్ ఎనర్జీ రంగాన్ని తీవ్ర ఆశ్చర్యానికి గురిచేస్తోంది. గతంలో నికోలస్ మదురో ప్రభుత్వంపై అనేక ఆంక్షలు విధించిన అమెరికా, ఇప్పుడు ఏకంగా చమురు వాణిజ్యానికి ద్వారాలు పూర్తిగా తెరిచింది. మానవ చరిత్రలోనే ఇది అత్యంత భారీ ఆయిల్ డీల్ అని ట్రంప్ వ్యాఖ్యానించడం విశేషం.
65 బిలియన్ బారెళ్ల ఉత్పత్తిపై 100 ఏళ్ల హక్కులు
వెనిజులా తాత్కాలిక అధ్యక్షురాలు డెల్సీ రోడ్రిగ్జ్ నేతృత్వంలోని ప్రభుత్వం విడుదల చేసిన వివరాల ప్రకారం, ఈ ఒప్పందంలో భాగమైన 17 కీలక చమురు క్షేత్రాల్లో సుమారు 65 బిలియన్ బారెళ్ల క్రూడ్ ఆయిల్ నిల్వలు ఉన్నట్లు అంచనా. ఒక ప్రైవేట్ ఆపరేటర్తో కలిసి ఏర్పాటు చేసిన నూతన కంపెనీకి ఈ చమురు క్షేత్రాలపై ఏకంగా 100 ఏళ్ల పాటు పూర్తి హక్కులను కట్టబెట్టారు. ఈ సుదీర్ఘ ప్రాజెక్ట్ ద్వారా వెనిజులా ఆయిల్ రంగానికి 100 బిలియన్ డాలర్ల పెట్టుబడులు వచ్చే అవకాశం ఉండగా, ఆ దేశానికి పన్నుల రూపంలోనే 209 బిలియన్ డాలర్లకు పైగా రాబడి లభించనుంది.
అత్యంత శక్తివంతమైన కంపెనీగా ఆవిర్భావం
సెక్రటరీ ఆఫ్ స్టేట్ మార్కో రూబియో, రక్షణ మంత్రి పీట్ హెగ్సెత్ ఈ సుదీర్ఘ చర్చల్లో కీలక పాత్ర పోషించారు. ఈ డీల్ ప్రకారంగా నూతన కంపెనీ ఉత్పత్తి చేసే మొత్తం చమురులో 55 శాతం వాటాను నేరుగా అమెరికా సొంతం చేసుకోనుంది. ఉత్పత్తి వ్యయం ఆధారంగానే నేరుగా కొనుగోలు చేసే వెసులుబాటు కూడా వాషింగ్టన్కు దక్కింది. సౌదీ అరామ్కో తర్వాత ప్రపంచంలోనే అత్యధిక చమురు నిల్వలను కలిగిన రెండో అతిపెద్ద కార్పొరేట్ దిగ్గజంగా ఈ నూతన సంస్థ నిలవబోతోంది.
