Stock Market : అమెరికా-ఇరాన్ దోస్తీ.. 130 నిమిషాల్లో రూ.7.43 లక్షల కోట్ల లాభం ఆర్జించిన ఇన్వెస్టర్లు

Stock Market : అంతర్జాతీయ రాజకీయాల్లో చోటుచేసుకుంటున్న సానుకూల పరిణామాలు భారత స్టాక్ మార్కెట్‌లో కాసుల వర్షం కురిపించాయి. అమెరికా-ఇరాన్ మధ్య యుద్ధ మేఘాలు తొలగి, శాంతి చర్చలు ఫలిస్తున్నాయన్న వార్తలతో దలాల్ స్ట్రీట్ ఒక్కసారిగా రాకెట్‌లా దూసుకెళ్లింది. కేవలం 130 నిమిషాల వ్యవధిలోనే మదుపర్లు ఏకంగా రూ.7.43 లక్షల కోట్లు గడించడం విశేషం. బుధవారం ఉదయం నష్టాల్లో ఉన్న మార్కెట్, మధ్యాహ్నం తర్వాత ఊహించని వేగంతో పుంజుకుని ఇన్వెస్టర్లలో కొత్త జోష్ నింపింది.

మార్కెట్‌లో ఏం జరిగింది?

బుధవారం ఉదయం భారత స్టాక్ మార్కెట్ ఒడిదుడుకులతో ప్రారంభమైంది. ఒకానొక దశలో సెన్సెక్స్ 244 పాయింట్లు నష్టపోయి 76,773 వద్దకు పడిపోయింది. అయితే, మధ్యాహ్నం 1 గంట తర్వాత పరిస్థితి ఒక్కసారిగా మారిపోయింది. అమెరికా-ఇరాన్ మధ్య శాంతి ఒప్పందం కుదిరే అవకాశం ఉందన్న వార్తలు మార్కెట్ గమనాన్ని మార్చేశాయి. కేవలం 130 నిమిషాల్లోనే సెన్సెక్స్ 1000 పాయింట్లు ఎగబాకి 78,022 పాయింట్ల గరిష్ట స్థాయిని తాకింది. నిఫ్టీ కూడా 325 పాయింట్లకు పైగా లాభపడి 24,356 వద్ద స్థిరపడింది.

భారీగా పెరగడానికి ప్రధాన కారణాలు ఇవే

మార్కెట్ ఇంతలా పుంజుకోవడానికి ప్రధానంగా మూడు కారణాలు కనిపిస్తున్నాయి. మొదటిది, అమెరికా అధ్యక్షుడు ట్రంప్ ప్రాజెక్ట్ ఫ్రీడంకు బ్రేక్ వేయడం. ఇరాన్ తో చర్చల్లో పురోగతి ఉందని, హోర్ముజ్ జలసంధిలో ఉద్రిక్తతలు తగ్గాయని ఆయన ప్రకటించడం ఇన్వెస్టర్లలో నమ్మకాన్ని పెంచింది. రెండవది, అంతర్జాతీయ మార్కెట్లో ముడి చమురు ధరలు 7 శాతం మేర కుప్పకూలడం. బ్రెంట్ క్రూడ్ బ్యారెల్‌కు 102 డాలర్లకు దిగిరావడం భారత్ వంటి దేశాలకు పెద్ద ఊరట. ఇక మూడవది, బ్యాంకింగ్ షేర్ల దూకుడు. ఎస్బీఐ, హెచ్‌డీఎఫ్‌సీ వంటి దిగ్గజ బ్యాంకులు 3 శాతం మేర లాభపడి మార్కెట్‌ను ముందుండి నడిపించాయి.

బలపడిన రూపాయి

ముడి చమురు ధరలు తగ్గడంతో రూపాయి కూడా బలపడింది. డాలర్‌తో పోలిస్తే రూపాయి 23 పైసలు పెరిగి 94.95 వద్దకు చేరింది. దీనికి తోడు దక్షిణ కొరియా, హాంగ్ కాంగ్ వంటి ఆసియా మార్కెట్లు కూడా లాభాల్లో ఉండటం భారత మార్కెట్‌కు సానుకూలంగా మారింది. ఇండియా విక్స్ (VIX) ఇండెక్స్ 5 శాతం తగ్గడం వల్ల మార్కెట్లో అస్థిరత తగ్గిందని, ఇన్వెస్టర్లు రిస్క్ తీసుకోవడానికి సిద్ధంగా ఉన్నారని విశ్లేషకులు చెబుతున్నారు.

మదుపర్ల సంపాదన ఇలా..

మార్కెట్ లాభాలను కేవలం పాయింట్లలోనే కాదు, విలువల పరంగా చూస్తే ఇంకా ఆశ్చర్యం కలుగుతుంది. సెన్సెక్స్ రోజువారీ కనిష్ట స్థాయి వద్ద ఉన్నప్పుడు బిఎస్ఈ మార్కెట్ క్యాప్ రూ. 465.66 లక్షల కోట్లుగా ఉంది. కేవలం రెండు గంటల వ్యవధిలో అది రూ. 473.09 లక్షల కోట్లకు చేరింది. అంటే 130 నిమిషాల్లో ఇన్వెస్టర్ల సంపద రూ. 7,42,853 కోట్లు పెరిగింది. ఈ జోరు ఇలాగే కొనసాగితే బిఎస్ఈ మార్కెట్ క్యాప్ త్వరలోనే మళ్ళీ 5 ట్రిలియన్ డాలర్ల మార్కును దాటే అవకాశం ఉంది.