Volkswagen: ఆటోరంగంలో భారీ కుదుపు.. ఏకంగా లక్ష మంది ఉద్యోగుల తొలగింపునకు ఫోక్స్వ్యాగన్
ఫోక్స్వ్యాగన్
Volkswagen: ప్రపంచ కార్ల పరిశ్రమను వణికిస్తున్న మందగమనం ప్రభావంతో జర్మన్ ఆటోమొబైల్ దిగ్గజం ఫోక్స్వ్యాగన్ చారిత్రాత్మక నిర్ణయం తీసుకుంది. గ్లోబల్ ఆటో సెక్టార్ చరిత్రలోనే అత్యంత భారీ పునర్నిర్మాణ ప్రణాళికలో భాగంగా ఏకంగా 1,00,000 ఉద్యోగాలను కోత విధిస్తున్నట్లు ప్రకటించింది. ప్రపంచవ్యాప్తంగా ఎలక్ట్రిక్ వాహనాలకు (ఈవీ) ఆశించిన స్థాయిలో డిమాండ్ లేకపోవడం, చైనా కార్ల తయారీ కంపెనీల నుంచి తీవ్ర పోటీ ఎదురవడం, అమెరికా విధించిన టారిఫ్ల భారంతో ఫోక్స్వ్యాగన్ తీవ్ర ప్రతికూల పరిస్థితులను ఎదుర్కొంటోంది. ఈ పరిస్థితులను తట్టుకుని నిలబడటానికి సంస్థల నిర్వహణ వ్యయాన్ని తగ్గించుకోవడమే మార్గమని భావించిన ఫోక్స్వ్యాగన్ గ్రూప్ బోర్డు సంచలన నిర్ణయం తీసుకుంది. సంస్థలో పనిచేస్తున్న మొత్తం సిబ్బందిలో దాదాపు 15 శాతం మందిని, అంటే సుమారు ఒక లక్ష మంది ఉద్యోగులను ఈ దశాబ్దం చివరి నాటికి తొలగించే ప్రతిపాదనకు ఆమోదముద్ర వేసింది. గతంలో అనుకున్న 50,000 ఉద్యోగాల కోతకు అదనంగా మరొక 50,000 ఉద్యోగాలను ఈ జాబితాలో చేర్చడం గమనార్హం.
దిగ్గజ బ్రాండ్లపై పడనున్న తీవ్ర ప్రభావం
ఫోక్స్వ్యాగన్ గ్రూప్ పరిధిలో మెయిన్ బ్రాండ్తో పాటు ఆడి, పోర్షే వంటి 10కి పైగా అంతర్జాతీయంగా పేరుగాంచిన కార్ల బ్రాండ్లు ఉన్నాయి. ప్రస్తుత ఆర్థిక పరిస్థితులకు అనుగుణంగా వర్క్ఫోర్స్ను తగ్గించుకోవడం తప్పనిసరి అని యాజమాన్యం స్పష్టం చేసింది. 2009లో దివాలా తీసిన సమయంలో జనరల్ మోటార్స్ చేపట్టిన 50,000 ఉద్యోగాల కోత రికార్డును దాటి, అంతర్జాతీయ ఆటోమొబైల్ రంగంలోనే ఇది అతిపెద్ద పునర్నిర్మాణ చర్యగా నిలిచింది.
నాలుగు కీలక ప్లాంట్ల భవిష్యత్తుపై తీవ్ర అనుమానాలు
జర్మనీలోని హానోవర్, ఎమ్డెన్, జ్వికావ్, నేకర్సల్మ్ ప్రాంతాల్లో ఉన్న కంపెనీకి చెందిన నాలుగు కీలక తయారీ ప్లాంట్ల దీర్ఘకాలిక భవిష్యత్తుపై కంపెనీ హామీ ఇవ్వలేకపోతోంది. తయారీ సామర్థ్యం కంటే డిమాండ్ తగ్గడంతో ఈ ప్లాంట్లకు ప్రత్యామ్నాయ వినియోగ మార్గాలను అన్వేషిస్తున్నారు. ఒకవేళ ఇవి మూతపడితే, సొంత దేశంలో ఫోక్స్వ్యాగన్ తన ఫ్యాక్టరీలను మూసివేయడం ఇదే తొలిసారి అవుతుంది. ఇది కేవలం ప్లాంట్ కార్మికులపైనే కాక, అనుబంధంగా ఉన్న సరఫరాదారులు, స్థానిక ప్రాంతీయ ఆర్థిక వ్యవస్థలపై ఊహించని దెబ్బ తీస్తుందని అక్కడి ఉద్యోగులు తీవ్ర ఆందోళన వ్యక్తం చేస్తున్నారు.
యూనియన్ల నిరసనలు
నూతన ప్రణాళికల ఆమోదానికి ముందు యాజమాన్యానికి, శక్తివంతమైన ఐజీ మెటల్ కార్మిక సంఘానికి మధ్య తీవ్రస్థాయిలో వివాదాలు నడిచాయి. ఉద్యోగులకు ముందే సమాచారం ఇవ్వకుండా వార్తలు బయటకు పొక్కడంపై నిరసనలు వ్యక్తమయ్యాయి. బోర్డు నిర్ణయాధికారాలను తగ్గించే ప్రయత్నాలపై యూనియన్ ప్రతినిధులు తీవ్ర ఆగ్రహం వ్యక్తం చేశారు. ఏదేమైనా కార్మిక ప్రతినిధులు, లోయర్ శాక్సోనీ రాష్ట్ర ప్రభుత్వ ప్రతినిధులతో కలిసి సుదీర్ఘంగా చర్చలు జరిపిన అనంతరం, సంస్థ నిలదొక్కుకునేందుకు ఈ ఒప్పందానికి ఆమోదం తెలిపారు. ప్రస్తుతానికి ఏ ప్లాంట్నూ అధికారికంగా మూసివేయలేదని యూనియన్ నేతలు స్పష్టం చేశారు.
