Liquor Shop : వైన్ షాప్ పెట్టాలనుకుంటున్నారా? ఎన్ని డబ్బులు ఉండాలి ? ప్రాసెస్ ఏంటో తెలుసా ?

Liquor Shop : చాలా మంది మద్యం వ్యాపారం అంటే లాభాల పంట అని అనుకుంటారు. ఒక్కసారి వైన్ షాప్ తెరిస్తే, డబ్బు వర్షం కురుస్తుందని అనుకుంటారు. కానీ నిజం దీనికి కొంచెం భిన్నంగా ఉంటుంది. లిక్కర్ షాప్ పెట్టడం అనేది పిల్లల ఆట కాదు. ఇది ప్రభుత్వ కఠిన నియమాలు, చట్టపరమైన చిక్కులు, భారీ పెట్టుబడితో కూడుకున్న వ్యాపారం. కేవలం డబ్బులు ఉంటే సరిపోదు, సరైన చట్టపరమైన ప్రక్రియను అనుసరించాలి.

ముందుగా గుర్తుంచుకోవాల్సిన విషయం ఏంటంటే, మీరు ఆఫీస్‌కు వెళ్లి డబ్బులిస్తే వెంటనే లైసెన్స్ ఇవ్వరు. ప్రభుత్వాలు మద్యం దుకాణాల లైసెన్సుల కోసం ఈ-లక్కీ డ్రా లేదా ఆక్షన్ పద్ధతిని పాటిస్తాయి. అంటే ఎక్కువ మంది దరఖాస్తు చేసుకుంటే లక్కీ డ్రా ద్వారా ఎంపిక చేస్తారు, లేదా ఎవరు ఎక్కువ డబ్బు కడితే వాళ్లకే లైసెన్స్ ఇస్తారు. ఈ దరఖాస్తు చేసుకోవాలంటే మీకు కనీసం 21 సంవత్సరాలు నిండి ఉండాలి. అంతేకాక, మీపై ఎలాంటి తీవ్రమైన క్రిమినల్ కేసులు ఉండకూడదు. మీ చరిత్ర క్లీన్‌గా ఉండాలి.

ఈ వ్యాపారం మొదలు పెట్టాలంటే మీ జేబులో పెద్ద మొత్తంలో డబ్బులు ఉండాలి. కేవలం బీరు లేదా ఇంగ్లీష్ మద్యం రిటైల్ షాప్ లైసెన్స్ ఫీజు సుమారు రూ.1,50,000 వరకు ఉండొచ్చు. ఒకవేళ కూర్చుని తాగేందుకు వీలున్న పర్మిట్ రూమ్ తెరవాలంటే ఈ ఖర్చు రూ.5,44,000 వరకు పెరగవచ్చు. ఇవి కేవలం లైసెన్స్ ఫీజులు మాత్రమే. దుకాణం కోసం స్థలం అద్దె (లేదా కొనుగోలు), ఉద్యోగుల జీతాలు, కరెంట్ బిల్లులు, ముఖ్యంగా మొదటిసారి మద్యం స్టాక్ కొనుగోలు చేయడానికి పెద్ద మొత్తంలో పెట్టుబడి అవసరం. అందుకే ఈ వ్యాపారంలోకి దిగాలంటే కనీసం రూ.15 లక్షల నుంచి రూ.20 లక్షల వరకు బడ్జెట్‌ను సిద్ధం చేసుకోవాలి.

లక్కీ డ్రాలో లైసెన్స్ వచ్చినా డబ్బులు కట్టినా, మీరు నిబంధనలకు లోబడి ఉండాలి. మద్యం వ్యాపారం పూర్తిగా ప్రభుత్వ ఎక్సైజ్ శాఖ పర్యవేక్షణలో ఉంటుంది. అత్యంత కఠినమైన నియమం ఏమిటంటే 18 సంవత్సరాల కంటే తక్కువ వయస్సు ఉన్నవారికి మద్యం అమ్మడం నేరం. ఇలాంటిది మీ షాప్‌లో జరిగితే, లైసెన్స్ తక్షణమే రద్దు అవుతుంది. అలాగే దుకాణం తెరవడం, మూసేయడం సమయాలను జిల్లా యంత్రాంగం నిర్ణయిస్తుంది.

ప్రభుత్వం నిర్ణయించిన MRP (గరిష్ట చిల్లర ధర) కంటే ఒక్క రూపాయి ఎక్కువ వసూలు చేసినా, ఫిర్యాదుల ఆధారంగా లైసెన్స్‌ను సస్పెండ్ చేస్తారు. ఈ వ్యాపారంలో ఎంతో క్రమశిక్షణ అవసరం. లైసెన్స్ జీవితకాలం ఉండదు. ఇది కేవలం ఒక ఆర్థిక సంవత్సరానికి మాత్రమే చెల్లుతుంది. గడువు ముగిసేలోపు రెన్యూవల్ ఫీజు చెల్లించి, కాగితాలు పూర్తి చేయకపోతే, మీ వ్యాపారం ఆగిపోయే అవకాశం ఉంది. మళ్లీ మొదలు పెట్టాలంటే తిరిగి లాటరీ లేదా వేలం ప్రక్రియలో పాల్గొనాల్సి వస్తుంది.