Warren Buffett : బిల్ గేట్స్ ఫౌండేషన్‌కు వారెన్ బఫెట్ షాక్.. నిలిచిపోయిన బిలియన్ డాలర్ల విరాళం

Warren Buffett : ప్రపంచ ప్రసిద్ధ దిగ్గజ ఇన్వెస్టర్, బర్క్‌షైర్ హాత్వే చైర్మన్ వారెన్ బఫెట్ అంతర్జాతీయ కార్పొరేట్ ప్రపంచం ముక్కున వేలేసుకునేలా ఒక సంచలన నిర్ణయం తీసుకున్నారు. గత 20 ఏళ్లుగా ప్రతి ఏటా బిల్ అండ్ మెలిండా గేట్స్ ఫౌండేషన్‎కు తాను క్రమంతప్పకుండా ఇస్తున్న బిలియన్ డాలర్ల భారీ వార్షిక విరాళాన్ని ఆయన మొదటిసారిగా నిలిపివేశారు. 95 ఏళ్ల వయసున్న వారెన్ బఫెట్ తీసుకున్న ఈ నిర్ణయం వెనుక ఒక బలమైన కారణం ఉంది. మైక్రోసాఫ్ట్ సహ వ్యవస్థాపకుడు బిల్ గేట్స్, దివంగత లైంగిక నేరస్థుడు జెఫ్రీ ఎప్‌స్టీన్ మధ్య ఉన్న పాత వివాదాస్పద సంబంధాలపై ప్రస్తుతం అమెరికాలో ఒక స్వతంత్ర బాహ్య విచారణ జరుగుతోంది. ఆ విచారణ పూర్తి నివేదిక వచ్చే వరకు ఈ విరాళాలను నిలిపివేయాలని బఫెట్ నిర్ణయించుకున్నారు.

విరాళాల నిలిపివేతకు అసలు కారణం ఇదే

ఈ వివాదం అంతా అమెరికా న్యాయ శాఖ ఈ ఏడాది ప్రారంభంలో విడుదల చేసిన కొన్ని అత్యంత రహస్య పత్రాలు, ఈమెయిల్స్ ద్వారా బయటపడింది. ఆ పత్రాల ప్రకారం గేట్స్ ఫౌండేషన్‌లో పనిచేసే కొందరు ఉన్నత ఉద్యోగులు గతంలో జెఫ్రీ ఎప్‌స్టీన్‌తో నిరంతరం సంబంధాలు కలిగి ఉన్నట్లు సంచలన విషయాలు వెలుగులోకి వచ్చాయి. ఈ విషయాలు బయటకు రావడంతో బిల్ గేట్స్ వ్యక్తిగత ప్రతిష్టకు అంతర్జాతీయంగా పెద్ద షాక్ తగిలింది. పరిస్థితి తీవ్రతను గమనించిన గేట్స్ ఫౌండేషన్ సీఈఓ మార్క్ సుజ్‌మన్.. గతంలో తమ సంస్థకు ఎప్‌స్టీన్‌తో ఎలాంటి సంబంధాలు ఉన్నాయో తేల్చడానికి ఒక స్వతంత్ర విచారణకు ఆదేశించారు. ఈ వేసవి కాలంలోనే ఆ విచారణ నివేదిక రానుండటంతో, బఫెట్ అప్పటివరకు కొత్తగా ఎలాంటి నిధులు ఇవ్వకూడదని గట్టిగా ఫిక్స్ అయ్యారు.

రెండు దశాబ్దాల కాలం నాటి క్రేజీ ఫ్రెండ్‌షిప్‌లో బీటలు

ఈ వివాదం కేవలం చారిటీ నిధులను మాత్రమే కాకుండా, ప్రపంచంలోని టాప్ కోటీశ్వరులైన వారెన్ బఫెట్, బిల్ గేట్స్ మధ్య ఉన్న సుదీర్ఘకాలం నాటి వ్యక్తిగత స్నేహాన్ని కూడా దెబ్బతీసింది. గత కొన్ని నెలలుగా వీరిద్దరి మధ్య సంబంధాలు పూర్తిగా దెబ్బతిన్నాయని అంతర్జాతీయ మీడియా కథనాలు పేర్కొంటున్నాయి. దీనికి ప్రధాన ఉదాహరణ.. ప్రతి ఏటా బర్క్‌షైర్ హాత్వే నిర్వహించే అత్యంత ప్రతిష్టాత్మకమైన వార్షిక వాటాదారుల సమావేశానికి ఈసారి బిల్ గేట్స్ హాజరుకాకపోవడమే. గత కొన్నేళ్లలో బిల్ గేట్స్ ఈ మీటింగ్‌కు రాకపోవడం ఇదే మొదటిసారి. మార్చిలో ఇచ్చిన ఒక ఇంటర్వ్యూలో బఫెట్ మాట్లాడుతూ.. ఎప్‌స్టీన్ పత్రాలు బయటకు వచ్చినప్పటి నుండి తాను బిల్ గేట్స్‌తో మాట్లాడలేదని స్వయంగా అంగీకరించారు.

ప్రపంచ సేవా కార్యక్రమాలపై పడనున్న ప్రభావం

వారెన్ బఫెట్ నిలిపివేసిన నిధులు చాలా పెద్దవి కావడం గమనార్హం. దీనివల్ల ప్రపంచవ్యాప్తంగా నడుస్తున్న అనేక విద్య, వైద్య, సామాజిక సంక్షేమ ప్రాజెక్టులపై తీవ్ర ప్రభావం పడే అవకాశం ఉంది. ఎందుకంటే గేట్స్ ఫౌండేషన్‌కు బఫెట్ అత్యంత పెద్ద దాతగా ఉన్నారు. 2006 నుంచి 2025 వరకు ఆయన దాదాపు 47 నుంచి 48 బిలియన్ డాలర్ల విలువైన బర్క్‌షైర్ హాత్వే షేర్లను ఈ ఫౌండేషన్‌కు ఉచితంగా రాసిచ్చారు. కేవలం గత ఏడాది మాత్రమే ఆయన 4.5 బిలియన్ డాలర్లకు పైగా (దాదాపు రూ.38,000 కోట్లు) విరాళంగా ఇచ్చారు. అయితే, బఫెట్ తీసుకున్న ఈ నిర్ణయం కేవలం గేట్స్ ఫౌండేషన్‌కు మాత్రమే పరిమితం కానుంది. ఆయన పిల్లల ఆధ్వర్యంలో నడిచే కుటుంబ చారిటీ ట్రస్టులకు, అలాగే సుసాన్ థాంప్సన్ బఫెట్ ఫౌండేషన్‌కు ఇచ్చే వార్షిక సహాయం ఎప్పటిలాగే కొనసాగుతుందని స్పష్టం చేశారు.

ఆరోపణలపై బిల్ గేట్స్ ఇచ్చిన క్లారిటీ

ఈ వివాదంపై 70 ఏళ్ల బిల్ గేట్స్ మీడియాతో మాట్లాడుతూ తన వైపు వివరణ ఇచ్చుకున్నారు. చట్టపరంగా ఆయనపై ఇప్పటివరకు ఎలాంటి నేరారోపణలు నమోదు కాలేదు. గతంలో జెఫ్రీ ఎప్‌స్టీన్‌ను కలవడం తాను చేసిన అతిపెద్ద పొరపాటని, అందుకు తాను జీవితాంతం పశ్చాత్తాపపడుతూనే ఉంటానని గేట్స్ పేర్కొన్నారు. అయితే ఎప్‌స్టీన్ చేస్తున్న ఎలాంటి నేరపూరిత లేదా అసాంఘిక కార్యకలాపాలు తనకు తెలియవని, అతనితో ఉన్న సంబంధాలు కేవలం సమాజ సేవ, దాతృత్వ పనుల కోసమేనని స్పష్టం చేశారు. తాను ఎప్పుడూ ఎప్‌స్టీన్ లైంగిక వేధింపుల బాధితులతో సమయం గడపలేదని, అతని తప్పుడు ప్రవర్తనను ఎప్పుడూ చూడలేదని గేట్స్ కరాఖండిగా చెప్పారు.