Gratuity : గ్రాట్యుటీ రూల్స్ ఏంటి ? ఎన్నేళ్లు సర్వీస్ చేస్తే ఎంత డబ్బులు వస్తాయి ?

Gratuity : ప్రస్తుతం చాలా కంపెనీలలో ఉద్యోగులకు ఈపీఎఫ్, గ్రాట్యుటీ డబ్బులు లభిస్తాయి. ఉద్యోగి రిటైర్ అయినప్పుడు లేదా ఉద్యోగం మానేసినప్పుడు కంపెనీ వారికి గ్రాట్యుటీ ఇస్తుంది. ఈపీఎఫ్, గ్రాట్యుటీలు ఉద్యోగుల భవిష్యత్తుకు ఆర్థిక భద్రతను అందిస్తాయి. ఒక కంపెనీలో కనీసం 5 సంవత్సరాలు నిరంతరం పనిచేసిన ఉద్యోగి గ్రాట్యుటీకి అర్హులు. గ్రాట్యుటీ గురించి మరిన్ని వివరాలు ఇప్పుడు తెలుసుకుందాం.

గ్రాట్యుటీ అంటే ఏమిటి?

గ్రాట్యుటీ అనేది ఒక కంపెనీలో ఉద్యోగి ఎక్కువ కాలం పనిచేసినందుకు కృతజ్ఞతా భావంతో ఇచ్చే గౌరవ ధనం. ఇది ఇంగ్లీష్ పదం gratitude(కృతజ్ఞత) నుండి వచ్చింది. ఈ డబ్బు ఉద్యోగికి జీతంతో పాటు లభించే ఒక గౌరవ ధనం.

అన్ని కంపెనీలు గ్రాట్యుటీ ఇస్తాయా?

భారతదేశంలో కనీసం 10 మంది ఉద్యోగులు ఉన్న కంపెనీలు 1972 నాటి పేమెంట్ ఆఫ్ గ్రాట్యుటీ చట్టం పరిధిలోకి వస్తాయి. ఒక ఉద్యోగి కనీసం 5 సంవత్సరాలు పూర్తి చేస్తే వారికి గ్రాట్యుటీ ఇవ్వాలనే నిబంధన ఉంది. ఈపీఎఫ్ మీ పేరోల్‌లో చూపబడుతుంది.. కానీ గ్రాట్యుటీని నేరుగా గుర్తించడం కష్టం. మీ కంపెనీలో గ్రాట్యుటీ పాలసీ ఉందా లేదా అని మీరు హెచ్‌ఆర్ విభాగాన్ని అడిగి తెలుసుకోవాలి.

5 సంవత్సరాల సర్వీస్‌కు ఎంత గ్రాట్యుటీ లభిస్తుంది?

గ్రాట్యుటీని లెక్కించడానికి ఈ సూత్రాన్ని ఉపయోగిస్తారు:

చివరగా తీసుకున్న జీతం x పనిచేసిన సంవత్సరాలు x 15 / 26

ఉదాహరణకు, మీరు 5 సంవత్సరాలు పని చేసి, మీ చివరి జీతం (బేసిక్ పే) రూ.40,000 అనుకుంటే, గ్రాట్యుటీ లెక్క ఇలా ఉంటుంది:

40000 x 5 x 15 / 26

= 30,00,000 / 26

= రూ.1,15,384

అంటే, మీకు సుమారు రూ.1.15 లక్షల గ్రాట్యుటీ వస్తుంది.

అలాగే, మీరు 20 సంవత్సరాలు పని చేసి, మీ చివరి జీతం రూ.80,000 అనుకుంటే, గ్రాట్యుటీ లెక్క ఇలా ఉంటుంది:

80000 x 20 x 15 / 26

= రూ.9,23,076

మరొక రెండు ముఖ్యమైన విషయాలు:

మీరు 5 సంవత్సరాల 7 నెలలు పని చేస్తే, దాన్ని 6 సంవత్సరాలుగా లెక్కలోకి తీసుకుంటారు. అంటే, 6 నెలల కంటే ఎక్కువ సర్వీస్ ఉంటే, దాన్ని ఒక పూర్తి సంవత్సరంగా పరిగణిస్తారు. ప్రస్తుత గ్రాట్యుటీ చట్టం ప్రకారం, గరిష్ట గ్రాట్యుటీ మొత్తం రూ.20 లక్షల వరకు మాత్రమే ఉంటుంది.

గ్రాట్యుటీ అనేది ఉద్యోగులకు ఒక పెద్ద ఆర్థిక భద్రత. ఇది ఉద్యోగుల కష్టానికి, కంపెనీ పట్ల వారి విధేయతకు గుర్తింపు. దీని ద్వారా ఉద్యోగులు రిటైర్ అయిన తర్వాత లేదా ఉద్యోగం మారిన తర్వాత కూడా ఆర్థికంగా స్థిరంగా ఉండడానికి సహాయపడుతుంది.