WhatsApp: ఫోన్పే, గూగుల్ పేలకు గట్టి పోటీ.. ఇక బిల్లులన్నీ వాట్సాప్లోనే
ఇక బిల్లులన్నీ వాట్సాప్లోనే
WhatsApp: మనందరం రోజువారీ సంభాషణల కోసం వాడే వాట్సాప్ ఇప్పుడు డిజిటల్ చెల్లింపుల రంగంలో సంచలనం సృష్టిస్తోంది. ప్రముఖ పేమెంట్ యాప్లకు పోటీగా నేరుగా యాప్ నుంచే కరెంట్, గ్యాస్, వాటర్, ఫాస్టాగ్, క్రెడిట్ కార్డ్ బిల్లులు చెల్లించే సదుపాయాన్ని అందుబాటులోకి తెచ్చింది. ప్రతిరోజూ వాడే చాట్ స్క్రీన్ నుంచే ఒకే క్లిక్తో ఈ చెల్లింపులు పూర్తి చేయవచ్చు. మెటా యాజమాన్యంలోని వాట్సాప్ భారతీయ వినియోగదారుల కోసం బిల్లు చెల్లింపుల సేవలను అధికారికంగా ప్రారంభించింది. నేషనల్ పేమెంట్స్ కార్పొరేషన్ ఆఫ్ ఇండియా (NPCI)కు చెందిన భారత్ కనెక్ట్ నెట్వర్క్ సహకారంతో ఈ సదుపాయాన్ని రూపొందించారు. దీని ద్వారా వినియోగదారులు కరెంట్, గ్యాస్, నీరు, ఫాస్టాగ్, బీమా, క్రెడిట్ కార్డ్, రుణాలు వంటి దాదాపు 30 విభాగాలకు చెందిన 22,722 రకాల బిల్లింగ్ సంస్థలకు నేరుగా చెల్లింపులు చేయవచ్చు. ఇకపై వేర్వేరు చెల్లింపుల కోసం రకరకాల యాప్లు వాడాల్సిన అవసరం లేదా చెల్లింపు గడువు తేదీలను గుర్తుంచుకోవాల్సిన తలనొప్పి ఉండదని కంపెనీ స్పష్టం చేసింది.
ఎలా ఉపయోగించాలి? ఏమేం ఫీచర్లు ఉన్నాయి?
వినియోగదారులు వాట్సాప్ హోమ్ స్క్రీన్ పైన కనిపించే రూపాయి ఐకాన్పై ట్యాప్ చేసి ఈ సేవలను పొందవచ్చు. మొదటిసారి బిల్లు చెల్లించిన వివరాలు 'పేమెంట్స్ హోమ్' విభాగంలో భద్రంగా ఉంటాయి. దీనివల్ల తదుపరిసారి ఒక్క క్లిక్తో బిల్లు చెల్లించే అవకాశం లభిస్తుంది. ఒకే సర్వీస్ ప్రొవైడర్ కింద ఉంటే ఇల్లు, ఆఫీస్, కుటుంబ సభ్యుల ఖాతాలను ఒకే చోట నిర్వహించుకోవచ్చు. యూపీఐ, డెబిట్ కార్డ్, క్రెడిట్ కార్డ్ వంటి తమకు నచ్చిన మార్గం ద్వారా బిల్లులు చెల్లించవచ్చు. రాబోయే రోజుల్లో ఆండ్రాయిడ్, ఐఓఎస్ ఆపరేటింగ్ సిస్టమ్లు వాడుతున్న వినియోగదారులందరికీ దశలవారీగా ఈ ఫీచర్ అందుబాటులోకి రానుంది.
యూపీఐ రికార్డుల వేళ చాట్ యాప్ వ్యూహం
దేశంలో డిజిటల్ లావాదేవీలు ఆల్టైమ్ గరిష్ఠ స్థాయికి చేరిన సమయంలో వాట్సాప్ ఈ అడుగు వేసింది. ఆగస్టు 2026 నాటికి నెలకు ఏకంగా 24.51 బిలియన్ల యూపీఐ లావాదేవీలు నమోదు కాగా, వాటి విలువ రూ.29.82 లక్షల కోట్లకు చేరింది. భారతదేశంలో డిజిటల్ చెల్లింపులు ఎంత వేగంగా విస్తరిస్తున్నాయో ఈ గణాంకాలు చెబుతున్నాయి. మొబైల్ రీఛార్జ్, మెట్రో టికెట్ల బుకింగ్, ప్రభుత్వ సేవలు పొందేందుకు ఇప్పటికే వాట్సాప్ వాడుతున్న ప్రజలకు ఈ బిల్లుల చెల్లింపు ఫీచర్ మరింత ఉపయుక్తంగా మారనుంది.
సామాన్యులకు మరింత చేరువగా డిజిటల్ సేవలు
భారత్లో మెట్రో టికెట్ల నుంచి ఇన్సూరెన్స్ కొనుగోలు వరకు ప్రతిదానికీ వాట్సాప్ సులువైన వేదికగా మారిందని మెటా ప్రతినిధులు వెల్లడించారు. చాట్ మెసేజ్ ఎంత సులభంగా పంపుతామో, అంతే సులభంగా ప్రతి ఒక్కరూ తమ ఇంటి బిల్లులు చెల్లించేలా చేయడమే తమ లక్ష్యమని పేర్కొన్నారు. ముఖ్యంగా చిన్న చిన్న గ్రామాలు, పల్లెల్లో ఉండే ప్రజలకు కూడా డిజిటల్ చెల్లింపులను సులభతరం చేయడంలో ఈ కొత్త సదుపాయం కీలక పాత్ర పోషిస్తుందని భావిస్తున్నారు.
